បងប្រុសបង្កើតរបស់ខ្មាន់កាំភ្លើង ដែលបានធ្វើការបាញ់ប្រហារលើការប្រគំតន្ត្រីនៅក្នុងទីក្រុង Las Vagas កន្លងទៅ ត្រូវបានប៉ូលីសចាប់ខ្លួន និងធ្វើការចោទប្រកាន់នៅថ្ងៃពុធកន្លងទៅ ពីបទរក្សាទុករូបអាសអាភាសកុមារជាច្រើនសន្លឹក។
បើតាមសេចក្តីប្រកាសនាយកដ្ឋានប៉ូលីសក្រុង Los Angeles បានឲ្យដឹងថា ជនជាប់ចោទ Bruce Paddock អាយុ ៥៩ឆ្នាំ ត្រូវបានចាប់ខ្លួន និងចោទប្រកាន់ពីបទរក្សាទុករូបភាពអាសអាភាសរបស់កុមារជាង ៦០០សន្លឹក នឹងចោទពីបទគេងប្រវ័ញ្ចផ្លូវភេទលើកុមារ ១៩ករណីទៀត។
Bruce Paddock គឺជាបងប្រុសរបស់ Stephen Paddock ដែលជាខ្មាន់កាំភ្លើងបានបាញ់សម្លាប់មនុស្សចំនួន ៥៨នាក់ និងធ្វើឲ្យមនុស្សរងរបួសរាប់រយនាក់ នៅពេលគាត់បាញ់រះលើកន្លែងប្រគំតន្ត្រីមួយកន្លែងកាលពីដើមខែតុលានេះ។
បើតាមឯកសាររបស់តុលា ជនជាប់ចោទ Bruce Paddock ត្រូវបានចាប់ខ្លួននៅក្នុងទីក្រុង Los Angeles ៣ដងមកហើយ ហើយត្រូវបានចោទប្រកាន់ពីបទល្មើសច្រើនករណី រួមមាន ចោរកម្ម និងការបំផ្លិចបំផ្លាញ៕ ដោយ ៖សុភ័ក្ត្រ