ភ្នំពេញ ៖ ដោយសារតែដាក់រន្ទា កម្មករផ្សារដែកម្នាក់បានស្លាប់ភ្លាមៗ ដោយជង់ជាប់នឹងចម្រឹងដែកធ្លាយឆ្អឹងជំនីរពីម្ខាងទៅម្ខាងទៀត។ ចំណែកកម្មករម្នាក់ទៀតបានរងរបួសស្រាលដោយគ្រាន់រលាត់ស្បែកខ្នងបន្តិច។
ហេតុការណ៍នេះ បានកើតឡើកាលពីព្រឹកថ្ងៃសុក្រ ទី៣០ មីនា ២០១៨ ស្ថិតនៅក្នុងការដ្ឋានសាងសង់ឃ្លាំងមួយកន្លែង តាមបណ្តាយផ្លូវជាតិលេខ៥ ក្នុងសង្កាត់ស្វាយប៉ាក់ ខណ្ឌឫស្សីកែវ រាជធានីភ្នំពេញ។
សមត្ថកិច្ចមូលដ្ឋាន បានបញ្ជាក់ថា ជនរងគ្រោះឈ្មោះ ផល ភារ៉ា អាយុ២១ឆ្នាំ មានស្រុកកំណើនៅភូមិប្រែកប្រា ស្រុកល្វាអែម ខេត្តកណ្តាល។ ជនរងគ្រោះឈ្មោះផល ភារ៉ា បានឡើងទៅបាញ់វីសជញ្ជាំងឃ្លាំង មានកម្ពស់ប្រហែលជាង៥ម៉ែត្រ។ មួយសន្ទុះក្រោយមកជនរងគ្រោះក៏ជាន់រន្ទារអិលបាក់ធ្លាក់ចុះមកក្រោម ហើយបានជង់ជាមួយនឹងដែកដែលចងរៀបសម្រាប់ចាក់បេតុង បណ្តាលឲ្យត្រូវចំឆ្អឹងជំនីរធ្លាយពីម្ខាងទៅម្ខាងទៀត ។ អ្នកធ្វើការជាមួយក៏បានហៅរថយន្តសង្គ្រោះមកដែរ តែជនរងគ្រោះបានដាច់ខ្យល់ស្លាប់បាត់ទៅហើយ៕ ដោយ ៖ បញ្ញាស័ក្តិ
