ក្រុមសិល្បៈករ សិល្បការិនីប្រមាណ ១០០នាក់នឹងពួតដៃគ្នា ធ្វើឱ្យព្រឹត្តិការណ៍សង្ក្រានពោធិ៍សែនជ័យឆ្នាំនេះ កក្រើកជាងបណ្ដាឆ្នាំមុនៗ។ ក្រុមសិល្បករ សិល្បការិនីទាំងអស់បានបញ្ជាក់ថាពួកគេបានត្រៀមខ្លួនរួចរាល់អស់ហើយ ដើម្បីធ្វើយ៉ាងណា ញ៉ាំងក្នុងវិធីទាំងមូលកាន់តែសប្បាយរីករាយ នាចុងខែមីនានេះ។
លោកផាត់ តារារដ្ឋ ស្ថាបនិក ”គ្រួសារតារាកម្ពុជា” ដែលជាអ្នកគៀងគរមិត្តសិល្បករ សិល្បៈការិនីចូលរួមព្រឹត្តិការណ៍នេះ បានលើក ឡើងថា ដោយយល់ឃើញថាកម្មវិធីមានសារសំខាន់ខ្លាំងទើបតារាម្នាក់ៗលះបង់ពេលវេលាផ្តាល់ខ្លួន ដោយមិនគិតប្រាក់ ដើម្បីចូលរួមកម្មវិធីមួយនេះ។
លោកថាមិត្តសិល្បៈករ សិល្បការិនីរួមមានដូចជា តារាចម្រៀងល្បីៗ តារាកំប្លែង ពិធីករពិធីការិនីឆ្នើមៗនិងតារាចម្រៀងមកពីកម្មវិធី Cambodian Idol , The Voice Cambodia, និងម្ចាស់បទ Original Song របស់ក្រុមខ្លួនរហូតដល់ជាង១០០នាក់ឯណោះ បានស្ម័គ្រចិត្តចូលរួមនៅក្នុងពិធីនេះ។ តារាទាំងនោះ ក៏បានត្រៀមខ្លួនបង្ហាញនូវទម្រង់វប្បធម៌សំខាន់ៗ បន្ថែមពីលើការច្រៀងសប្បាយៗ ដើម្បីអោយបងប្អូនបានរាំលេង។
ក្រៅតែពីការប្រគំតន្ត្រីរបស់មិត្តសិល្បករ ព្រឹត្តិការណ៍នេះក៏មានកម្មវិធីផ្សេងៗទៀតដូចជាការលែងល្បែងប្រជាប្រិយខ្មែរ ការតាំង ពិព័រណ៌ស្នាដៃកូនខ្មែរ ការប្រណាំងរទេះ ការបង្ហាញក្បាច់ប្រដាល់នៅលើសង្វៀន និងការប្រលងបវរកញ្ញាវ័យ៦០ឆ្នាំជា។ ព្រឹត្តិការណ៍សង្ក្រានក្នុងឆ្នាំនេះ ក៏រំពឹងថានឹងមានមនុស្សចូលរួមទស្សនាតាំងពីកម្មវិធីពេលព្រឹករហូតដល់យប់រំលងអាធ្រាតុយ៉ាងកកកុញផងដែរ ដោយសារតែទីតាំងនោះជាប្រជុំជនរោងចក្រ ជាពិសេសគឺក្រុមកម្មកររស់នៅតំបន់ចោមចៅតែម្ដង៕ ដោយ-គីម ស្រីរ័ត្ន