បុរសម្នាក់នៅប្រទេសចិនបានបើកបររថយន្តបុកចំកង់អគ្គិសនីមួយគ្រឿងនៅតាមផ្លូវ រួចរត់គេច។ ក្រោយពេលត្រូវបានចាប់ខ្លួនទើបបុរសនោះដឹងថា ជនរងគ្រោះគឺជាប្រពន្ធនិងកូនបង្កើតរបស់ខ្លួនសោះ។
តាមមីរ ករណីដ៏កម្រនេះបានកើតឡើងនៅវេលាម៉ោង ២២និង៣០នាទី ថ្ងៃទី ២៥ ខែមីនា នៅផ្លូវមួយនាទីក្រុង Zibo ខេត្ត Shandong ប្រទេសចិន ។ អ្នកបើកបររថយន្តបង្កគ្រោះថ្នាក់ត្រកូល Zhang បានបន្តបើករថយន្តគេចដោយពុំព្រមឈប់ ខណៈពេលបានបុកចំកង់អគ្គិសនីមួយគ្រឿងដែលមានស្ត្រីដឹកក្មេងប្រុសម្នាក់។
បុរសរូបនេះបានស្រែកទ្រហោរយំក្រោយពេលដឹងអត្តសញ្ញាណជនរងគ្រោះ។
នៅយប់នោះសាក្សីនៅកន្លែងកើតហេតុបានសំឡឹងឃើញស្លាកលេខរថយន្ត ហើយក៏ទូរស័ព្ទឲ្យប៉ូលិសជុំវិញហេតុការណ៍គ្រោះថ្នាក់ចរាចរណ៍នេះ ។ រថយន្តសង្គ្រោះបន្ទាន់១គ្រឿង ត្រូវបានគេហៅមកបញ្ជូនជនរងគ្រោះទាំងពីរទៅកាន់មន្ទីរពេទ្យ។
ទោះបីក្រុមគ្រូពេទ្យខំប្រឹងប្រែងយ៉ាងក៏មិនអាចសង្គ្រោះជីវិតក្មេងប្រុសនោះបាន។ ចំណែកម្តាយរបស់វារងគ្រោះធ្ងន់កំពុងបន្តធ្វើការសង្គ្រោះ។
ក្រោយពេលត្រូវចាប់ខ្លួន Zhang បានស្រែកយំមិនឈប់បន្ទាប់ពីដឹងថា ខ្លួនបានបុកចំភរិយា និងកូនប្រុស។
កន្លែងកើតហេតុ
Zhang សារភាពប្រាប់ប៉ូលិសថា ៖ នៅយប់ថ្ងៃទី ២៥ ខែមីនា និងភរិយាព្រមទាំងកូនប្រុស បានទៅបរិភោគអាហារនៅផ្ទះសាច់ញាតិម្នាក់ ។ ពេលវិលត្រឡប់មកវិញខ្លួនបានបើករថយន្ត ខណៈពេលដែលភរិយានិងកូនប្រុសជិះកង់អគ្គិសនីជាមួយគ្នា ។ ព្រោះតែផឹកច្រើនពេកធ្វើឲ្យ Zhang ធ្លាក់ភ្នែកបាត់ម្ចាស់ការ រួចបង្កគ្រោះថ្នាក់នេះឡើង ។
ពិតជាទឹកប្តូរនិស្ស័យប្រល័យជីវិតកូនប្រពន្ធ ៕ លីសា
