លោកថាក់ស៊ីន និងអ្នកស្រីយីងឡាក់ ស៊ីណាវ៉ាត្រា ត្រូវបានគេឃើញចូលរួមក្នុងព្រឹត្តិការណ៍មួយនៅតូក្យូប្រទេសជប៉ុនថ្ងៃទី ២៩ មីនា -នេះបើតាមទីភ្នាក់ងារព័ត៌មាន NHK ។
បងប្អូនត្រកូលស៊ីណាវ៉ាត្រាទាំងពីររូបចូលរួមព្រឹត្តិការណ៍មួយនៅតូត្យូ
NHK បានដកស្រង់សម្តីរបស់អ្នកនាំពាក្យរដ្ឋាភិបាលបណ្តោះអាសន្នថៃ ឲ្យដឹងថា លោកថាក់ស៊ីន និងប្អូនស្រីយីងឡាក់ ត្រូវបានគេឃើញនៅក្នុងពិធីជួបជុំមួយនៅតូក្យូ កាលពីម្សិលមិញ ហើយពួកគេគ្មានបំណងគេចចេញពីកាមេរ៉ាអ្នកសារព័ត៌មានឡើយ ទោះយ៉ាងនេះក្តីប្រភពព័ត៌មានខាងលើពុំបានបញ្ជាក់ថា នោះជាព្រឹត្តិការណ៍អ្វី។
អ្នកនាំពាក្យដដែលនិយាយថា រដ្ឋាភិបាលថៃជឿថា ជប៉ុននឹងពុំអនុញ្ញាតឲ្យអតីតនាយករដ្ឋមន្ត្រីថៃទាំងពីរនាក់បងប្អូនធ្វើសកម្មភាពនយោបាយនៅប្រទេសរបស់ខ្លួន ព្រោះវាអាចឥទ្ធិពលដល់ទំនាក់ទំនងការទូតទ្វេភាគី។
កាលពីខែមុនឧបនាយករដ្ឋមន្ត្រីបានឲ្យដឹងថា លោកថាក់ស៊ីននិងអ្នកស្រីយីងឡាក់ បានមានវត្តមាននៅជប៉ុននាអំឡុងខែកុម្ភៈ។ រដ្ឋាភិបាលថៃកំពុងបន្តប្រមែប្រមូលព័ត៌មានអំពីពួកគេ បន្ទាប់ពីព័ត៌មានសង្គមលេចឡើងនូវរូបភាពបានបង្ហាញឲ្យឃើញថា អ្នកស្រីយីងឡាក់កំពុងទិញរបស់របរនៅទីក្រុងឡុងដ៍ និងហុងកុង ៕ សូយន
