ខេត្តកំពង់ចាម ៖ អភិបាលខេត្តកំពង់ចាម លោក គួច ចំរើន បានស្នើសុំឱ្យប្រជាពលរដ្ឋទាំងអស់ មានការប្រុងប្រយ័ត្នខ្ពស់ លើការបង្ការអគ្គិភ័យ គ្រោះថ្នាក់ចរាចរ នៅក្នុងឱកាសបុណ្យចូលឆ្នាំថ្មីប្រពៃណីជាតិ ដែលនឹងឈានមកដល់ប្រមាណជាង១០ថ្ងៃទៀតនេះ។
ការអំពាវនាវ ឱ្យប្រជាពលរដ្ឋ ចូលរួមបែបនេះ ធ្វើឡើងកាលពីព្រឹកថ្ងៃសៅរ៍ ទី៣១ ខែមីនា ឆ្នាំ២០១៨ ក្នុងឱកាសដែលលោកអភិបាល បានអញ្ជើញចូលរួមក្នុងពិធីបុណ្យផ្កាសាមគ្គី នៅវត្ត អម្ពវនារាម ទួលស្វាយជ្រុំ ហៅវត្តចំការអណ្តូង ភូមិចំការអណ្តូង ឃុំចំការអណ្តូង ស្រុកចំការលើ ខេត្តកំពង់ចាម ។
លោក គួច ចំរើន បានមានប្រសាសន៍ថា ប្រជាពលរដ្ឋលោកយាយលោកតាទាំងអស់ត្រូវយកចិត្តទុក្ខដាក់ខ្ពស់ ក្នុងការបង្ការ និងពន្លត់អគ្គិភ័យ នឹងត្រូវមានស្មារតីប្រុងប្រយ័ត្នខ្ពស់ចំពោះទៀន ធូប ព្រោះជិតដល់រដូវចូលឆ្នាំថ្មីហើយ ដែលអាចនឹងបង្កគ្រោះអគ្គិភ័យដោយប្រការណាមួយដែលបណ្តាលមកពីយើងមានការធ្វេសប្រហែស។
លើសពីនេះទៀត លោកអភិបាលខេត្ត ក៏បានសំណូមពរឲ្យប្រជាពលរដ្ឋទាំងអស់ជាពិសេស បងប្អូនប្រជាពលរដ្ឋនៅក្នុងស្រុកចំការលើ ត្រូវមានការយកចិត្តទុកដាក់ខ្ពស់ចំពោះការគោរពច្បាប់ចរាចរណ៍ ព្រោះនាពេលបច្ចុប្បន្ននេះ បញ្ហាគ្រោះថ្នាក់ចរាចរនៅក្នុងប្រទេសកម្ពុជាមានការកើនឡើងខ្ពស់ ដោយឡែកខេត្តកំពង់ចាមរបស់យើងក៏ជាចំណុចខ្ពស់នៃគ្រោះថ្នាក់ចរាចរនេះផងដែរ ហេតុនេះសូមបងប្អូនទាំងអស់ពេលជិះម៉ូតូត្រូវពាក់មួកសុវត្ថិភាពដើម្បីការពារខ្លួនឯង ត្រូវពាក់ខ្សែក្រវាត់ការពារសុវត្ថិភាពនៅពេលបើកបរនិង ចេះអធ្យាស្រ័យគ្នាក្នុងពេលបើកបរ ជាពិសេសត្រូវគោរពច្បាប់ចរាចរណ៍ដើម្បីចៀសវាងគ្រោះថ្នាក់ចរាចរទាំងអស់គ្នា៕ ដោយ៖បញ្ញាស័ក្តិ