ភ្នំពេញ ៖ នារសៀលថ្ងៃព្រហស្បតិ៍ ទី២៩ ខែមីនា ឆ្នាំ២០១៨ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោកស្រី ជា ស៊ីណា បានដឹកនាំមន្ត្រីរាជការក្រោមឱវាទ ចូលរួមពិធីត្បាញក្រមាវែងជាងគេនៅលើពិភពលោក ដែលមានប្រវែង ១០០០ម៉ែត្រ ក្នុងបរិវេណវាលព្រះមេរុ ដើម្បីបំបែកកំណត់ត្រាពិភពលោក ដែលនឹងត្រូវយកតាំងបង្ហាញក្នុងពិធីមហាសង្ក្រាន្តបុណ្យចូលឆ្នាំថ្មី ប្រពៃណីជាតិខ្មែរនាខេត្តសៀមរាមអង្គរ ដែលខិតជិតចូលមកដល់នាពេលខាងមុននេះ។
លោកអភិបាលរាជធានីភ្នំពេញ បានមានប្រសាសន៍ថា រដ្ឋបាលរាជធានីភ្នំពេញ នឹងតាំងបង្ហាញនូវ វត្ថុសិល្បៈ វប្បធម៌ ប្រពៃណី និងត្បាញក្រមា ដើម្បីរំលឹកឱ្យអ្នកជំនាន់ក្រោយ បានយល់ដឹង និងបន្តថែរក្សា
ដើម្បីចូលរួមអបអរសាទរ បុណ្យចូលឆ្នាំថ្មីប្រពៃណីជាតិខ្មែរ ដែលនឹងមកដល់នៅពេលដ៏ខ្លីខាងមុខនេះ។ រដ្ឋបាលរាជធានីភ្នំពេញ បានរៀបចំសង្គ្រានឆ្នាំថ្មី នៅរមណីយដ្ឋានប្រវត្តិសាស្ត្រវត្តភ្នំ និងកម្មវិធីសប្បាយភាពជាច្រើនទៀត រួមទាំងរៀបចំលំអរតាមដងផ្លូវនានា ក្នុងរាជធានីភ្នំពេញ សម្រាប់ឱ្យភ្ញៀវជាតិ អន្តរជាតិ បានកម្សាន្តសប្បាយផង និងបង្ហាញពីទំនៀមទម្លាប់ វប្បធម៌ ប្រពៃណីខ្មែរ ហើយក៏ជាការរំលឹកឱ្យអ្នកជំនាន់ក្រោយៗ បានយល់ដឹងកាន់តែច្បាស់ និងបន្តថែរក្សាការពារឱ្យបានគង់វង្សយូអង្វែង។
មានប្រសាសន៍ ប្រាប់ក្រុមអ្នកសារព័ត៌មាន នៅក្នុងពិធីអញ្ជើញទស្សនា និងលើកទឹកចិត្ត ដល់ក្រុមត្បាញក្រមាខ្មែរ ដែលរៀបចំដោយសហភាពសហព័ន្ធយុវជនកម្ពុជា នៅវាលព្រះមេរុ កាលពីរសៀលថ្ងៃទី២៩ខែមីនានេះ លោក ឃួង ស្រេង អភិបាលរាជធានីភ្នំពេញបានឱ្យដឹងថា រាល់សកម្មភាពនានា ដែលបានបង្កើតឡើង ដើម្បីចូលរួមអបអរសាទរ បុណ្យ ចូលឆ្នាំថ្មីប្រពៃណីជាតិរបស់យើង និងមួយផ្នែកទៀត រំលឹកឱ្យកូនខ្មែរ បានដឹងអំពីកិច្ចខិតខំប្រឹងប្រែងតស៊ូ បង្កើតនូវស្នាដៃ ច្នៃប្រឌិត នូវសម្ភារៈប្រើប្រាស់របស់បុព្វបុរស ដែលបានបន្សល់ទុកមកឱ្យអ្នកជំនាន់ក្រោយបន្តថែរក្សាការពារឱ្យគង់វង្ស។
លោកអភិបាលបានរំលឹកថា “សិប្បកម្ម ត្បាញ ជាស្នាដៃរបស់ដូនតាខ្មែរយើង តាំងពីបុរាណកាលមក បង្កើតឡើងសម្រាប់អាជីវកម្មចិញ្ចឹមជិវិតប្រចាំថ្ងៃក្នុងគ្រួសារ ហើយសមិទ្ធផលមួយនេះ កំពុងមានប្រជាប្រិយភាព និងទាញការចាប់អារម្មណ៍យ៉ាងខ្លាំងពីសំណាក់យុវជន ក៏ដូចជាភ្ញៀវជាតិ អន្តរជាតិ ដែលបានមកទស្សនាកម្សាន្ត នៅប្រទេស កម្ពុជា។ ក្រមាខ្មែរ ជាផលិតផលដែលផលិតឡើងដោយដៃកសិករ មានតួនាទីច្រើនយ៉ាង សម្រាប់ការប្រើប្រាស់ប្រចាំថ្ងៃរបស់ប្រជាជនខ្មែរ។
លោក ឃួង ស្រេង បញ្ជាក់ថា ការរៀបចំឱ្យមានកម្មវិធីបង្ហាញពីសិប្បកម្មក្រមា និងផលិតផលក្រមា នាពេលនេះ ជាកិច្ចការដ៏មានប្រយោជន៍ សម្រាប់កូនខ្មែរ ដឹងពីសារសំខាន់ និងគុណប្រយោជន៍ក្រមារបស់កសិករខ្មែរ។ លោកបានលើកទឹកចិត្តឱ្យប្រជាជន បន្តការប្រើប្រាស់ក្រមាខ្មែរ ដែលជាមរតករបស់ខ្លួន និងជួយអភិរក្សទាំងអស់គ្នា ព្រមទាំងអំពាវនាវឱ្យមកទស្សនា ការតាំងបង្ហាញពីសង្វាក់សិប្បកម្មត្បាញក្រមានៅទីនេះ និងជួយជាវផលិតផល ដែលជាស្នាដៃរបស់យុវជនខ្មែរឱ្យបានច្រើន ដើម្បីជាការលើកទឹកចិត្ត និងជំរុញការផលិត។
ជាមួយគ្នានោះ លោក អភិបាល ក៏បានជម្រាបជូន អំពី ការរៀបចំតុបតែង លំអរសោភ័ណភាព តាមដងផ្លូវ សួនច្បារ កន្លែងកម្សាន្ត វត្តអារាម និងសង្ក្រាន្តវត្តភ្នំ រួចជាស្រេច ជាពិសេស ត្រៀមពង្រឹងសន្តិសុខ សណ្តាប់ ការពារសុវត្ថិភាព សម្រាប់អ្នកមកកម្សាន្តនានា និងទទួលអំណរឆ្នាំថ្មី ក្នុងរាជធានីភ្នំពេញ៕ ដោយ៖បញ្ញាស័ក្តិ