មូលដ្ឋានសមុទ្ររាម៖ កត្តាសន្តិភាព បានផ្តល់ឱកាសឱ្យប្រជាពលរដ្ឋគ្រប់រូប ប្រារព្ធពិធីបុណ្យតាមប្រពៃណីជាតិ ដែលបានបង្ហាញឱ្យឃើញពីសង្គមជាតិមួយ ដែលមានវប្បធម៌ ប្រពៃណី អរិយធម៌ សីលធម៌ និងចរិយាធម៌ដ៏ល្អផូរផង់។
នៅមូលដ្ឋានសមុទ្ររាម នារសៀលថ្ងៃទី៣០ ខែមីនា ឆ្នាំ២០១៨ លោកនាយឧត្តមសេនីយ៍ប៉ុល សារឿន អគ្គមេបញ្ជាការនៃកង យោធពលខេមរភូមិន្ទ បានជួបសំណេះសំណាលសួរសុខទុក្ខដល់ នាយនាវី នាយនាវីរងនិងពលនាវិកទាំងអស់នៃកងទ័ពជើងទឹក នាឱកាសអបអរសាទរពិធីបុណ្យចូលឆ្នាំថ្មី ប្រពៃណីជាតិ។
នាយឧត្តមសេនីយ៍ បានមានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំដ៏ត្រឹមត្រូវ និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាននាំមកនូវសុខសន្តិភាពពេញបរិបូណ៍ និងមានការអភិវឌ្ឍលើគ្រប់វិស័យ។
លោកមេបញ្ជាការ បានថ្លែងថា ទន្ទឹមការចូលរួមសប្បាយរីករាយរបស់ប្រជាពលរដ្ឋ ក្នុងឱកាសបុណ្យចូលឆ្នាំខ្មែរខាងមុខនេះ យើងជាកងទ័ពត្រូវបន្តបំពេញភារកិច្ចរបស់ខ្លួន ក្នុងកិច្ចការពារជាតិ និងសហការការពារសន្តិភាព ស្ថិរភាព សន្តិសុខ និងសណ្តាប់ធ្នាប់សង្គម ឱ្យបានកាន់តែល្អប្រសើរ ស័ក្តិសមជាកងទ័ពដែលប្រសូត្រចេញពីប្រជាពលរដ្ឋ គឺធ្វើអ្វីៗដើម្បីប្រជាពលរដ្ឋ។
លោកបានបញ្ជាក់បន្ថែមថា “ខ្ញុំសូមនាំមកនូវការសាកសួរសុខទុក្ខនឹករំលឹក និងការកោតសរសើរ ពីសំណាក់សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិតិ្តព្រឹទ្ធបណ្ឌិត សម្តេចពិជ័យសេនា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងថ្នាក់ដឹកនាំអគ្គបញ្ជាការនៃកងយោធពលខេមរភូមិន្ទ ជូនចំពោះនាយនាវី នាយនាវីរង និងពលនាវិកទាំងអស់ ដែលបានខិតខំប្រឹងប្រែង លះបង់កម្លាំងកាយចិត្តប្រាជ្ញាស្មារតី ធ្វើពលិកម្មគ្រប់បែបយ៉ាង ក្នុងបុព្វហេតុនៃកិច្ចការពារជាតិ “៕ ដោយ ៖ បញ្ញាស័ក្តិ
