ភ្នំពេញ-ចាងហ្វាងផលិតកម្មមហាហង្សបានផ្ទុះប្រតិកម្មភ្លាមៗ ក្រោយមានបុគ្គលិករបស់ខ្លួនម្នាក់ សរសេរហែកកេរ្តិ៍រឿងលុយកាក់ ដែលខាងផលិតកម្មមហាហង្ស មិនទាន់បើកប្រាក់ខែឲ្យ ចាប់តាំងពីចុងឆ្នាំ២០១៧មក។
លោក អ៊ិន សុភិន ម្ចាស់ផលិតកម្មខាងលើបាននិយាយថា នេះជារឿងយល់ច្រឡំ ហើយបុគ្គលិករូបនេះ បានសុំទោសភ្លាមៗបន្ទាប់ពីលោកចេញប្រតិកម្ម។ផលិតកររូបនេះបានបញ្ជាក់ថា៖ ”គាត់អត់បានកត់ចំណាំខ្លួនឯងច្បាស់លាស់ពីការបើកមុន ឬក្រោយ ដល់ចឹងទៅគាត់យល់ថាមិនទាន់បើកឱ្យគាត់។ នេះជារឿងយល់ច្រឡំនឹង ដល់ខ្ញុំប្រតិកម្ម ទើបគាត់សុំទោស”។
ក្រោយប្រតិកម្មភា្លមៗពីម្ចាស់ផលិតកម្ម បុគ្គលិករូបនោះ បានសរសេរសុំទោសវិញដោយលើកឡើងថា ខ្ញុំ ជន សុជាតិ ខ្ញុំបាទសុំទោសដែលខ្ញុំបាទបានផុសកន្លងមក ដែលយកផលិតកម្ម (មហាហង្ស) មកលេងសើច ដែលធ្វើអោយប៉ះពាល់ដល់កិត្តិយសផលិតកម្មមហាហង្ស ហើយខ្ញុំមានវិប្បដិសារី ដែលបានធ្វើកំហុសដ៍ធំនេះ នេះជាការយល់ខុស និងច្រលំរបស់ខ្ញុំបាទទេ ហើយសូមសន្យាថា មិនអោយមានរឿងបែបនេះ កើតឡើងជាដាច់ខាត។ សូមទទួលការគោរពដ៏ខ្ពង់ខ្ពស់អំពីខ្ញុំបាទ”។
សូមរំលឹកថា នៅមុនប្រកាសសុំទោសជាសាធារណៈលោក ជន សុជាតិ បានសរសេរបង្ហោះថា សួស្តីផលិតកម្មមហាហ្ស តើក្រុមហ៊ុនចំណាយលុយច្រើនណាស់មែនទេ សម្រាប់ថតរឿង បានជាខ្វះលុយបើកអោយខ្ញុំត្រឹមតែ៤៥០$ សុំទោសខ្ញុំមិនចង់ធ្វើបែបនេះទេ តែតាំងពីខែមិថុនា ឆ្នាំ២០១៧ រហូតមកទល់នឹងឆ្នាំ២០១៨ ខែមីនា ថ្ងៃទី២៨ហើយ ពេលដែលខ្ញុំទៅបើកលុយម្ដងៗ បុគ្គលិកឆ្លើយដោះសាររហូត…”។
លោក អ៊ិន សុភិន ទទួលស្គាល់ថា កន្លងទៅផលិតកម្ម របស់ខ្លួនពិតជាមានការយឺតយ៉ាវខ្លះៗមែនពីរឿងប្រាក់ខែ ព្រោះតែបណ្ដាស្ថានីយទូរទស្សន៍ខ្លះបានទិញរឿងផលិតកម្ម មហាហង្សមានការយឺតយ៉ាវដូចគ្នាទើបលោក បន្តយឺតដែរក្នុងការបើកប្រាក់ខែនេះ។ ក៏ប៉ុន្តែមិនបានយឺតដូចការលើកឡើងពីសំណាក់លោក ជន សុជាតិ រហូតតាំងពីខែ មិថុនា ឆ្នាំ២០១៧នោះទេ៕ ដោយ-គីមស្រីរ័ត្ន