កោះកុង ៖ ដោយសារជម្លោះក្នុងគ្រួសារ ប្អូនថ្លៃប្រុសបានយកក្តាបន្ទះបោកខោអាវ វាយបងថ្លៃចំចិញ្ចើម ស្លាប់ភ្លាមៗនៅកន្លែងកើតហេតុកាលពីវេលាម៉ោង៥ និង១០នាទីល្ងាច ត្រូវនឹងថ្ងៃទី២៩ ខែមីនា ឆ្នាំ២០១៨ នៅភូមិស្រែអំបិល ឃុំស្រែអំបិល ស្រុកស្រែអំបិល ខេត្តកោះកុង។ នគរបាលមូលដ្ឋានស្រុកស្រែអំបិល បានឲ្យដឹងនៅថ្ងៃទី៣០ខែមីនាឆ្នាំ២០១៨។
ករណីឃាតកម្មនេះ បង្កឡើងដោយឈ្មោះ គេត វ៉ាត ភេទប្រុស អាយុ ៥៤ឆ្នាំ បានធ្វើសកម្មភាព យកបន្ទះក្ដារ ជាប្រភេទក្ដារបោកខោអាវ វាយទៅលើជនរងគ្រោះឈ្មោះ ពេជ្រ គា ភេទប្រុស អាយុ៤៣ឆ្នាំ ត្រូវជាសាច់ថ្លៃនឹងគ្នា និងរស់នៅក្នុងផ្ទះជាមួយគ្នា ត្រូវត្រង់កន្លែងចិញ្ចើម បណ្តាលឲ្យស្លាប់ នៅនឹងកន្លែង រួចជនសង្ស័យបានរត់គេចខ្លួនបាត់។
តាមការបំភ្លឺពីអ្នកជិតខាង គ្រួសារទាំងពីរតែងតែមានទំនាស់គ្នាជាញឹកញាប់។ ក្រោយធ្វើកោសល្យវិច័យរួច សពប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី ។
ករណីនេះកម្លាំងជំនាញយើង កំពុងធ្វើការស្រាវជ្រាវ ចាប់ខ្លួនជនសង្ស័យ យកមកផ្តន្ទាទោសតាមច្បាប់៕ ដោយ៖បញ្ញាស័ក្តិ