ខេត្តមណ្ឌលគិរី ៖ ប្រជាពលរដ្ឋរស់នៅខេត្តមណ្ឌលគិរី បានអះអាងថាលោក ជុយ សុឃាង នាយផ្នែករដ្ឋបាលព្រៃឈើស្រុកកែវសីមា ខេត្តមណ្ឌលគិរី ថាបានទទួលសំណូករាប់ពាន់ដុល្លារអាមេរិកក្នុង១ខែៗ ពីក្រុមអ្នករកស៊ីដឹកឈើឆ្លង់ដែនខុសច្បាប់ ចូលទៅកាន់ប្រទេសវៀតណាម។
ពលរដ្ឋរស់នៅក្នុងស្រុកកែវសីមាស្នើមិនបញ្ចេញឈ្មោះ បានអះអាងថា លោក ជុយ សុឃាង ជានាយកផ្នែករដ្ឋបាលព្រៃឈើ ស្រុកកែវសីមា ដែលដើរតួនាទីទប់ស្កាត់រាប់បទល្មើសឈើនាមូលដ្ឋាននេះ គឺមិនដែលឃើញចុះបង្ក្រាប ឬចាប់អ្នកដឹកឈើខុសច្បាប់ ធ្វើសកម្មភាពឆ្លងកាត់មូលដ្ឋានស្រុកកែវសីមាឲ្យមានប្រសិទ្ធភាពនោះទេ។ ផ្ទុយទៅវិញ គឺអង្គុយចាំទទួលយកលុយពីអ្នកដឹកឈើខុសច្បាប់ ដោយពុំមានខ្វាយខ្វល់ពីការបាត់បង់ធនធានព្រៃឈើ ដូចដែលសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា តែងតែបានប្រកាសដាក់បទបញ្ជាទៅមន្ត្រីស្ថាប័នពាក់ព័ន្ធ ក្រោមឱវាទឲ្យរួមសហការគ្នាទប់ស្កាត់បទល្មើសព្រៃឈើឲ្យមានប្រសិទ្ធភាព និង កុំឲ្យធ្វើសកម្មភាព នៅតាមមូលដ្ឋានីមួយៗជាបន្តបន្ទាប់មកនោះទេ។
ផ្ទុយទៅវិញ ប្រជាពលរដ្ឋចោទថា លោក ជុយ សុឃាង នាយផ្នែករដ្ឋបាលព្រៃឈើស្រុកកែវសីមា បានពង្រាយកូនចៅ របស់ខ្លួននៅគ្រប់ច្រកចេញចូលនាមូលដ្ឋាននេះ ដើម្បីឃ្លាំមើល ក្រុមអ្នកដឹកឈើខុសច្បាប់ ឲ្យចូលមកជួបចរចារ ឬបង់លុយដាក់ខែ ឬដាក់ថ្ងៃយ៉ាងរំភើយទៅវិញ។
អ្នកដឹកឈើខុសច្បាប់តាមម៉ូតូម្នាក់ ក្នុងចំណោមមនុស្សច្រើនទៀតបានឲ្យដឹងថា រូបគាត់ដឹកឈើឆ្លងកាត់ស្រុកកែវសីមា ក្នុង១ម៉ូតូ ត្រូវបង់លុយជូនសមត្ថកិច្ចជាច្រើនស្ថាប័ន ពិសេស បង់ជូនស្ថាប័នមេព្រៃ ឬនាយផ្នែករដ្ឋបាលព្រៃឈើស្រុកកែវសីមាតែម្តងមិនដែលខកខាននោះទេ។ ប្រភពដដេលនេះ អះអាងថា ចំពោះសមត្ថកិច្ចស្ថាប័នផ្សេងៗ ក្រៅពីស្ថាប័នមេព្រៃ គឺត្រូវបង់លុយរាប់ចំនួនជើងម៉ូតូ ឬរថយន្តដឹកឈើឆ្លងកាត់មូលដ្ឋាននេះ ប៉ុន្តែសម្រាប់មេព្រៃ ឬផ្នែករដ្ឋបាលព្រៃឈើស្រុកកែវសីមាវិញ គឺបានបង់ដាក់ខែជូនក្នុង ១ខែ ត្រូវចំណាយលុយ ៣០០ដុល្លារអាមេរិក សម្រាប់ម៉ូតូ ១គ្រឿង។ ចំណែកអ្នករកស៊ីឈើដឹកតាមរថយន្តវិញ គឺ ត្រូវបង់លុយជូនមន្ត្រីជំនាញពាក់ព័ន្ធ ពិសេសមេព្រៃច្រើនជាងអ្នកដឹកឈើតាមម៉ូតូ គឺអាចចន្លោះចាប់ពី ៤០០ ទៅ៥០០ដុល្លារក្នុងមួយខែៗ។
ត្រង់ចំណុចនេះ ប្រជាពលរដ្ឋ រស់នៅស្រុកកែវសីមា ខេត្តមណ្ឌលគិរី បានកត់សម្គាល់ថា បច្ចុប្បន្ននៅតាមផ្លូវជាតិលេខ៧៦ ពោលគឺចាប់ពីចំណុចគីឡូ៦៤ ក្នុងស្រុកអូររាំង ខេត្តមណ្ឌលគិរី រហូតដល់ផ្តុំផ្សារការ៣ ស្រុកស្នួល គឺមានរថយន្ត និងម៉ូតូដឹកឈើជាច្រើនគ្រឿង កំពុងធ្វើសកម្មភាពដឹកឈើខុសច្បាប់ទាំងថ្ងៃទាំងយប់ ដោយគ្មានសមត្ថកិច្ចពីស្ថាប័នពាក់ព័ន្ធផ្នែកណាមួយចេញមុខទប់ស្កាត់នោះទេ។
ផ្តើមពីបញ្ហានេះ ក្រុមប្រជាពលរដ្ឋសង្ស័យថា មន្ត្រីមូលដ្ឋាន និងមន្ត្រីជំនាញរដ្ឋបាលព្រៃឈើមួយចំនួន បានត្រូវដងត្រូវផ្លែជាមួយគ្នាជាប្រព័ន្ធ ទើបគ្មានសកម្មភាពចុះបង្ក្រាបបទល្មើសព្រៃឈើ ដែលកំពុងធ្វើសកម្មភាពអនាធិបតេយ្យនៅមូលដ្ឋានខេត្តមណ្ឌលគិរី ដឹកឆ្លងកាត់ចេញទៅកាន់ប្រទេសវៀតណាម ដោយរលូន និងគ្មានការហាមឃាត់បែបនេះ។
ចំពោះបញ្ហានេះ ក្រុមប្រជាពលរដ្ឋ បានសំណូមដល់ថ្នាក់ដឹកនាំក្រសួងស្ថាប័នថ្នាក់ជាតិ ឲ្យបញ្ជូនមន្ត្រីជំនាញ ចុះពិនិត្យស្រាវជ្រាវលើករណីបទល្មើសព្រៃឈើខាងលើនេះឲ្យបានឆាប់ ដើម្បីឈានទៅទប់ស្កាត់បទល្មើសព្រៃឈើ នៅខេត្តមណ្ឌលគិរី ឲ្យមានប្រសិទ្ធភាពស្របតាមការចង់បាន របស់ប្រមុខដឹកនាំរដ្ឋាភិបាល។
បន្ថែមលើនេះ ប្រជាពលរដ្ឋក៏ស្នើថា ប្រសិនបើថ្នាក់លើ បានរកឃើញកំហុសឆ្គង ឬរកឃើញមន្ត្រីជំនាញមួយចំនួន ដែលបានឃុបឃិតទទួលសំណូកពីឈ្មួញឈើខុសច្បាប់ ដូចការចោទប្រកាន់មែន គឺស្នើឲ្យមានវិធានការតាមផ្លូវច្បាប់ឲ្យបានធ្ងន់ធ្ងរ។
ត្រង់ចំណុចនេះ ប្រជាពលរដ្ឋហាក់មានមន្ទិលថា តើថ្នាក់ដឹកនាំរដ្ឋបាលព្រៃឈើ នៃមន្ទីរកសិកម្ម រុក្ខាប្រមាញ់ និងនេសាទ ព្រមទាំងស្ថាប័នពាក់ព័ន្ធមួយចំនួនទៀត នឹងមានវិធានការចំពោះមន្ត្រីរាជការ ដែលទទួលប្រាក់ខែរដ្ឋ ហើយបានទៅឃុបឃិតជាមួយឈ្មួញឈើ ប្រព្រឹត្តអំពើរពុករលួយបែបនេះទៅវិញនោះ?។
ទាក់ទិនការចោទនេះ អ្នកយកព័ត៌មានគេហទំព័រ ប្រចាំខេត្តមណ្ឌលគិរី មិនទាន់អាចទាក់ទង លោក ជុយ សុឃាង នាយផ្នែករដ្ឋបាលព្រៃឈើស្រុកកែវសីមា ដើម្បីបំភ្លឺជុំវិញប្រជាពលរដ្ឋចោទថា បានទទួលសំណូកពីឈ្មួញរកស៊ីឈើខុសច្បាប់ ឆ្លងកាត់មូលដ្ឋានស្រុកកែវសីមា បានទេតាមទូរស័ព្ទ នៅរសៀលថ្ងៃទី២៩ ខែមីនា ឆ្នាំ២០១៨៕ ដោយ៖ សមុទ្រឈើ