សៀមរាប ៖ បុរសបីនាក់ស្លាប់ភ្លាមៗនៅនឹងកន្លែង ក្រោយពេលបើកម៉ូតូមួយគ្រឿង ទៅបុករថយន្តមួយគ្រឿងដែលកំពុងបើកបញ្ច្រាសទិសគ្នា ពីខាងមុខ កាលពីយប់ថ្ងៃទី៣០ខែមីនា ឆ្នាំ២០១៨ នៅលើផ្លូវជាតិលេខ៦អា ស្ថិតក្នុងភូមិត្រាង ឃុំកណ្តែក ស្រុកប្រាសាទបាគង ខេត្តសៀមរាប។
សមត្ថកិច្ចនគរបាលមូលដ្ឋាន បានឲ្យដឹងថា អ្នកស្លាប់ទាំងបីនាក់ ឈ្មោះហ៊ាប កឹង អាយុ២៦ឆ្នាំ ឈ្មោះលើត អាយុ២២ឆ្នាំ ទាំងពីរនាក់រស់នៅភូមិស្វាយជ័យ ឃុំត្រពាំងធំ ស្រុកប្រាសាទបាគង ខេត្តសៀមរាប និងឈ្មោះ វ៉ាន់ អាយុ២៣ឆ្នាំ រស់នៅភូមិពង្រ ឃុំកន្ត្រាំង ស្រុកប្រាសាទបាគង ខេត្តសៀមរាប ។ ពួកគេទាំងបីនាក់ជិះម៉ូតូមួយគ្រឿងឌុបគ្នា ម៉ាក ហុងដាឌីមសង់ សេ១២៥ ស៊េរីឆ្នាំ២០០៨ ពណ៌ខ្មៅ ស្លាកលេខ បាត់ដំបង 1E 4635។
សមត្ថកិច្ចដដែលបានបន្តថា ពួកគេបានជិះម៉ូតូយ៉ាងលឿន តាមផ្លូវលេខ៦អា ពីលិចទៅកើត មកដល់កន្លែងកើតហេតុ បានបើករំលោភគន្លងផ្លូវខាងស្តាំរបស់គេ បណ្តាលឲ្យជ្រុលទៅរថយន្តមួយគ្រឿង ដែលបើកក្នុងទិសដៅបញ្ច្រាសគ្នា បណ្តាលឲ្យស្លាប់ទាំងបីនាក់ភ្លាមៗ។ រថយន្តនោះម៉ាក KIA ពណ៌ស ស្លាកលេខ សៀមរាប 3A 2068 ហើយអ្នកបើករថយន្តបានរត់គេចខ្លួនបាត់៕ ដោយ ៖ បញ្ញាស័ក្តិ