រដ្ឋមន្ត្រីការពារជាតិអាមេរិច James Mattis នៅថ្ងៃសុក្រនេះបានធ្វើដំណើរទៅទស្សនៈកិច្ចតំបន់គ្មានកងទ័ព (DMZ) ដែលខ័ណ្ឌប្រទេសកូរ៉េទាំងពីរ។ នេះបើតាមការចុះផ្សាយរបស់សារព៌តមានអាមេរិចស៊ីអ៊ិនអ៊ិន (CNN)។
ឈរនៅចំងាយតែប៉ុន្មានយ៉ាតប៉ុណ្ណោះពីទឹកដីកូរ៉េខាងជើង រដ្ឋមន្ត្រីការពារជាតិអាមេរិចបាននិយាយថា អាមេរិច និងកូរ៉េខាងត្បូងប្តេជ្ញាចិត្តក្នុងការប្រើប្រាស់ផ្នែកការទូតដើម្បីដោះស្រាយបញ្ហរបស់ប្រទេសកូរ៉េខាងជើង។
លោកនិយាយដូច្នេះថា “ការបង្ករឿងរបស់កូរ៉េខាងជើងនៅតែបន្តការគំរាមកំហែងនៅក្នុងតំបន់ និងសន្តិភាពពិភបលោក ហើយទោះបីជាមានការថ្កោលទោសជាឯកច្ឆ័នពីក្រុមប្រឹក្សាអង្គការសហប្រជាជាតិក៍ដោយ ក៍ប្រទេសនេះនៅតែបន្តសកម្មភាព”។
ដោយឈរបែរមុខទៅកូរ៉េខាងជើង លោក Mattis និយាយថា គោលដៅរបស់ពួកយើងគឺមិនមែនសង្គ្រាមនោះទេ ប៉ុន្តែជាការធ្វើឲ្យឧបទ្វីកូរ៉េគ្មានអាវុធនុយក្លេអ៊ែរ។
ការមកទស្សនៈកិច្ចរបស់មន្ត្រីជាន់ខ្ពស់អាមេរិច នៅតំបន់គ្មានកងទ័ពនេះធ្វើឡើង ក្រោយពេលទីក្រុងព្យុងយ៉ាងនៅសប្តាហ៍នេះបានបង្កើតការគំរាមកំហែងជាថ្មី តាមរយៈការចង់សាកបាញ់សាកល្បងអាវុធនុយក្លេអ៊ែរនៅលើដី។
លោក Mattis បានទៅទស្សនៈកិច្ចតំបន់អភិរក្ស Ouellette ដែលជាតំបន់ព្រំដែនមានការយាមកាមតឹងតែងខ្លាំង មុនពេលលោកទៅទស្សនាផ្ទះសេរីភាព (Freedom House) ស្ថិតក្នុងភូមិ Panjunmon ក្បែរបន្ទាប់ព្រំដែនដែលខ័ណ្ឌចែកប្រទេសកូរ៉េទាំងពីរ។
លោកថ្លែងថា “ប្រវត្តិសាស្ត្រធ្វើឲ្យពួកយើងនឹកឃើញកាលគ្រាដែលពួកយើងតស៊ូប្រយុទ្ធជាមួយគ្នាក្នុងគ្រាដ៍លំបាក ហើយឥឡូវក៍ពួកយើងនឹងនៅជាមួយគ្នាដែរ”។
តំបន់គ្មានកងទ័ព គឺជាតំបន់ព្រំដែនរវាងប្រទេសកូរ៉េខាងជើង និងកូរ៉េខាងត្បូង។ វាមានទំហំ ៤គីឡូម៉ែត្រ និងលាតសន្ធឹងចំងាយ ២៥០គីឡូម៉ែត្រ ហើយមានប៉ុស្តិ៍យាម មីន និងប្រព័ន្ធការពារជាច្រើន។
តំបន់គ្មានព្រំដែននេះត្រូវបានបង្កើតឡើងដោយសន្និសញ្ញាឈប់បាញ់គ្នាក្នុងឆ្នាំ ១៩៥៣ ដែលបានបញ្ចប់សង្គ្រាមកូរ៉េ ប៉ុន្តែបើតាមលក្ខណៈបច្ចេកទេស ភាគីទាំងពីរនៅតែមានជម្លោះដដែល ខណៈដែលសន្ធិសញ្ញាសន្តិភាពមិនដែលត្រូវបានគេចុះហត្ថលេខាឡើយ៕ ដោយ ៖ សុភ័ក្ត្រ
