ត្រីទឹកសាប១ក្បាល បានបង្កការភ្ញាក់ផ្អើលយ៉ាងខ្លាំងខណៈពេលដែលវាបានយកស្រកី គៀបនឹងគែមទូកប្រហែលប៉ងសុំចំណី ខណៈពេលអ្នកនៅលើទូកកំពុងផឹកស្រាបៀរក៏បណ្តក់ឲ្យវាផឹក។
ហេតុការណ៍នេះកើតឡើងនៅដៃទន្លេមួយនាប្រទេសប្រេស៊ីល បុរសមួយក្រុមបានអុំទូកទៅស្ទូចត្រី ហើយក៏ប្រទះហេតុការណ៍ដូចរៀបរាប់ខាងលើ។
ត្រីមួយនេះមានស្រកាពណ៌លឿង និងមានពុកមាត់ស្រដៀងនឹងត្រីឆ្លាំង តាមអ្នកដែលបានឃើញ ហើយថតឃ្លីបខាងក្រោមនេះ បញ្ជាក់ថា វាជាត្រីទឹកសាប ។ ពួកគេចែករំលែកថា ដំបូងឡើយពេលពួកគេកំពុងអង្គុយស្ទូចត្រីនៅលើទូក ក៏ឃើញត្រីនេះហែលក្រឡឹងមកជិតទូក រួចក៏ស្រាប់តែវាប្រើស្រកីដ៏តូចរបស់វាថ្ពក់ជាប់នឹងគែមទូក ហើយងើបក្បាលឡើងផុតផ្ទៃទឹក។
អ្នកស្ទូចត្រីរូបនេះកំពុងផឹកស្រាបៀរ ហើយគិតថា ប្រហែលត្រីនេះចង់ផឹកដែរ ។ ត្រីមួយក្បាលនេះវាហារមាត់ ហើយបុរសរូបនោះក៏បណ្តក់ស្រាបៀរចូលមាត់របស់វា។ តាមការស្មានត្រីនោះបានផឹកស្រាបៀរប្រមាណ ២០ក្អឹក ។ ក្រោយពេលផឹករួចប្រហែលជាឆ្អែតឆ្អន់ វាក៏ទម្លាក់ខ្លួនទៅក្នុងទឹកវិញ រួចហែលទៅបាត់ ក្រុមអ្នកស្ទូចត្រីផ្ទុះសំណើចនឹងព្រឹត្តិការណ៍នេះ។
គួររំលឹកថា កាលពីឆ្នាំ ២០១៤ អ្នកស្រាវជ្រាវមួយក្រុមនៅបុរីញូយ៉ក បានធ្វើការពិសោធន៍ឲ្យត្រីផឹកស្រាបៀរ ។ ពួកគេសង្កេតឃើញថា ពួកមច្ឆារចូលចិត្តភេសជ្ជៈមានហ្គាសនេះណាស់ ហើយក្រោយពេលផឹកស្រាបៀរ វាក៏បាត់បង់ការគ្រប់គ្រងខ្លួនវា៕ ចន្ទ្រា
