ភ្នំពេញ ៖ តុលាការក្រុងភ្នំពេញ បានបញ្ចប់ការសួរចម្លើយលើជនសង្ស័យ៥នាក់ ក្នុងនោះមានស្នងការរងខេត្តតាកែវម្នាក់ ត្រូវជាបងប្រុសបង្កើតរបស់លោក ឡាយ វណ្ណៈ អតីតអភិបាលខេត្តតាកែវ ដែលពាក់ព័ន្ធករណីឃាតកម្ម សម្លាប់ស្ត្រីស្រស់ម្នាក់ នៅក្រុងដូនកែវ ខេត្តតាកែវ នៅម៉ោងប្រមាណ ៥៖៤០នាទីល្ងាច ថ្ងៃទី៣១ ខែមីនា ឆ្នាំ២០១៨នេះ។
ជនសង្ស័យទាំង៥នាក់ ត្រូវបាននាំខ្លួនយកទៅរក្សាទុកបណ្តោះអាសន្ននៅក្រសួងមហាផ្ទៃ ដោយរង់ចាំបន្តនីតិវិធីសាកសួរបន្តទៀតនៅថ្ងៃទី១ខែមេសា។
ជាមួយនឹងករណីនេះ អតីតអភិបាលខេត្តតាកែវ លោក ឡាយ វណ្ណៈ បានសារក្នុងផេកហ្វេសប៊ុកសារភាពថា រូបលោកពិតជាមានទំនាក់ទំនងស្នេហាជាមួយអ្នកស្រី ចេវ សុវឌ្ឍនា កាលពីមួយឆ្នាំមុន ប៉ុន្តែដោយសាររឿងបែកការណ៍ដឹងដល់ប្រពន្ធលោកក៏សុំបែកទំនាក់ទំនងជាមួយអ្នកស្រី ចេវ សុវឌ្ឍនា។
លោក ឡាយ វណ្ណៈ បានបញ្ជាក់យ៉ាងដូច្នេះ “ខ្ញុំសូមបញ្ជាក់អះអាងថា រូបខ្ញុំ និងប្អូនស្រី ចេវ សុវឌ្ឍនា មានទំនាក់ទំនងស្នេហា ស្រឡាញ់គ្នាជាមួយគាត់ពិតប្រាកដមែនក្នុងរយៈពេលជាង ១ឆ្នាំកន្លងមកនេះ។ ក្រោយមកដោយភរិយាខ្ញុំបានដឹង ខ្ញុំបានសុំកាត់ផ្តាច់ទំនាក់ទំនងជាមួយគាត់ ដែលធ្វើឲ្យគាត់ខឹងសម្បានឹងខ្ញុំរហូតដល់គាត់គិតខ្លីធ្វើអត្តឃាដខ្លួនឯង។ នេះជារឿងពិត ប៉ុន្តែខ្ញុំសូមបដិសេដទាំងស្រុងនូវរាល់ការចោទប្រកាន់ដែលថារូបខ្ញុំនិងបងប្រុសខ្ញុំ បានសម្លាប់ប្អូនស្រី ចេវ សុវឌ្ឍនា”។
លោកឡាយ វណ្ណៈ បានសរសេរក្នុងផេកហ្វេសប៊ុករបស់លោកនាថ្ងៃទី៣១ខែមីនាឆ្នាំ២០១៨នេះថា “ជូនចំពោះជនរួមជាតិទូទាំងប្រទេស។ ពិសេសប្រជាពលរដ្ឋខេត្តតាកែវ ជាទីគោរពស្រឡាញ់របស់ខ្ញុំ។
ខ្ញុំសូមបដិសេដទាំងស្រុង នូវរាល់ការចោទប្រកាន់ដែលថា រូបខ្ញុំនិងបងប្រុសខ្ញុំ បានសម្លាប់ប្អូនស្រី ចេវ សុវឌ្ឍនា។
សូមបងប្អូនពិចារណាមើលចុះថា បើខ្ញុំនិងបងប្រុសខ្ញុំ បានសម្លាប់ប្អូនស្រី ចេវ សុវឌ្ឍនាមែននោះ ម្ល៉េះក្រោយពីគេដកតំណែងខ្ញុំ ចេញពីអភិបាលខេត្ត ហើយក្រសួងមហាផ្ទៃបើកការស៊ើបអង្កេតនោះ ខ្ញុំនិងបងប្រុសខ្ញុំ រត់ចេញទៅក្រៅប្រទេសសុំសិទ្ធិជ្រកកោននយោបាយពីស្ថានទូតបរទេសបាត់ទៅហើយ។ ខ្ញុំនៅទីនេះ មិនរត់ចោលគណបក្សប្រជាជនកម្ពុជា និងប្រទេសជាតិរបស់ខ្ញុំទេ។ ស្អែកនេះ ខ្ញុំនៅខេត្តតាកែវ ដើម្បីចូលរួមពិធីផ្ទេរមុខតំណែង ប្រធានគណៈកម្មាធិការគណបក្សប្រជាជនខេត្តតាកែវ ពីខ្ញុំ ឲ្យទៅឯកឧត្តម អ៊ូច ភា ដែលជាអភិបាលថ្មីខេត្តតាកែវយើង ក្រោមអធិបតីភាពលោកឧបនាយករដ្ឋមន្ត្រីប្រចាំការ ប៊ិន ឈិន។
ពេលខ្ញុំនៅធ្វើជាអភិបាលខេត្តតាកែវ ខ្ញុំបានដោះស្រាយរកយុត្តិធម៌រាប់មិនអស់ ករណីជូនប្រជាពលរដ្ឋរបស់ខ្ញុំ។ ខ្ញុំក៏សង្ឃឹមជឿជាក់ថា យុត្តិធម៌នឹងមានសម្រាប់រូបខ្ញុំ និងបងប្រុសខ្ញុំ ឡាយ ណារិទ្ធ។ សូមបងប្អូនប្រជាពលរដ្ឋទាំងអស់ ពិសេសបងប្អូនប្រជាពលរដ្ឋខេត្តតាកែវ ជឿជាក់ចុះថាខ្ញុំ ឡាយ វណ្ណៈ មិនរត់ចោលបងប្អូនទេ”។
មន្ត្រីនគរបាលខេត្តតាកែវ បានអះអាងថា ជាករណីអ្នកស្រី ចេវ សុវឌ្ឍនា ចងកធ្វើអត្តឃាត ព្រោះវិបត្តិស្នេហា បន្ទាប់ពីគេបានឃើញកាបូបយួរដៃ ស្ថិតនៅលើតុក្បែរជញ្ជាំងពីខាងកើតគ្រែដេក និងមានស្រោមសំបុត្រ ពណ៌គគីរ ហែកដាច់ជាពីរផ្ទាំង និងមានសំបុត្រមួយច្បាប់ រហែកជា២បំណែក បានរកឃើញនៅក្នុងកាបូបយួរដៃរបស់អ្នកមេម៉ាយ ដោយសរសេររៀបរាប់ពីរឿងវិបត្តិស្នេហាផ្ទាល់ខ្លួន ។ សំបុត្រមួយច្បាប់ ដែលនគរបាលចាត់ទុកថា ជាសំបុត្រអ្នកស្រី ចេវ សុវឌ្ឍនា សរសេរដោយដៃ បានសរសេររៀបរាប់ថា សេចក្តីសំបុត្រ ៖ “ជីវិតស្រីម្នាក់នេះ ជ្រើសរើសយកបង មិនប្រាថ្នាអ្វីក្រៅពីក្តីស្រឡាញ់ម្យ៉ាងគត់ ។ លះបង់គ្រប់យ៉ាង ព្រោះតែថា ស្រឡាញ់អូនជាប្រពន្ធទី២ប៉ុណ្ណោះ ។ អូនខាំមាត់សង្កត់ចិត្ត ទោះជាគេមើលងាយគ្រប់គ្នា ជេរដៀលគ្រួសារក៏ដោយ សុខចិត្តធ្វើគ្រប់យ៉ាងឲ្យតែបាននៅជិតបង ។ តែអ្វីដែលអូនជ្រើសរើសរហូតមានតែទឹកភ្នែក ការជេរប្រចោរ វាយដំយកឈ្នះចាញ់ ខុសពីអ្វីដែលបានសន្យា កាលគ្រាដំបូង ។ ព្រោះតែការសន្យា ទើបធ្វើឲ្យអូនស្រឡាញ់ ហើយលះបង់គ្រប់យ៉ាងធ្វើជាប្រពន្ធទី២ ដែលសង្គមមិនទទួលស្គាល់ ។ គេមើលងាយយ៉ាងណា ក៏ខាំមាត់សង្កត់ចិត្ត ព្រោះតែស្រឡាញ់ មុនថ្ងៃប្រែក្លាយ តែមកដល់ពេលនេះ ទើបអូនដឹងថា បងយកអូនជាស្ត្រីលេងសើច បងដឹងទេថា អូនឈឺចាប់ខ្លាំងណាស់ ។ គ្មាននរណាអាចឈរមើលប្តីជាទីស្រឡាញ់ ក្បត់ហើយស្រឡាញ់អ្នកផ្សេង ក្បត់សន្យានោះទេ ។ ដឹងទេថា អូនឈឺចាប់ណាស់ ។ ហើយមិនចង់រៀបរាប់អ្វីច្រើនជាងនេះ អូនដឹងត្រឹមថា បងស្រឡាញ់គ្រួសារបង ជាងអ្វីដែលអូនសុំត្រឹមជាមនុស្សទី២ សម្រាប់បងៗលេងសើច ។ ស្រីគ្រប់គ្នា មិនខ្វល់ពីការឈឺចាប់ ស្រីម្នាក់លះបង់ ដើម្បីបងគ្រប់យ៉ាង មិនចង់បានអ្វីនោះទេ ។ គ្រប់យ៉ាងព្រោះតែស្រឡាញ់ ។ ការឈឺចាប់នៅពេលនេះព្រោះតែស្រឡាញ់តែម្យ៉ាងគត់ ។ ខ្ញុំនឹងដើរចេញពីជីវិតបង ដូចដែលបងចង់បាន ទោះជាខ្ញុំត្រូវឈឺចាប់យ៉ាងណាក៏ដោយ ឲ្យតែជាសេចក្តីសុខបងគ្រប់យ៉ាង ព្រោះតែស្រឡាញ់ និងការឈឺចាប់ដែលបងផ្តល់ឲ្យ ។ អរគុណគ្រប់យ៉ាងព្រោះតែចង់បានក្តីសុខ តែផ្ទុយទៅវិញមានតែទឹកភ្នែក ប្តីមិនស្រឡាញ់ គ្រប់យ៉ាងមានតែស្រីក្បត់ ថោកទាប មិនស្មោះត្រង់តែប៉ុណ្ណោះ ។ ខ្ញុំមិនស្តាយក្រោយទេ ដែលជ្រើសរើសយកបង តែសូមបងគិតឡើងវិញថា បងបានធ្វើទង្វើអ្វីខ្លះមកលើស្រីម្នាក់នេះ តាំងពីដំបូងមកដល់ឥឡូវ ទោះជាពេលនេះ បងអស់ក្តីស្រឡាញ់ បងមានតែភាពធុញទ្រាន់យ៉ាងណា តែអូននៅមិនភ្លេចសន្យាកាលគ្រាដើម។ ទោះជាយ៉ាងណានៅតែស្រឡាញ់ លុយមិនសំខាន់ទេ សម្រាប់មនុស្សស្រីម្នាក់នេះ សម្តីបងគ្រប់យ៉ាង ពិតជាធ្វើឲ្យអូនឈឺចាប់ គ្មានអ្វីនឹងនិយាយតបបាននោះទេ ។ មនុស្សជុំវិញខ្លួនមើលងាយខ្ញុំ ធ្វើបាបខ្ញុំយ៉ាងណា បងមិនឲ្យតម្លៃ និងមើលងាយខ្ញុំ ដោយនិយាយធ្វើបាបចិត្តខ្ញុំ “។
អ្នកនាំពាក្យក្រសួងមហាផ្ទៃ លោក ខៀវ សុភ័ក បានថ្លែងថា តាមការស៊ើបអង្កេតរបស់សមត្ថកិច្ច ករណីឃាតកម្មលើស្ត្រីស្រស់នៅក្រុងដូនកែវ ឈ្មោះ ចេវ សុវឌ្ឍនា អាចជាប់ពាក់ព័ន្ធនឹងលោក ឡាយ វណ្ណៈ អតីតអភិបាលខេត្តតាកែវ។ “តាមការស៊ើបអង្កេតរបស់សមត្ថកិច្ច និងចម្លើយសារភាព ករណីឃាតកម្មនៅតាកែវ ទំនងអាចជាប់ពាក់ព័ន្ធនឹងលោក ឡាយ វណ្ណៈ ប៉ុន្តែយ៉ាងណានោះសូមរង់ចាំលទ្ធផលពីស្ថាប័នតុលាការសិន”។
ពាក់ព័ន្ធនឹងរឿងដ៏រស៊ើបនេះបើតាមរបាយការណ៍កម្លាំងសមត្ថកិច្ច បានឲ្យដឹងថា ជនសង្ស័យទាំងនោះមានឈ្មោះ ចាន់ រី ភេទស្រី និងប្តីឈ្មោះ ជឹម វុធ ជាអ្នកបម្រើនៅផ្ទះអ្នកស្រី ចេវ សុវឌ្ឍនា ឈ្មោះ មេន សម័យ អ្នកបើកឡានឲ្យលោក ឡាយ វណ្ណៈ និងឈ្មោះ តាក់ រតនា ជាអ្នកបើកឡានឲ្យលោក ឡាយ ណារិទ្ធ ។ ក្នុងរបាយការណ៍របស់សមត្ថកិច្ច បានធ្វើការចោទប្រកាន់ជនសង្ស័យទាំង៥នាក់ ពីបទ លាក់បាំងបទល្មើសមិនរាយកាណ៍ឲ្យសមត្ថកិច្ច។
ជនសង្ស័យទាំង៥នាក់នេះ គឺស្ថិតក្នុងចំណោម៨នាក់ ដែលត្រូវបាននគរបាលនាយកដ្ឋានព្រហ្មទណ្ឌ ក្រសួងមហាផ្ទៃឃាត់ខ្លួន កាលពីថ្ងៃទី២៩ ខែមីនា ឆ្នាំ២០១៨ ដើម្បីសួរនាំជុំវិញករណីអ្នកស្រី ចែវ សុវឌ្ឍនា អាយុ៣៦ឆ្នាំ មេម៉ាយកូន៣នាក់ ដែលត្រូវបានគេប្រទះឃើញចងកក្នុងបន្ទប់ដេក នៃផ្ទះជួលដ៏ធំរបស់ខ្លួន ក្នុងភូមិផ្សារតាកោរ សង្កាត់រការក្នុង ក្រុងដូនកែវ ខេត្តតាកែវ កាលពីល្ងាចថ្ងៃទី២៦ ខែមករា ឆ្នាំ២០១៨កន្លងទៅ៕ ដោយ៖បញ្ញាស័ក្តិ