ភ្នំពេញ៖ រដ្ឋបាលខណ្ឌពោធិ៍សែនជ័យ ប្រារព្ធកម្មវិធី សង្ក្រាន្ត ដើម្បីអបអរពិធីបុណ្យចូលឆ្នាំថ្មីប្រពៃណីខ្មែរ ។ រៀងរាល់ការប្រារព្ធ សង្ក្រាន្តម្តងៗ តែងតែមានប្រជាពលរដ្ឋ ចាស់ ព្រឹទ្ធាចារ្យ លោកតា លោកយាយ សិស្សនិស្សិត លោកគ្រូ អ្នកគ្រូ ចូលរួមយ៉ាងច្រើនកុះករ ព្រមទាំងមានលេងល្បែងប្រជាប្រិយខ្មែរយើង កម្សាន្តនានា ការដាក់តាំងបង្ហាញ ផលិតផលខ្មែរ ការប្រគំតន្ត្រី ឆាកកំប្លែង ការប្រកួតប្រដាល់ក្បាច់គុនបុរាណខ្មែរ ការប្រណាំង រទេះគោ ជិះកង់លើស្ពានឆ្លងទឹក លាក់កន្សែង ទាញព្រ័ត្រ បោះអង្គញ់ ចោលឈូង រាំវង្ស រាំក្បាច់ សារវ៉ាន់ ឡាំលាវ ជាដើម ដើម្បីបង្កភាពសប្បាយរីករាយ ក៏ដូចជាបង្ហាញការសាមគ្គីភាព រវាងគ្នានិងគ្នា ក្នុងនាមជាជនជាតិខ្មែរតែមួយ ។
ពិធីនេះប្រព្រឹត្តទៅនៅរសៀលថ្ងៃទី៣០ ខែមីនា ឆ្នាំ២០១៨នេះ នៅក្នុងព្រៃឈើទាល មុខវត្តជន្លុងម្លូរ ភូមិព្រៃរងៀង សង្កាត់ភ្លើងឆេះរទេះ ខណ្ឌពោធិ៍សែនជ័យ ក្រោមអធិបតីភាព លោកទេសរដ្ឋមន្ត្រី ឃុន ហាំង លោក នួន ផារ័ត្ន អភិបាលរងរាជធានីភ្នំពេញ និងលោក ហែម ដារិទ្ធិ អភិបាលខណ្ឌពោធិ៍សែនជ័យ។ ពិធីនេះធ្វើឡើងរយៈពេលបីថ្ងៃ។
លោក ហែម ដារិទ្ធិ អភិបាលខណ្ឌពោធិ៍សែនជ័យ បានថ្លែងថា ពិធីសង្ក្រាន្តនេះ បានធ្វើឡើងមានរយៈពេល៣ឆ្នាំជាប់ៗគ្នាមកហើយ នៅមុនពិធីបុណ្យចូលឆ្នាំថ្មីប្រពៃណីជាតិខ្មែរមកដល់ តែងតែធ្វើពិធីសង្ក្រាន្ត ជាបន្តបន្ទាប់គឺនៅក្នុងឆ្នាំ២០១៦ បានធ្វើឡើងនៅក្នុងវត្តតិក្ខបញ្ញោ សង្កាត់សំរោងក្រោម ខណ្ឌពោធិ៍សែនជ័យ។ ឆ្នាំ២០១៧ បានប្រារព្ធធ្វើឡើង នៅក្នុងតំបន់សេដ្ឋកិច្ចពិសេសភ្នំពេញ សង្កាត់កន្ទោក ខណ្ឌពោធិ៍សែនជ័យ។
លោកអភិបាលខណ្ឌ បានបន្តទៀតថា គោលបំណងដែលរៀបចំពិធីនេះ គឺដើម្បីអបអរសាទរពិធីចូលឆ្នាំប្រពៃណីជាតិ ហើយក៏ចង់បង្ហាញពីវប្បធម៌ និងប្រពៃណីរបស់ខ្មែរ។ សង្ក្រាន្ដពោធិ៍សែនជ័យនៅក្នុងឆ្នាំនេះ មានកម្មវិធីកម្សាន្តជាច្រើន ដូចជាការប្រឡងវបរកញ្ញាវ័យចំណាស់ ការប្រកួតកីឡាប្រដាល់ ក្បាច់គុណបុរាណខ្មែរ ការប្រណាំងរទេះគោ ការជិះកង់លើស្ពានឆ្លងទឹក ការប្រគំតន្ត្រី ឆាកកំប្លែង ការតាំងពិព័រណ៍បង្ហាញផលិតផលខ្មែរ តាមស្តង់របស់សង្កាត់នីមួយៗ ការប្រគំចម្រៀងចាប៉ីដងវែង ការលេងល្បែងប្រជាប្រិយ និងកម្មវិធីជាច្រើនទៀត។
លោក ហែម ដារិទ្ធិ គូសបញ្ជាក់ថា សង្ក្រាន្តនេះបានប្រព្រឹត្តទៅរយៈពេល៣ថ្ងៃ គឺចាប់ផ្ដើមពីថ្ងៃទី៣០ ខែមីនា ដល់ថ្ងៃទី០១ ខែមេសា ឆ្នាំ២០១៨ ទើបត្រូវបញ្ចប់ ហើយលោកសង្ឃឹមថា នឹងមានការអញ្ជើញចូលរួមកម្សាន្ត ពីសំណាក់បងប្អូនប្រជាពលរដ្ឋច្រើនកុះករ ជាមិនខានឡើយ។ លោកផ្ដាំផ្ញើឲ្យបងប្អូនទាំងអស់ ដែលចូលរួមកំសាន្តជួយទិញផលិតផលខ្មែរយើង និងជាជួយរក្សាសន្តិសុខសណ្ដាប់ធ្នាប់ទាំងអស់គ្នា ចៀសវាងមានបញ្ហាអាក្រក់ផ្សេងៗកើតឡើងបាន។
លោក នួន ផារ័ត្ន អភិបាលរងរាជធានីភ្នំពេញ បានរំលឹកថា មហាសង្ក្រាន្ត មិនមែនទើបតែកើតមាននោះទេ គឺមានតាំងពីដូន ជីតា យូរលុងណាស់មកហើយ សូម្បីតែនៅលើប្រាង្គប្រាសាទនានានៅក្នុងព្រះរាជាណាចក្រកម្ពុជារបស់យើង ក៏មានរូបចម្លាក់នេះផងដែរ ។ បើទោះបីបច្ចុប្បន្ន បច្ចេកវិទ្យាមានការជឿនលឿនយ៉ាងណាក្តី សូមប្រជាពលរដ្ឋ ជាពិសេស ប្អូនៗយុវជន យុវនារី ជំនាន់ក្រោយ គួររក្សាទំនៀមទម្លាប់ប្រពៃណីជាតិខ្មែរមួយនេះ ឲ្យបានគង់វង្សយូរអង្វែង ដើម្បីទុកជាកេរ្តិ៍ដំណែលបន្តទៀត ទៅដល់កូនចៅ ជំនាន់ក្រោយៗបន្តទៀត៕ ដោយ ៖ បញ្ញាស័ក្តិ