វៀតណាម ៖ នៅរាត្រី ថ្ងៃទី៣០ ខែមីនា ឆ្នាំ២០១៨នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជួប លោក វ៉ាង យី ( Wang Yi) រដ្ឋមន្ត្រីការបរទេសចិន នៅសាលសន្និសីទជាតិវៀតណាម ទីក្រុងហាណូយ។
សម្តេចតេជោ ហ៊ុន សែន បានថ្លែងនូវការជូនពរជូន លោក វ៉ាង យី ដែលត្រូវបានសភាប្រជាជនចិន បោះឆ្នោតជ្រើសតាំង ជារដ្ឋមន្ត្រីការបរទេសចិន សាជាថ្មីម្តងទៀត។ ទន្ទឹមនឹងនេះ សម្តេចតេជោ ក៏បានផ្តាំផ្ញើតាមរយៈលោករដ្ឋមន្ត្រី ផ្ញើជូននូវការជូនពរនិងអបអរសាទរជូនចំពោះលោក ស៊ី ជីនពីង លោក លី ខឺឈាង ដែលត្រូវបានសភាប្រជាជនចិន បោះឆ្នោតជ្រើសតាំង ជាប្រធានាធិបតី និងជានាយករដ្ឋមន្ត្រីចិន សាជាថ្មីម្តងទៀត។
លោក វ៉ាង យី មានប្រសាសន៍សំដែងនូវការរីករាយ ដោយបានជួបសន្ទនាសារជាថ្មីម្តងទៀត ជាមួយ សម្តេចតេជោនាយករដ្ឋមន្ត្រី។ លោកបានពាំនាំនូវការផ្តាំផ្ញើសួរសុខទុក្ខពីលោកប្រធានាធិបតី និងលោកនាយករដ្ឋមន្ត្រីចិន ជូនចំពោះសម្តេចតេជោនាយករដ្ឋមន្ត្រីផងដែរ។
លោករដ្ឋមន្ត្រីចិនបានបន្តថា កាលពីឆ្នាំ២០១៧កន្លងទៅ លោកប្រធានាធិបតីចិន បានជួបពិភាក្សាការងារចំនួនពីរដងជាមួយ សម្តេចតេជោ ហើយកាលពីខែមករាកន្លងទៅ លោក លី ខឺឈាង នាយករដ្ឋមន្ត្រីចិន បានអញ្ជើញទៅបំពេញទស្សនកិច្ចនិងចូលរួមកិច្ចប្រជុំកំពូលមេគង្គ-ឡានឆាង លើកទី២ នៅប្រទេសកម្ពុជា ដើម្បីពង្រឹងនិងពង្រីកទំនាក់ទំនងកិច្ចសហប្រតិបត្តិការក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ រវាងប្រទេសទាំងពីរកម្ពុជា-ចិន។
លោករដ្ឋមន្ត្រីបានមានប្រសាសន៍ជម្រាបជូន សម្តេចតេជោថា ប្រទេសចិនបានតាមដាននិងគាំទ្រនូវវិធានការទាំងឡាយដែលសម្តេចតេជោ និងរាជរដ្ឋាភិបាលកម្ពុជា បានអនុវត្តន៍នាពេលកន្លងមក ក្នុងការពារនិងថែរក្សាសុខសន្តិភាព និងស្ថិរភាពនយោបាយក្នុងប្រទេសកម្ពុជា ពិសេសការការពារកិត្តិយសជាតិរបស់កម្ពុជា។ តាមរយៈនេះ ប្រទេសចិនសូមគាំទ្រនូវមាគ៌ានៃការអភិវឌ្ឍរបស់ប្រទេសកម្ពុជាឲ្យកាន់តែរឹងមាំថែមទៀត ជាងនេះទៅទៀតនោះ ថ្នាក់ដឹកនាំចិនសូមគាំទ្រនិងជូនពរសម្តេចតេជោបន្តជាប់ឆ្នោតក្នុងការដឹកនាំជោគវាសនាប្រទេសកម្ពុជាឲ្យកាន់តែរីកចម្រើនខ្លាំងឡើងថែមទៀត។
នៅក្នុងជំនួបពិភាក្សាគ្នានោះ សម្តេចតេជោ និងលោក វ៉ាង យី បានធ្វើការពិភាក្សាគ្នាយ៉ាងយកចិត្តទុកដាក់លើបញ្ហាទំនាក់ទំនងទ្វេភាគី ពហុភាគី បញ្ហាតំបន់និងអន្តរជាតិ ពិសេសបញ្ហាវិវត្តន៍នៃសភាពការណ៍ថ្មីៗជុំវិញពិភពលោក ដែលមេដឹកនាំកម្ពុជា និងចិនបាននឹងកំពុងយកចិត្តទុកដាក់៕ ដោយ ៖ បញ្ញាស័ក្តិ
