តាកែវ៖ លោក ឡាយ វណ្ណៈ អតីតអភិបាលខេត្តតាកែវ ត្រូវបានកម្លាំងសមត្ថកិច្ចចាប់ឃាត់ខ្លួនហើយ នៅម៉ោង១៥៖៣០នាទី ថ្ងៃទី១ ខែមេសា ឆ្នាំ២០១៨នេះ តាមដីកាបង្គាប់ឲ្យចូលខ្លួន របស់សាលាដំបូងរាជធានីភ្នំពេញ ពាក់ព័ន្ធករណីឃាតកម្មដ៏អាថ៌កំបាំងសម្លាប់ស្រីកំណាន់របស់ខ្លួន នៅក្រុងដូនកែវ ខេត្តតាកែវ។
ដីកាបញ្ជាឲ្យចូលខ្លួនរបស់លោកសៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានបញ្ជាឲ្យកម្លាំងមានសមត្ថកិច្ចនាំខ្លួនបុគ្គល លោក ឡាយ វណ្ណៈ ភេទប្រុស អាយុ៤៥ឆ្នាំ មុខរបរ មន្ត្រីក្រសួងមហាផ្ទៃ (អតីតអភិបាលខេត្តតាកែវ) ដែលមានទីលំនៅបច្ចុប្បន្ន ភូមិ២ សង្កាត់រកាក្នុង ក្រុងដូនកែវ ខេត្តតាកែវ មកបង្ហាញខ្លួននៅនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិ ឲ្យបានមុនថ្ងៃទី២០ខែមេសាឆ្នាំ២០១៨ ដើម្បីសាកសួរពីដំណើររឿង ឃាតកម្ម កាលពីថ្ងៃទី២៦ខែមករាឆ្នាំ២០១៨ នៅចំណុចផ្ទះជួល ភូមិផ្សារតាកោ សង្កាត់រកាក្នុង ក្រុងដូនដែវ ខេត្តតាកែវ។ យោងតាមដីកានេះ អតីតអភិបាលខេត្តតាកែវរូបនេះ ត្រូវបានចាប់ឃាត់ខ្លួននៅមុខវិទ្យាល័យ ជា ស៊ីម ស្ថិតក្នុងសង្កាត់រការក្នុងក្រុងដូនកែវ នៅចំងាយប្រមាណ១៥០ម៉ែត្រ ពីកន្លែងប្រារព្ធពិធីផ្ទេរប្រធានគណបក្សខេត្តតាកែវ។ លោក ឡាយ វណ្ណៈ រួមជាមួយអង្គរក្ស ចំណែកកម្លាំងសមត្ថកិច្ចមានគ្នា៤-៥រថយន្ត បានឃាត់រថយន្តរបស់លោក ឡាយ វណ្ណៈ និងបានប្រគល់ដីកាចាប់ខ្លួន ហើយនាំលោក ឡាយ វណ្ណៈ មកកាន់រថយន្តសមត្ថកិច្ចនាំមកទៅកាន់រាជធានីភ្នំពេញ។
នៅពេលឃាត់ខ្លួន ព្រះរាជអាជ្ញា ក៏បានបង្ហាញដីកាបង្គាប់ឲ្យនាំខ្លួនលោក ឡាយ វណ្ណៈ ហើយនាំខ្លួនមកកាន់រថយន្តសមត្ថកិច្ច ដើម្បីនាំយកទៅកាន់រាជធានីភ្នំពេញ៕ ដោយ ៖ បញ្ញាស័ក្តិ