Tiangong-1មានទំងន់៨តោន ប្រើសម្រាប់បទពិសោធន៍ផ្នែកវេជ្ជសាស្ត្រ។ តាមក្រុមជំនាញអវកាសចិន ការបង្កគ្រោះថ្នាក់ ដោយស្ថានីយអវកាស Tiangong1 មាន ស្ទើរកម្រិតសូន្យ ដោយសារតែស្ថានីយនេះធ្លាក់ក្នុងល្បឿនលើសលុប ដូច្នេះ វាបង្កជាកំដៅធ្វើអោយឆេះស្ថានីយស្ទើរទាំងស្រុង។ បើតាមខាងអវកាស ការឆេះធ្លាក់មកនេះ ដូចជាទស្សនីយភាពភ្លៀងអាចម៍ផ្កាយ ធ្លាក់មកផែនដីដូច្នោះដែរ។
ស្ថានីយអវកាសចិន Tiangong-1 ( វិមានសួគ៌ា )ត្រូវបានបង្ហោះទៅតារាវីថី តាំងតែពីខែកញ្ញាឆ្នាំ២០១១។
តាមក្រុមជំនាញ Tiangong-1 ជាយានធំបំផុតមួយ ដែលត្រលប់មកបរិយាកាសផែនដីវិញដោយគ្មានការត្រួតពិនិត្យ។
គេចាត់ទុកថា បទពិសោធន៍ចិនជាមួយស្ថានីយមួយនេះ ថាជាដំណាក់កាលដំបូង ដើម្បីឈានទៅដល់ការសាងសង់ស្ថានីយអវកាសអន្តរជាតិ។ ចិនមានមហិច្ឆតា បញ្ជូនយានអវកាសទៅភពព្រះអង្គារ នៅឆ្នាំ២០២០។ ចិនក៏ចង់បញ្ជូនមនុស្សទៅឋានព្រះចន្ទដែរ។
Tiangong1 ធ្លាប់ទទួលក្រុមអវកាសចិន២លើកហើយ។ តាមធម្មតា ការត្រលប់នៃស្ថានីយអវកាស Tiangong1 ចូលផែនដីវិញ ត្រូវស្ថិតក្រោមការត្រួតពិនិត្យរបស់ចិន។ ប៉ុន្តែ បើយោងតាមខាងអវកាសអឺរ៉ុប ចិនបានបាត់ទំនាក់ទំនងជាមួយ Tiangong-1 តាំងពីដើមឆ្នាំ២០១៦មក។ ដូច្នេះ ចិនមិនអាចត្រួតបញ្ជាដំណើររបស់ Tiangong-1បានទេ។ ក្រុងប៉េកាំងបានបដិសេធការចោទប្រកាន់របស់អឺរ៉ុប។ បើតាមព័ត៌មានដែលទីភ្នាក់ងារAFP ចុះផ្សាយវិញ Tiangong1 ឈប់ដំណើរការតាំងពីខែមីនា ឆ្នាំ២០១៦ ទើបបានជាធ្វើអោយគេបារម្ភពីដំណើរធ្លាក់ចុះរបស់វា មកផែនដីវិញដូច្នេះ។
៦០ឆ្នាំមកនេះ ក្នុងបទពិសោធន៍អវកាសរបស់មនុស្ស មានយានអវកាសប្រហែល៦០០០គ្រឿង បានត្រលប់មកបរិយាកាសផែនដីវិញ ដោយគ្មានការត្រួតពិនិត្យ។
៦០ឆ្នាំមកនេះ មានមនុស្សម្នាក់ បានរងការប៉ះនៃបំណែកយានដែលធ្លាក់ចុះមកនោះ ប៉ុន្តែ គាត់នោះមិនបានរងរបួសទេ៕ សូយន
