ភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអញ្ជើញចូលរួមជាអធិបតីពិធីបិទវគ្គហ្វឹកហ្វឺនគ្រូបង្គោលជំនាញបោសំអាតមីនថ្នាក់អាស៊ាននិងតំបន់សម្រាប់ប្រតិបត្តិការរក្សាសន្តិភាពអង្គការសហប្រជាជាតិ(.អ.ស.ប.)(Closing ceremony of training of trainers on technical demining at ASEAN and Regional Level for UNPKO)នាព្រឹកថ្ងៃទី៣០ ខែមីនា ឆ្នាំ ២០១៨ នៅទីស្តីការគណៈរដ្ឋមន្ត្រី។
សម្តេចពិជ័យសេនា ទៀ បាញ់ បានថ្លែងថា កម្ពុជាបានប្រែក្លាយ ទៅជាប្រទេស ដែលបទពិសោធន៍ មានសមត្ថភាព បោសសម្អាតមីន និងបានប្រែក្លាយទៅជាប្រទេស ដែលហ្វឹកហ្វឺនគ្រូបង្គោលបោស សម្អាតមីនដល់សិក្ខាកាមនៅក្នុងតំបន់និងពិភពលោក ព្រមទាំងបានបញ្ជូនកងកម្លាំងរបស់ខ្លួន ទៅបំពេញបេសកកម្មនៅតាមប្រទេសនានា ដែលរងគ្រោះដោយសារគ្រាប់មីនជាបន្តបន្ទាប់។
សម្តេចពិជ័យសេនា ទៀ បាញ់ បានថ្លែងយ៉ាងដូច្នេះថា បច្ចុប្បន្ននេះ កិត្តិយសកម្ពុជា បានសម្រេចដោយជោគជ័យ ដោយបានប្រែក្លាយជា មជ្ឈមណ្ឌលហ្វឹកហ្វឺនគ្រូបង្គោលមួយ ដែលជាមោទនភាពពិភពលោកមិនត្រឹមតែទទួលស្គាល់សមត្ថភាព ផ្នែកបោសសម្អាតមីនរបស់កម្ពុជា មិនមែនត្រឹមតែប្រទេសរបស់ខ្លួននោះទេ គឺបានរីកសោះសាយ ទៅដល់បណ្តាប្រទេសមួយចំនួនដែលកម្ពុជា បានបញ្ជូនកងកម្លាំងរបស់ខ្លួន ទៅបំពេញភារកិច្ច ក្នុងក្របខ័ណ្ឌអង្គការសហប្រជាជាតិ។
សម្តេចពិជ័យសេនា ទៀ បាញ់ បានបន្តថា កងកម្លាំងរបស់កម្ពុជា ដែលបានបំពេញបេសកកម្មរបស់ខ្លួន នៅតាមបណ្តាប្រទេសទាំងនោះ តែងតែទទួល បាននូវការកោតសសើរយ៉ាងខ្លាំងពីសំណាក់បរទេសថា ពោរពេញទៅដោយបទពិសោធន៍ និងសមត្ថភាពខ្ពស់៕ ដោយ ៖ បញ្ញាស័ក្តិ