ត្បូងឃ្មុំ ៖ ករណីគ្រោះថ្នាក់ចរាចររថយន្ត៣គ្រឿងបុកគ្នា បណ្តាលឲ្យមនុស្ស៣នាក់បានស្លាប់ភ្លាមៗនៅហ្នឹងកន្លែង និងមនុស្ស៥នាក់ទៀតបានរបួសធ្ងន់ស្រាល នៅព្រឹកថ្ងៃសុក្រ ទី៣០ ខែមីនា ឆ្នាំ២០១៨ លើផ្លូវជាតិលេខ៨ ចំណុចគីឡូម៉ែត្រលេខ១៣៦-១៣៧ ស្ថិតនៅភូមិអូរព្រិច ឃុំកក់ ស្រុកពញាក្រែក ខេត្តត្បូងឃ្មុំ។
សមត្ថកិច្ចមូលដ្ឋាន បានឲ្យដឹងថា ករណីគ្រោះថ្នាក់នេះ គឺមានរថយន្តមួយគ្រឿងម៉ាកសាំយ៉ុង ពណ៌ស គ្មានស្លាកលេខ បើកបរដោយឈ្មោះ ណន ម៉ោង ភេទប្រុស អាយុ៤២ឆ្នាំ ជាតិខ្មែរ នៅភូមិស្លា ឃុំទន្លូង ស្រុកមេមត់ ខេត្តត្បូងឃ្មុំ របួសធ្ងន់ និងអ្នករួមដំណើរចំនួន០២នាក់ ទី១-ឈ្មោះ ពេជ្រ ភារុន ភេទប្រុស អាយុ៣៨ឆ្នាំ ស្លាប់នៅកន្លែងកើតហេតុ ទី២-ឈ្មោះ វ៉េត ឌឹក ភេទប្រុស អាយុ២៣ឆ្នាំ របួសធ្ងន់ ទាំងបីនាក់មានទីលំនៅភូមិ-ឃុំជាមួយគ្នា។ រីឯរថយន្តមួយគ្រឿងម៉ាកទីតាន់ ពណ៌ស ពាក់ស្លាកលេខ ភ្នំពេញ 2M-2984 បើកបរដោយឈ្មោះ ឱក លន់ ភេទប្រុស អាយុ៤៤ឆ្នាំ នៅភូមិសេរីសុខា ឃុំក្រែក ស្រុកពញាក្រែក ខេត្តត្បូងឃ្មុំ របួសធ្ងន់ និងអ្នករួមដំណើរចំនួន២នាក់ ទី១-ឈ្មោះ សុត សម្បត្តិ ភេទប្រុស អាយុ៣២ឆ្នាំ ជាតិខ្មែរ របួសស្រាល ទី២-ឈ្មោះ ឡាញ់ តុល ភេទប្រុស អាយុ២៧ឆ្នាំ គ្មានរបួស ទាំងបីនាក់មានទីលំនៅភូមិ-ឃុំជាមួយគ្នា។
ចំណែក រថយន្តម៉ាកសាំយ៉ុង ពណ៌លឿង ពាក់ស្លាកលេខ ភ្នំពេញ 2Z-9856 បើកបរដោយឈ្មោះ ឆាយ ចន្ថា ភេទប្រុស អាយុ៣២ឆ្នាំ នៅភូមិព្រៃខ្លា ឃុំព្រៃខ្លា ស្រុកស្វាយអន្ទរ ខេត្តព្រៃវែង ស្លាប់នៅកន្លែងកើតហេតុ និងអ្នករួមដំណើរចំនួន២នាក់ ទី១-ឈ្មោះ ណាក់ រ័ត្ន ភេទប្រុស អាយុ១៨ឆ្នាំ ស្លាប់នៅកន្លែងកើតហេតុ ទី២-ឈ្មោះ ឈុំ ឆុន ភេទស្រី អាយុ៣៣ឆ្នាំ របួសធ្ងន់ ទាំងបីនាក់មានទីលំនៅភូមិ-ឃុំជាមួយគ្នា។
សមត្ថកិច្ច បានឲ្យដឹងថា មុនពេលកើតហេតុ មានរថយន្តមួយគ្រឿងម៉ាកទីតាន់ ពាក់ស្លាកលេខ ភ្នំពេញ 2M-2984 បានជ្រុលទៅបុករថយន្តម៉ាកសាំយ៉ុង ពាក់ស្លាកលេខ ភ្នំពេញ 2Z-9856 ដែលកំពុងបើកពីក្រែក ទៅខេត្តព្រៃវែង ក្នុងទិសដៅពីជើងទៅត្បូង ខណៈមកដល់ចំណុចកើតហេតុ បានបុករថយន្តម៉ាកទីតាន់ពីក្រោយដែលកំពុងបើកបរស្របទិសគ្នា ហើយរថយន្តម៉ាកទីតាន់ក៏ជ្រុលទៅបុករថយន្តម៉ាកសាំយ៉ុង ពណ៌លឿង ដែលកំពុងបើកបរបញ្ច្រាសទិសពីព្រៃវែង មកក្រែក។ ខូចខាតរថយន្តទាំង៣គ្រឿង កម្រិតធ្ងន់។ សមត្ថកិច្ច បានបញ្ជាក់មូលហេតុថាករណីនេះកើតឡើងមកពីរថយន្តសាំយ៉ុង ពណ៌ស ប្រើប្រាស់ល្បឿនលឿន ខ្វះការប្រុងប្រយ័ត្ន ៕ដោយ ៖ បញ្ហាស័ក្តិ