បាត់ដំបង៖ ក្រោមបញ្ជាផ្ទាល់ពីលោក ឧត្តមសេនីយ៍ត្រី មាស សុវណ្ណ មេបញ្ជាការកងរាជអាវុធហត្ថ ខេត្តបាត់ដំបង កម្លាំងការិយាល័យជំនាញបានចុះបង្ក្រាបករណីគ្រឿងញៀននៅ ថ្ងៃទី២៨ ខែមីនា ឆ្នាំ២០១៨ នៅភូមិចំការឬស្សី សង្កាត់ព្រែកព្រះស្តេច ក្រុងបាត់ដំបង ដោយឃាត់ខ្លួនជនសង្ស័យចំនួន ៣នាក់។
កម្លាំងអាវុធហត្ថខេត្តបាត់ដំបងឃាត់ខ្លួនជនសង្ស័យ ៣នាក់ពាក់ព័ន្ធករណីគ្រឿងញៀននេះដោយអនុវត្តបទបញ្ជាដ៏ម៉ឺងម៉ាត់របស់លោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបបញ្ជាការកងរាជអាវុធហត្ថលើផ្ទៃប្រេទស និងអនុវត្តតាមបេសកកម្មរបស់កងរាជអាវុធហត្ថគឺ បង្ការ បង្ក្រាប និងសង្គ្រោះ ពិសេសយកចិត្តទុកដាក់លើបញ្ហាភូមិ/ឃុំ មានសុវត្ថិភាព។
ជនសង្ស័យ ដែលត្រូវចាប់ខ្លួន ១.ឈ្មោះ តាំង សុខជា ភេទប្រុស អាយុ ៣៤ឆ្នាំ ទីលំនៅភូមិអញ្ចាញ សង្កាត់អូរចារ ក្រុងបាត់ដំបង។ ២.ឈ្មោះ ស្រី លាងផេង ភេទប្រុស អាយុ ៣៤ ឆ្នាំ មុខរបរមិនពិតប្រាកដ ទីលំនៅភូមិរំចេក៤ សង្កាត់ រតនៈ ក្រុងបាត់ដំបង ។ ៣.ឈ្មោះ សេង ភារ៉ា ភេទប្រុស អាយុ ២៨ ឆ្នាំ មុខរបរពេទ្យធ្មេញ ទីលំនៅភូមិឈើទាល ឃុំឈើទាល ស្រុកបាណន់ ខេត្តបាត់ដំបង។ វត្ថុតាងដកហូតរួមមាន ៖ ម៉ាទឹកកក២កញ្ចប់ ទម្ងន់ ២,៥៣ក្រាម ម៉ូតូចំនួន ១ គ្រឿងទូរស័ព្ទចំនួន ២ គ្រឿង និងរថយន្តចំនួន ១ គ្រឿង។
បច្ចុប្បន្នជនសង្ស័យនិងវត្ថុតាង ត្រូវបានមន្ត្រីជំនាញកងរាជអាវុធហត្ថខេត្តកំពុងបន្តនីតិវិធី៕ ដោយ ៖ បញ្ញាស័ក្តិ