ប៉ៃលិន ៖ រថយន្តដាច់ចង្កូតក្រឡាប់បណ្តាលឲ្យកម្មករបេះផ្លែមៀនជាង៤០នាក់ រងរបួសធ្ងន់-ស្រាល នៅព្រឹកថ្ងៃទី៣០ ខែមីនា ឆ្នាំ២០១៨ ស្ថិតក្បែរព្រំប្រទល់ប៉ៃលិន-បាត់ដំបង ក្នុងភូមិតាគ្រក់ ឃុំត្រែង ស្រុករតនមណ្ទល ខេត្តបាត់ដំបង ។ អ្នករងរបួសទាំងអស់ត្រូវបានដឹកទៅសង្គ្រោះនៅមន្ទីរពេទ្យបង្អែកខេត្តប៉ៃលិន ហើយជនរងគ្រោះមួយចំនួន ត្រូវបានបញ្ជូនទៅព្យាបាលបន្ត នៅមន្ទីពេទ្យខេត្តបាត់ដំបង ដោយសារមានអាការៈធ្ងន់ធ្ងរ។
កម្មករជាង៤០នាក់ បានជិះនៅលើរថយន្ត ចេញពីច្រកឡែម ស្រុកកំរៀង ខេត្តបាត់ដំបង ធ្វើដំណើរឆ្លងកាត់ខេត្តប៉ៃលិន ដើម្បីទៅបេះផ្លែមៀនឲ្យគេនៅភូមិភ្ញាវ ឃុំត្រែង ប៉ុន្តែមិនទាន់ដល់ទីកន្លែងបេះផ្លែមៀនផង ស្រាប់តែរថយន្ត បានរេចង្កូតធ្លាក់ផ្លូវបានបណ្តាលឲ្យក្រឡាប់តែម្តង។ ជនរងគ្រោះជាអ្នកចំណាកស្រុក មកពីខេត្តពោធិ៍សាត់ ខេត្តកំពង់ធំ ខេត្តបាត់ដំបង ខេត្តបន្ទាយមានជ័យ និងខេត្តតាកែវ៕ ដោយ ៖ បញ្ញាស័ក្តិ
