កំពង់ស្ពឺ ៖ មេខ្លោងចែកចាយគ្រឿងញៀន ដ៏សកម្មម្នាក់និងមុខសញ្ញាចែកចាយគ្រឿងញៀន ត្រូវបានបង្ក្រាបដោយនគរបាល នៅថ្ងៃទី២៩ខែមីនាឆ្នាំ២០១៨ វេលាម៉ោង១៩និង៣៥នាទីនៅចំណុចលើថ្នល់រទេះភ្លើង ភូមិតាំងស្រឡៅ ឃុំតាំងស្យា ស្រុកភ្នំស្រួច ។
កំលាំង នគរបាលអធិការដ្ឋានស្រុកភ្នំស្រួច បានចុះបង្ក្រាបមុខសញ្ញានិង ឃាត់ខ្លួន ជនសង្ស័យចំនួន ២នាក់ គឺ១ ឈ្មោះ ហូ ធានី ភេទប្រុស អាយុ៣៥ឆ្នាំ មានទីលំនៅភូមិព្រៃគុយ ឃុំត្រពាំងគង ស្រុកសំរោងទង មុខរបរមិនពិតប្រាកដ។
២ ឈ្មោះ ជា សុភា ភេទស្រី អាយុ២៨ឆ្នាំមានទីលំនៅមិនពិតប្រាកដ ស្នាក់នៅលើផ្លូវរថភ្លើង ភូមិតាំងស្រឡៅ ឃុំតាំងស្យា ស្រុកភ្នំ ស្រួច។ ដកហូតបានវត្ថុតាងរួមមាន ៖ គ្រឿងញៀនចំនួន ១៨ កញ្ចប់ មធ្យម០២ តូច១៦ ដែកកេះហ្គាស់ ០៦ ថង់សម្រាប់ច្រកគ្រឿង ញៀន០២ ដុំ កន្ត្រៃដែក ០២ ទុយោកែច្នៃសម្រាប់ច្រកគ្រឿងញៀន ០៣ ទូរស័ព្ទដៃចាស់ៗ ០៤ គ្រឿង លុយខ្មែរ ១៣ ០០០រៀល និងឧប្បករណ៍សំរាប់ជក់គ្រឿងញៀន មួយចំនួន។
ក្រោយសមត្ថកិច្ចសាកសួរជនសង្ស័យទាំងពីរ ជនសង្ស័យ បានឆ្លើយសារភាពថា ថ្នាំញៀនចំនួន ១៨ កញ្ចប់ ខ្លួនបានទិញ ពីឈ្មោះ ជឿង លីឃៀង ភេទប្រុស អាយុ ៣៥ឆ្នាំរស់នៅភូមិផ្សារត្រពាំងក្រឡឹង ឃុំគីរីវន្ត ស្រុកភ្នំស្រួច ។ រហូតដល់ថ្ងៃទី៣០ ខែមីនា ឆ្នាំ២០១៨ វេលាម៉ោង៨ និង១០នាទី ដោយមានកិច្ចសហការពីកំលាំងគ្រប់ជំនាញបានបន្តទៅធ្វើការឃាត់ជនសង្ស័យឈ្មោះ ជឿង លីឃឿង នៅ ក្នុងផ្ទះរបស់ខ្លួន ផ្សារត្រពាំងក្រឡឹង សូមបញ្ជាក់ថា ឈ្មោះថាឈ្មោះជឿង លីឃៀង មានដីកាបង្គាប់ឲ្យចាប់ខ្លួួន លេខ ៩០/២០១៧ ចេញដោយលោក ស៊ឹង វុទ្ធី ចៅក្រមស៊ើបសួរ នៃសាលាដំបូងខេត្តកំពង់ស្ពឺ ចុះថ្ងៃទី២៨ខែមីនាឆ្នាំ២០១៧ ពីបទរក្សាទុក ឬជួញដូរដោយខុសច្បាប់ នូវសារធាតុញៀន ប្រព្រិត្តនៅភូមិផ្សារត្រពាំងក្រឡឹង ឃុំគីរីវន្ត ស្រុកភ្នំស្រួច កាលពីថ្ងៃទី២៩ខែវិច្ឆិកាឆ្នាំ២០១៦។
ករណីខាងលើ ជំនាញបានបញ្ជូនទៅការិយាល័យគ្រឿងញៀនខេត្ត កសាងសំណុំរឿងចាត់ការតាមនីតិវិធីបន្ដ៕ ដោយ ៖ បញ្ញាស័ក្តិ
