ខេត្តព្រះសីហនុ ៖ អតីតចៅសង្កាត់កោះរ៉ុង និងមន្ត្រីជំនាញក្រសួងរៀបចំដែនដីនគរូបនីយកម្ម និងសំណង់ ដែលជាក្រុមការងារបានចុះវាស់វែងកំណត់ក្បាលដីនៅភូមិព្រែកស្វាយ សង្កាត់កោះរ៉ុង ក្រុង-ខេត្តព្រះសីហនុ បានសរសេរលិខិតបដិសេធ និងមិនទទួល ស្គាល់ លិខិតបញ្ជាក់ដីលេខ៦៩ក.រ របស់លោក សុខ ប៊ុន ចុះថ្ងៃទី១៨ ខែធ្នូ ឆ្នាំ២០០២ទេ ព្រោះចាត់ទុកជាលិខិតក្លែងបន្លំ ឬក្លែង ក្លាយ។
លិខិតសរសេរផ្ទាល់ដៃមានហត្ថលេខា លោក អ៊ួង និត អតីតចៅរងទី១សង្កាត់កោះរ៉ុង បច្ចុប្បន្នប្រជាពលរដ្ឋរស់នៅភូមិកោះតូច សង្កាត់កោះរ៉ុង ចុះថ្ងៃទី២៧ ខែមីនា ឆ្នាំ២០១៨ផ្ញើជូន លោក យន្ត មីន អភិបាលខេត្តព្រះសីហនុ បានសុំបដិសេធថា មិនបានចុះ ហត្ថលេខាលើលិខិតបញ្ជាក់ក្បាលដីលេខ ៦៩ក.រ ចុះថ្ងៃទី១៨ ខែធ្នូ ឆ្នាំ២០០២ របស់ លោក សុខ ប៊ុន ដែលបានទិញបន្តពីឈ្មោះ ម៉ា ទី ជាប្រជាពលរដ្ឋរស់នៅភូមិព្រែកស្វាយ សង្កាត់កោះរ៉ុង ក្រុង-ខេត្តព្រះសីហនុ ដែលមានព្រំប្រទល់៖
ខាងជើងទល់នឹង ឆ្នេរសមុទ្រ (១០៥ម៉ែត)
ខាងត្បូងទល់នឹង ចង្កេះភ្នំថ្មជញ្ជាំង
ខាងកើតទល់នឹង លោក ទេព វុទ្ធី
ខាងលិចទល់នឹង ៥០០ម៉ែត ពីដៃអូរទឹកសាប
លិខិតសរសេរផ្ទាល់ដៃ លោក អ៊ួង និត ជាអតីតចៅសង្កាត់រងទី១ នៃសង្កាត់កោះរ៉ុង បានបង្ហាញថា លោក សុខ ប៊ុន បានទិញដីពីឈ្មោះ ម៉ា ទី ដែលមានទំហំ ៥ហិកតារ ២៥អា មានទទឹង ១០៥ម៉ែត្រ និងបណ្តោយ ៥០០ម៉ែត្រ គឺមានផ្ទៃសរុបចំនួន ៥២.៥០០ម៉ែត្រការ៉េតែប៉ុណ្ណោះ។ លោក អ៊ួង និត អះអាងក្នុងលិខិតបំភ្លឺថា ដីក្រៅពីនោះ គឺជាដី របស់ប្រជាពលរដ្ឋផ្សេងទៀតរស់នៅជិតខាងក្នុងមូលដ្ឋាននេះ។
អតីតចៅសង្កាត់រងទី១ សង្កាត់កោះរ៉ុង លោក អ៊ួង និត បានជម្រាបជូន លោក យន្ត មីន អភិបាលខេត្តព្រះសីហនុ ឲ្យដឹងបន្តទៀតថា ក្បាលដីពិតប្រាកដ របស់ លោក សុខ ប៊ុន ដែលលោកបានដឹង គឺមានទទឹង ១០៥ម៉ែត្រ និងបណ្តោយ ៥០០ម៉ែត្រ ឬស្មើ ៥ហិកតា និង២៥អា ប៉ុន្តែបែរជាកាលពីថ្ងៃទី២៦ ខែមីនា ឆ្នាំ២០១៨ លោកបានឃើញឯកសារដី លោក សុខ ប៊ុន មានទំហំលើសពី ៥ហិកតារ ២៥អា ដោយទំហំដីមានបណ្តោយ ៥០០០ម៉ែត្រ និងទទឹង ១០៥០ម៉ែត្រ ឬមានផ្ទៃដីសរុប ៥.២៥០.០០០ម៉ែត្រការ៉េទៅវិញ។
ត្រង់ចំណុចនេះ លោក អ៊ួង និត បានអះអាងថា ឯកសារទំហំដី របស់ លោក សុខ ប៊ុន ដែលលោកបានឃើញ កាលពីថ្ងៃទី២៦ ខែមីនា ឆ្នាំ២០១៨ មានទំហំដីរហូតដល់បណ្តោយ ៥០០០ម៉ែត្រ និងទទឹង ១០៥០ម៉ែត្រ ដោយមានផ្ទៃដីសរុបចំនួន ៥.២៥០.០០០ម៉ែត្រការ៉េ គឺមិនពិតប្រាកដ ឬមិនត្រឹមត្រូវនោះទេ។
នៅចុងបញ្ចប់លិខិត ដែលលោក អ៊ួង និត បានសរសេរផ្ទាល់ដៃ ជម្រាបជូន លោក យន្ត មីន អភិបាលខេត្តព្រះសីហនុ អតីតចៅសង្កាត់កោះរ៉ុងរូបនេះ បានធ្វើការបដិសេធន៍ និងមិនទទួលស្គាល់លិខិតបញ្ជាក់ដីលេខ ៦៩ក.រ ចុះថ្ងៃទី១៨ ខែធ្នូ ឆ្នាំ២០០២ ជាការទិញ និងលក់ដី របស់ លោក សុខ ប៊ុន ជាមួយ លោក ម៉ា ទី ដែលមានបណ្តោយ ៥០០០ម៉ែត្រ និងទទឹង ១០៥០ម៉ែត្រ ហើយមានផ្ទៃដីសរុប ៥.២៥០.០០០ម៉ែត្រការ៉េជាដាច់ខាត។ លោក អ៊ួង និត បានអះអាថា លោកទទួលស្គាល់ដីមានទំហំត្រឹមទទឹង ១០៥ម៉ែត្រ និងបណ្តោយ ៥០០ម៉ែត្រ ដោយមានផ្ទៃដីសរុបចំនួន ៥២៥០០ម៉ែត្រការ៉េតែប៉ុណ្ណោះ។
ផ្តើមពីបញ្ហានេះ លោក អ៊ួង និត អតីតចៅសង្កាត់រងទី១ ហើយក៏ជាអតីតចៅសង្កាត់កោះរ៉ុងទើបផុតអាណត្តិផងនោះ ក៏បានជម្រាបជូន លោក យន្ត មីន អភិបាលខេត្តព្រះសីហនុ និងប្រជាពលរដ្ឋ ឲ្យបានដឹងអំពីប្រវត្តិ នៃការទិញ និងលក់ ដី របស់លោក សុខ ប៊ុន ជាមួយលោក ម៉ា ទី កាលពីឆ្នាំ២០០២ នៅភូមិដើមព្រែកស្វាយ សង្កាត់កោះរ៉ុង ក្រុង-ខេត្តព្រះសីហនុ ដោយក្តីអនុគ្រោះ។
ទាក់ទិនបញ្ហាដីធ្លីខាងលើនេះដែរ ក្រុមការងារវាស់វែងនៅលើសង្កាត់កោះរ៉ុង ដែលបានចុះវាស់វែងដី របស់ លោក សុខ ប៊ុន ស្ថិតនៅភូមិព្រែកស្វាយ សង្កាត់កោះរ៉ុង ក្រុង-ខេត្តព្រះសីហនុ ដែលមានសមាសភាពចូលរួមនៅទីតាំងដីជាក់ស្តែងរួមមាន៖
១- លោក យ៉ុន ម៉ុន ជាប្រធានក្រុមវាស់ (ប្រជាពលរដ្ឋភូមិព្រែកស្វាយ)
២- លោក កែវ សោម សមាជិកវាស់វែង (ប្រជាពលរដ្ឋភូមិព្រែកស្វាយ)
៣- លោក យ៉ៃ ថេង សមាជិកវាស់វែង (ប្រជាពលរដ្ឋភូមិព្រែកស្វាយ)
៤- លោក ចាន់ សារិន សមាជិកវាស់វែង (ប្រជាពលរដ្ឋភូមិព្រែកស្វាយ)
៥- លោក ហែម សាឡេះ សមាជិកវាស់វែង (ប្រជាពលរដ្ឋភូមិព្រែកស្វាយ)
៦- លោក សេក សារ៉ន សមាជិកវាស់វែង (ប្រជាពលរដ្ឋភូមិព្រែកស្វាយ)
សមាសភាពចុះវាស់វែងដីនៅលើសង្កាត់កោះរ៉ុង របស់លោក សុខ ប៊ុន ដូចបានបង្ហាញឈ្មោះ ខាងលើនេះ ពួកគាត់ ក៏បានសរសេរលិខិតបដិសេធន៍ និងមិនទទួលស្គាល់ លើការវាស់វែងទំហំដីលេខ ៦៩ក.រ របស់លោក សុខ ប៊ុន ដែលចុះថ្ងទី១៨ ខែធ្នូ ឆ្នាំ២០០២នេះដែរ។
សមាជិកចុះវាស់វែងដីទាំង ៦នាក់ បានឲ្យដឹងថា ការចុះវាស់វែងដី របស់លោក សុខ ប៊ុន ស្ថិតនៅភូមិព្រែកស្វាយ សង្កាត់កោះរ៉ុង ក្រុង-ខេត្តព្រះសីហនុ ហើយយោងតាមការចុះវាស់វែងដីជាក់ស្តែង គឺទីតាំងពិតប្រាកដដី របស់លោក សុខ ប៊ុន ពេលនោះ គឺមានទទឹងប្រវែង ១០៥ម៉ែត្រ និងបណ្តោយ ៥០០ម៉ែត្រ ដោយមានទំហំសរុប ៥២៥០០ម៉ែត្រការ៉េគត់។ ក្នុងនោះព្រំទីតាំងដីរួមមាន៖
ខាងជើងទល់នឹង ឆ្នេរថ្មសមុទ្រ ១០៥ម៉ែត្រ
ខាងត្បូងទល់នឹង ចង្កេះភ្នំថ្មជញ្ជាំង
ខាងកើតទល់នឹងដីលោក ទេព វុទ្ធី
ខាងលិចទល់នឹង ៥០០ម៉ែត្រ ពីដៃអូរទឹកសាបជាប់ដី ជី វិស័យ និងពីកូនកោះដូង។
យ៉ាងណាក៏ដោយចុះ លិខិតសរសេរដោយដៃ ដែលក្រុមសមាជិកចុះវាស់វែងដី របស់លោក សុខ ប៊ុន មានសមាសភាពចំនួន ៦នាក់ គឺបានធ្វើការបដិសេធន៍ទាំងស្រុងលើលិខិតស្មាម ដែលមានខ្លឹមសារខុសពីទិន្នន័យដី ដែលមានទីតាំង ខុសពីគំនូសប្លង់ ទីតាំង ដែលពួកគេ បានចុះវាស់វែង ដូចបានភ្ជាប់រូបភាព ឬគំនូសប្លង់ នៅផ្នែកខាងឆ្វេង នៃលិខិតបដិសេធន៍នេះជាភស្តុតាងស្រាប់។
បន្ថែមលើនេះ សមាសភាពទាំង ៦នាក់ ដែលជាក្រុមការងារវាស់វែងដី នៅភូមិដើមស្វាយ សង្កាត់កោះរ៉ុង ក្រុង-ខេត្តព្រះសីហនុ តាមការចង្អុលបង្ហាញ របស់ ក្រសួងដែនដី នគរូបនីយកម្ម និងសំណង់ ក៏បានផ្តិតមេដៃស្តាំ នៅលើលិខិត ចុះថ្ងៃទី២៧ ខែមីនា ឆ្នាំ២០១៨ ដើម្បី ទុកជាភស្តុតាងនៅថ្ងៃខាងមុខផងដែរ។
ទាក់ទិនបញ្ហានេះ អ្នកស្រី ជាប សុធារី អ្នកសម្របសម្រួលសមាគមអាដហុក(Adhoc) ប្រចាំខេត្តព្រះសីហនុ ដែលបានតាមដានវិវាទដីធ្លី រវាងប្រជាពលរដ្ឋចំនួន ៤២គ្រួសារ មានទំនាស់ជាមួយលោក សុខ ប៊ុន ប៉ុន្មានថ្ងៃមកនេះ។ អ្នកស្រី ក៏បានស្នើដល់ថ្នាក់ដឹកនាំក្រសួងស្ថាប័នពាក់ព័ន្ធ ឲ្យជួយមានវិធានការផ្លូវច្បាប់ឲ្យបានធ្ងន់ធ្ងរ ចំពោះបុគ្គលទាំងឡាយណា ដែលបានក្លែងបន្លំឯកសារប៉ងរំលោភយកដីធ្លី របស់ប្រជាពលរដ្ឋទាំង ៤២គ្រួសារ មានទីតាំងនៅភូមិព្រែកស្វាយ សង្កាត់កោះរ៉ុង ដើម្បីផ្តល់យុត្តិធ៌មជូនពួកគាត់។
អ្នកស្រី សង្គត់ធ្ងន់ថា បុគ្គលទាំងឡាយណា ដែលបានក្លែងបន្លំឯកសារច្បាប់ ឬឯកសាររដ្ឋបាលផ្សេងៗ ត្រូវនាំជនខិលខូចទាំងនោះ ឲ្យទទួលខុសត្រូវចំពោះមុខច្បាប់ ដើម្បីជាការព្រមានកុំឲ្យបុគ្គលខិលខូចមួយចំនួននោះ ដើរធ្វើទុក្ខបុកម្នេញ ដល់ប្រជាពលរដ្ឋ ជាពិសេសជនក្រីក្រខ្វះខ្នងបង្អែកជាបន្តទៀតនៅថ្ងៃខាងមុខ។
អ្នកស្រី ជាប សុធារី បញ្ជាក់ថា ចំពោះការកាន់កាប់ដីនៅភូមិព្រែកស្វាយ សង្កាត់កោះរ៉ុង បើពិនិត្យទៅលើឯកសារ របស់ប្រជាពលរដ្ឋទាំង ៤២គ្រួសារ ដែលបានដាក់លិខិតជូន ចៅសង្កាត់កោះរ៉ុង និងអភិបាលខេត្តព្រះសីហនុ ដើម្បីស្នើឲ្យជួយអន្តរាគមន៍ទៅបុគ្គលឈ្មោះ សុខ ប៊ុន មានទីលំនៅអចិន្ត្រៃយ៍នាទីក្រុងភ្នំពេញ គឺពលរដ្ឋទាំង ៤២គ្រួសារ មានលិខិតរដ្ឋបាលកាន់កាប់ដីធ្លីទទួលស្គាល់ពីអាជ្ញាធរមូលដ្ឋាន និងមានពលរដ្ឋខ្លះ បានរស់នៅលើដីជាក់ស្តែងត្រង់ចំណុចពយតាផេង -ពយអាពត និងតំបន់ភ្នំថ្មជញ្ជាំង ស្ថិតនៅភូមិព្រែកស្វាយ សង្កាត់កោះរ៉ុងជារហូតមក។ ពិសេសជាងនេះ អ្នកស្រី សុធារី បានកត់សម្គាល់ថា ប្រជាពលរដ្ឋទាំង ៤២គ្រួសារ ពួកគាត់ មានដាំដំណាំកសិកម្មហូបផ្លែមួយចំនួននៅលើដីនោះមានដូចជា៖ ដើមដូង ស្វាយ ខ្នុរ និងស្វាយចន្ទីជាដើម ដោយមានអាជ្ញាធរមូលដ្ឋានទទួលស្គាល់ថែមទៀត។
ចំណែកប្រជាពលរដ្ឋទាំង ៤២គ្រួសារ នៅភូមិព្រែកស្វាយ សង្កាត់កោះរ៉ុង ដែលព្រួយបារម្ភខ្លាចបាត់បង់ដីចំការ និងដីលំនៅឋាន ក៏បានសំណូពរឲ្យ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជួយបញ្ជូនមន្ត្រីចុះពិនិត្យទៅលើសកម្មភាព របស់លោក សុខ ប៊ុន និងបក្សពួក ដែលបានឃុបឃិតក្លែងឯកសារប៉ុនប៉ងរំលោភយកដីចំការ និងដីលំនៅឋានរបស់ពួកគាត់ ដែលមានអ្នកខ្លះធ្លាប់រស់នៅតាំងពីសម័យសង្គមរាស្ត្រនិយមមកម្ល៉េះ។
កង្វល់ខាងលើនេះ កាលពីថ្ងៃទី២៦ ខែមីនា ឆ្នាំ២០១៨ ប្រជាពលរដ្ឋទាំង ៤២គ្រួសារ ក៏បានដាក់ពាក្យបណ្តឹងសុំអន្តរាគមន៍ ទៅលោក សេង ហ៊ួលៀង ចៅសង្កាត់កោះរ៉ុង និងលោក យន្ត មីន អភិបាលខេត្តព្រះសីហនុ ស្នើឲ្យជួយអន្តរាគមន៍ទៅឈ្មោះ សុខ ប៊ុន និងក្រុមការងារក្រសួងរៀបចំដែនដី ដឹកនាំដោយ លោក សួន សូផា ដែលបាននាំយកម៉ាស៊ីន ជីភីអេស (GPS) យកទៅចុចវាស់លើបរិវេណដីធ្លីពួកគាត់កំពុងកាន់កាប់ កាលពីថ្ងៃទី២២ ខែមីនា ឆ្នាំ២០១៨ នៅចំណុចពយតាផេង -ពយអាពត និងចំណុចភ្នំថ្មជញ្ជាំង ស្ថិតនៅភូមិព្រែកស្វាយ សង្កាត់កោះរ៉ុង ក្រុង-ខេត្តព្រះសីហនុ។
លិខិតដាក់ជូនចៅសង្កាត់កោះរ៉ុង និងអភិបាលខេត្តព្រះសីហនុ ប្រជាពលរដ្ឋទាំង ៤២គ្រួសារ បានបញ្ជាក់ថា ពួកគាត់មានកិច្ចសន្យាផ្ទេរសិទ្ធិកាន់កាប់ដី ចុះថ្ងៃទី១៨ ខែមីនា ឆ្នាំ២០១៣ និងពាក្យស្នើសុំកាន់កាប់ប្រើប្រាស់ដី ចុះថ្ងៃទី៦ ខែតុលា ឆ្នាំ២០០៨ ចុះហត្ថលេខាដោយ លោក អ៊ួង និត អតីតចៅសង្កាត់កោះរ៉ុងស្របច្បាប់។ មានសាលាកប័ត្រព័ត៌មាន ចុះថ្ងៃទី១២ ខែ សីហា ឆ្នាំ២០១៥ និងអត្តសញ្ញាណប័ណ្ណសញ្ជាតិខ្មែរត្រឹមត្រូវស្របច្បាប់។
ប្រជាពលរដ្ឋខ្លះ ឲ្យដឹងថា ពួកគាត់បានមករស់នៅលើកោះរ៉ុង ដែលត្រូវ ឈ្មោះ សុខ ប៊ុន ដែលមានងារជាឧកញ៉ា និងបក្សពួកឃុបឃិតក្លែងឯកសារប៉ុនប៉ងរំលោភយកដីធ្លីនៅភូមិព្រែកស្វាយ គឺមានពលរដ្ឋខ្លះធ្លាប់រស់នៅលើដីនោះ តាំងពីសម័យសង្គមរាស្ត្រនិយមមកម្ល៉េះ។ កាលណោះពួកគាត់បានប្រកបរបរនេសាទត្រី ធ្វើចំការដោយដាំដំណាំកសិកម្មមួយចំនួនលើដីនោះរួមមាន៖ ដំណាំដូង ស្វាយ ខ្នុរ និងស្វាយចន្ទីរជាដើម ដើម្បីចិញ្ចឹមជីវិតគ្រួសារ។
ជាបន្តបន្ទាប់មកទៀត គឺនៅក្រោយសម័យសង្គ្រាម ឆ្នាំ១៩៧៩ បានបញ្ចប់ មានពលរដ្ឋខ្លះ ដែលជាម្ចាស់ដីដើម ក៏បានមករស់នៅ និងកាន់កាប់ដីចំការរៀងៗខ្លួន ដោយមានអាជ្ញាធរមូលដ្ឋានភូមិសង្កាត់និងក្រុងព្រះសីហនុទទួលស្គាល់មកដល់បច្ចុប្បន្ននេះ។
ពិសេសជាងនេះប្រជាពលរដ្ឋទាំង ៤២គ្រួសារ បានអះអាងថា ដីលំនៅឋាន និងដីចំការ របស់ពួកគាត់ ត្រូវបានមន្ត្រីស្ថាប័នជំនាញ នៃក្រុមការងារថ្នាក់ជាតិ មានក្រសួងរៀបចំដែនដីនគរូបនីយកម្ម និងសំណង់ ព្រមទាំងមន្ត្រីពាក់ព័ន្ធ នៃរដ្ឋបាលខេត្តព្រះសីហនុ បានចុះវាស់វែងកំណត់ក្បាលដីត្រៀមចេញបណ្ណកម្មសិទ្ធិ និងបានប្រកាសបិទផ្សាយទិន្នន័យក្បាលដីជាសាធារណៈ នូវឯកសារសុរិយោដី ប្លង់សុរិយោដី និងបញ្ជីឈ្មោះអ្នកកាន់កាប់ដី ដែលក្រុមការងារបច្ចេកទេស បានចុះបញ្ជីដីធ្លី និងបានចុះវាស់វែងប្រមូលទិន្នន័យក្បាលដីរួចរាល់ ដោយអនុវត្តស្របតាមនីតិវិធីច្បាប់ត្រឹមត្រូវ។
ជាងនេះទៀត ខាងមន្ត្រីជំនាញក្រសួងរៀបចំដែនដី ក៏បានទុកពេល ១៥ថ្ងៃ សម្រាប់ផ្តល់ឱកាស ជូនអ្នកពាក់ព័ន្ធ ដើម្បីធ្វើការតវ៉ា ចាប់ពីថ្ងៃទី១៤ ខែកក្កដា ដល់ថ្ងៃទី២៨ ខែកក្កដា ឆ្នាំ២០១៧ ប៉ុន្តែមិនឃើញឈ្មោះ សុខ ប៊ុន ចេញមុខមកតវ៉ានោះទេ។
ប្រជាពលរដ្ឋឲ្យដឹងថា ពួកគាត់មានការភ្ញាក់ផ្អើល ចំពោះសកម្មភាព របស់ លោក សុខ ប៊ុន និងក្រុមការងារក្រសួងរៀបចំដែនដី ដឹកនាំដោយ លោក សួន សូផា ដែលបាននាំយកម៉ាស៊ីន ជីភីអេស (GPS) យកមកចុចវាស់វែងដី នៅលើទីតាំងបរិវេណដី របស់ប្រជាពលរដ្ឋពួកគាត់កំពុងរស់នៅ និងអាស្រ័យផល កាលថ្ងៃទី២២ ខែមីនា ឆ្នាំ២០១៨។
ផ្តើមពីបញ្ហានេះ ប្រជាពលរដ្ឋទាំង ៤២គ្រួសារ បានសំណូមពរដល់ លោក យន្ត មីន អភិបាលខេត្តព្រះសីហនុ លោក ជា សុផារ៉ា រដ្ឋមន្ត្រីក្រសួងរៀបចំដែនដី ជាពិសេស សម្តេចតេជោ ហ៊ុន សែន ឲ្យជួយមានវិធានការផ្លូវច្បាប់ទៅលើបុគ្គលឈ្មោះ សុខ ប៊ុន និងបក្សពួក ដែលបានឃុបឃិតក្លែងឯកសារប៉ុនប៉ងរំលោភយកដីធ្លី របស់ពួកគាត់ មានទីតាំងនៅភូមិព្រែកស្វាយ សង្កាត់កោះរ៉ុង ដោយអនុគ្រោះផង។
បន្ថែមលើនេះ ក្រុមប្រជាពលរដ្ឋក៏ស្នើដល់ថ្នាក់ដឹកនាំក្រសួងស្ថាប័នពាក់ព័ន្ធ មានស្ថាប័នតុលាការជាដើម ឲ្យជួយមានវិធានការផ្លូវច្បាប់ ទៅលើឈ្មោះ សុខ ប៊ុន ដែលបានឃុបឃិតក្លែងឯកសារកាន់កាប់ដី នៅភូមិដើមស្វាយ សង្កាត់កោះរ៉ុង ដើម្បីកុំឲ្យបុគ្គលរូបនេះ ដើរធ្វើព្យុះភ្លៀង ឬដើរធ្វើទុក្ខបុកម្នេញប្រជាពលរដ្ឋក្រីក្រនៅថ្ងៃខាងមុខទៀត។
បញ្ហានេះដែរ លោក យន្ត មីន អភិបាលខេត្តព្រះសីហនុ បានបំភ្លឺតាមបណ្តាញសង្គម WhatsApp ដោយ ស្នើឲ្យប្រជាពលរដ្ឋទាំង ៤២គ្រួសារ កុំព្រួយបារម្ភពីការបាត់បង់ដីធ្លី របស់ខ្លួននៅភូមិព្រែកស្វាយ សង្កាត់កោះរ៉ុងនោះអី ព្រោះរឿងនេះ រូបលោកនឹងពិនិត្យដោះស្រាយជូនបងប្អូនទាំង ៤២គ្រួសារ មិនឲ្យបាត់បង់ដីធ្លី របស់បងប្អូនប្រជាពលរដ្ឋនោះទេ។ លោកអភិបាលបន្តថា ករណីខាងលើនេះ ខាងក្រសួងដែនដី ក៏មិនទាន់សម្រេចថា នឹងធ្វើការឆ្វៀលបរិវេណដីនោះទៅឲ្យបុគ្គលណាមួយនោះទេ។ ដូច្នេះលោក ស្នើឲ្យបងប្អូនប្រជាពលរដ្ឋ ទាំង ៤២គ្រួសារ ស្ងប់អារម្មណ៍ និងរក្សាភាពស្ងប់ស្ងាត់ជាធម្មតា ហើយងាកមកពង្រីករបរទទួលទាន ឲ្យបានរិកចម្រើនគ្រប់ក្រុមគ្រួសារ។ ជាពិសេសងាកមកចូលរួមសប្បាយរីករាយ និងអបអរសាទរពិធិបុណ្យចូលឆ្នាំថ្មីប្រពៃណីខ្មែរ ដែលនឹងចូលមកដល់នៅពាក់កណ្តាលខែមេសាខាងមុខ។
បន្ថែមលើនេះ លោក យន្ត មីន អភិបាលខេត្តព្រះសីហនុ ក៏ឆ្លៀតជូនពរប្រជាបលរដ្ឋទាំង ៤២គ្រួសារ រស់នៅភូមិព្រែកស្វាយ សង្កាត់កោះរ៉ុង ក៏ដូចជាប្រជាពលរដ្ឋរស់នៅខេត្តព្រះសីហនុ និងទូទាំងប្រទេសកម្ពុជាទាំងមូល សូមឲ្យមានសំណាងល្អគ្រប់ៗគ្នា នាឱកាសពិធិបុណ្យចូលឆ្នាំថ្មីឆ្នាំនេះ។
យ៉ាងណាក៏ដោយចុះ អ្នកយកព័ត៌មានគេហទំព័រ CEN.COM.KH ប្រចាំខេត្តព្រះសីហនុ មិនទាន់អាចរកប្រភពទាក់ទង លោក សុខ ប៊ុន ដើម្បីបំភ្លឺជុំវិញការចោទប្រកាន់ របស់ប្រជាពលរដ្ឋទាំង ៤២គ្រួសារ ដែលចោទលោកថា បានក្លែងឯកសារប៉ងរំលោភយកដីធ្លី របស់ពួកគាត់បានទេ នៅថ្ងៃទី៣០ ខែមីនា ឆ្នាំ២០១៨។
ទាក់ទិនវិវាទខាងលើនេះ យោងតាមឯកសារចុះថ្ងៃទី២១ ខែមីនា ឆ្នាំ២០១៨ របស់ ក្រសួងរៀបចំដែនដី នគរូបនីយកម្ម និងសំណង់ មានចុះហត្ថលេខា និងបោះត្រា លោក លឹម វ៉ាន់ រដ្ឋលេខាធិការក្រសួងរៀបចំដែនដី ផ្ញើជូន លោក យន្ត មីន អភិបាលខេត្តព្រះសីហនុ បង្ហាញថា ក្រសួង បានឯកភាពជាគោលការណ៍បង្កើតក្រុមការងារចុះពិនិត្យវាស់វែងក្បាលដីទំហំ ៥.២៥០.០០០ម៉ែត្រការ៉េ របស់ឈ្មោះ សុខ ប៊ុន ស្ថិតនៅភូមិព្រែកស្វាយ សង្កាត់កោះរ៉ុង ក្រុង-ខេត្តព្រះសីហនុ។
លិខិតដដែលនេះក្រសួង បានស្នើឲ្យ អភិបាលខេត្តព្រះសីហនុ ចាត់មន្ត្រីជំនាញពាក់ព័ន្ធឲ្យចូលរួមអនុវត្តតាមខ្លឹមសារខាងលើនេះឲ្យមានប្រសិទ្ធភាព។
ចំពោះសំណើខាងលើនេះ ក្រសួងរៀបចំដែនដី បានចាត់ឲ្យ លោក សួន សូផា ដឹកនាំក្រុមការងារចុះសហការអនុវត្តការងារវាស់វែងទំហំផ្ទៃដីខាងលើ ជាមួយអាជ្ញាធរស្ថាប័នពាក់ព័ន្ធ នៃរដ្ឋបាលខេត្តព្រះសីហនុ នៅថ្ងៃទី២២ ខែមីនា ឆ្នាំ២០១៨ឲ្យទទួលជោគជ័យ។
ទោះជាបែបនេះក្តី លិខិតអន្តរាគមន៍ ឬសំណើ របស់ក្រសួងរៀបចំដែនដីខាងលើនេះ ត្រូវបានសមាសភាព នៃក្រុមការងារចុះវាស់វែងដីនៅភូមិព្រែកស្វាយ សង្កាត់កោះរ៉ុងចំនួន ៦នាក់ បានចេញលិខិតបដិសេធន៍ និងមិនទទួលស្គាល់ លើការវាស់វែងទំហំដីលេខ ៦៩ក.រ របស់លោក សុខ ប៊ុន ចុះថ្ងទី១៨ ខែធ្នូ ឆ្នាំ២០០២ ថាមានក្បាលដីទំហំ ៥.២៥០.០០០ម៉ែត្រការ៉េ មានទីតាំងនៅភូមិព្រែកស្វាយ សង្កាត់កោះរ៉ុង ក្រុង-ខេត្តព្រះសីហនុខាងលើនេះទេ។
គួររំលឹកថា លោកឧកញ៉ា សុខ ប៊ុន អគ្គនាយក្រុមហ៊ុនសុខប៊ុនគ្រុប កាលពីថ្ងៃទី១៨ ខែកក្កដា ឆ្នាំ២០១៥ ធ្លាប់ត្រូវបានសាលាដំបូងរាជធានីភ្នំពេញ ចាប់ដាក់គុកម្តងរួចមកហើយ ពីបទប្រើហិង្សាដោយចេតនាមានស្ថានទម្ងន់ទោស ដោយសារបុគ្គលរូបនេះ និងអង្គរក្ស បានរួមគ្នាវាយទាត់ធាក់ទៅលើអតីតពិធីការីនីទូរទស្សន៍ CTN គឺ កញ្ញា ឯក សុជាតា ហៅ សាសា យ៉ាងសាហាវព្រៃផ្សៃ នៅក្នុងភោជនីយដ្ឋានមួយកន្លែងក្នុងរាជធានីភ្នំពេញ៕ ដែន សីមា