បន្ទាយមានជ័យ ៖ សមត្ថកិច្ចបានចាប់ខ្លួនជនល្មើសម្នាក់ ក្រោយពីធ្វើសកម្មភាពចាប់ក្មេងស្រីម្នាក់អាយុ១០ឆ្នាំ ដើម្បីជម្រិតទារប្រាក់ពីឪពុកម្តាយក្មេងស្រីរងគ្រោះ ប៉ុន្តែជនសង្ស័យបែរជាសម្លាប់ជនរងគ្រោះទៅវិញ។
នគរបាលក្រុងប៉ោយប៉ែត បានបញ្ជាក់ថា មានករណីដំណឹងបាត់ក្មេងស្រីម្នាក់ឈ្មោះសត់ ឈុនអី អាយុ១០ឆ្នាំ ពេលវេលាម៉ោង៤និង៤០នាទី ថ្ងៃទី៣០ ខែមីនា ឆ្នាំ២០១៨ រៀននៅសាលាពន្លកខ្មែរ ស្ថិតនៅក្នុងក្រុងប៉ោយប៉ែត ខេត្តបន្ទាយមានជ័យ និងមានទីលំនៅភូមិសិលាខ្មែរ ឃុំអូរបីជាន់ ស្រុកអូរជ្រៅ ប៉ុន្តែគួរឲ្យសោកស្តាយមកដល់ពេលនេះ ក្មេងស្រីត្រូវបានស្លាប់ទៅហើយ ដោយអ្នកដែលចាប់ក្មេងយកទៅនោះ បានសម្លាប់ក្មេងស្រី ច្រកដាក់ក្នុងការ៉ុង នៅក្នុងបន្ទប់ជួលមួយរបស់ជនល្មើស។ តាមរយៈកាមេរ៉ាសុវត្ថិភាពបានពិនិត្យឃើញថា ម៉ូតូដែលជនល្មើសជិះធ្វើសកម្មភាពពាក់ស្លាកលេខ បន្ទាយមានជ័យ 1AA 1136 ។
យ៉ាងណាជនសង្ស័យត្រូវបានអាវុធហត្ថក្រុងប៉ោយប៉ែតស្រាវជ្រាវចាប់បាននៅម៉ោង៧យប់ថ្ងៃដដែល។ ករណីបាត់សិស្សស្រីនេះត្រូវបានគេឆែកឃើញតាមកាមេរ៉ាសុវត្ថិភាព និងដោយមានការស្រាវជ្រាវយ៉ាងយកចិត្តទុកដាក់តាមបទបញ្ជាពីលោកឧត្តមសេនីយ៍ត្រី បោន ប៊ិន មេបញ្ជាការអាវុធហត្ថខេត្តអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការអាវុធហត្ថក្រុងប៉ោយប៉ែត ចុះស្រាវជ្រាវឈានដល់ការរកឃើញជនរងគ្រោះ ហើយចាប់បានជនសង្ស័យភ្លាមៗនៅបន្ទប់ជួលមួយកន្លែង ក្បែរខារ៉ាអូខេយីហោK1 ក្នុងភូមិក្បាលស្ពាន សង្កាត់ប៉ោយប៉ែត។ មេបញ្ជាការអាវុធហត្ថក្រុងប៉ោយប៉ែតប្រាប់ថា កុមារីរងគ្រោះបានស្លាប់ហើយ គឺជនរងគ្រោះត្រូវបានសម្លាប់ញាត់ដាក់ក្នុងការ៉ុង ចំណែកជនសង្ស័យ ចាប់បានហើយ និងកំពុងសួរនាំនៅឡើយ។ យ៉ាងណាក៏ដោយសមត្ថកិច្ចមិនទាន់ប្រាប់ពីមូលហេតុ អត្តសញ្ញាណជនល្មើស និងដំណើររឿងករណីចាប់ជម្រិតនេះទេ។
ស្ថិតក្នុងដំណាក់កាលសមត្ថកិច្ចបានសួរចម្លើយ ដោយជនសង្ស័យបានបញ្ជាក់ថា ខ្លួននិងក្មេងស្រីរងគ្រោះជាមនុស្សធ្លាប់ស្គាល់គ្នានិងនៅភូមិជាមួយគ្នាតាំងពីក្មេងស្រីរងគ្រោះអាយុប្រហែស៦ឆ្នាំ ។ នាពេលកន្លងមក នៅពេលដែលក្មេងស្រីនោះគ្មានអ្វីជិះទៅសាលា ជនសង្ស័យក៏បានជូនទៅសាលារៀន ជូនដើរលេង ជូនទៅមាត់ទន្លេលេងសប្បាយ ។ ជនសង្ស័យបានបញ្ជាក់ថា មូលហេតុដែលខ្លួនរត់ចេញពីផ្ទះ ដោយសារតែខ្លួនរៀនពេទ្យធ្លាក់ ហើយត្រូវប៉ាដេញចេញពីផ្ទះចំនួន៣ដង ក៏រត់មកស្នាក់ក្នុងសមាគមពេទ្យ ព្រោះខ្លួនមិនត្រូវគ្នាជាមួយប្រពន្ធចុងរបស់ប៉ា ។ ក្រោយពេលដែលប៉ាដេញចេញពីផ្ទះ ហើយក៏មានសង្សារតាំងពីរៀនពេទ្យ ប៉ុន្តែឈប់ស្នាក់នៅក្នុងសមាគមពេទ្យ ក៏មកជួលបន្ទប់ស្នាក់នៅជាមួយសង្សារ ហើយក៏បានដើររកការងារធ្វើ ប៉ុន្តែរកមិនបាន ។ មូលដែលចាប់ក្មេងនោះ តាមរយៈការស្គាល់គ្នាជាមួយពូរបស់ក្មេងស្រីរងគ្រោះ ឈ្មោះវេហារ ដែលជាមិត្តភក្តិធ្លាប់រៀនថ្នាក់ជាមួយគ្នា ហើយបានរៀបចំគម្រោងដើម្បីចាប់ក្មេងស្រីរងគ្រោះជម្រិតយកលុយ ដោយបានធ្វើការស៊ើបសួរក្មេងៗក្នុងភូមិអំពីសាលាដែលក្មេងស្រីរងគ្រោះរៀន ហើយបានធ្វើជាទៅដូរលុយនៅកន្លែងដែលម្តាយក្មេងស្រីកំពុងរកស៊ី។ ស្ថិតក្នុងឱកាសល្អនោះ ខ្លួនក៏បានទៅសាលារៀនរបស់ក្មេងស្រី ដែលជាមនុស្សធ្លាប់គ្នាលបានល្បូងក្មេងស្រីរងគ្រោះឡើងជិះម៉ូតូយកទៅបន្ទប់ជួលជម្រិតទារលុយពីម្តាយក្មេងរងគ្រោះ៕ ដោយ ៖ បញ្ញាស័ក្តិ
