ក្រុមប្រឹក្សាសន្តិសុខ នៃអង្គការសហប្រជាជាតិ បានដាក់ទណ្ឌកម្ម កប៉ាល់ដឹកទំនិញចំនួន២៧ គ្រឿង និង ក្រុមហ៊ុនចំនួន ២១ ចូលក្នុងបញ្ជីខ្មៅរបស់ខ្លួន ដោយហេតុថា ពួកគេបានលួចរកស៊ីជាមួយកូរ៉េខាងជើង បំពាននឹងការដាក់ទណ្ឌកម្មរបស់អ.ស.ប។ គួរបញ្ជាក់ថា អ.ស.ប នៅតែបន្តដាក់សម្ពាធទៅលើកូរ៉េខាងជើង បើទោះជាប្រទេសនេះ បានបន្ទន់ឥរិយាបទ ចង់វិលរកការចរចារក៏ដោយ។
ឆ្លើយតបនឹងការស្នើរបស់អាមេរិក អ.ស.ប បានដាក់ចូលក្នុងបញ្ជីខ្មៅរបស់ខ្លួននូវឈ្មោះ កប៉ាល់ ដឹកទំនិញ ចំនួន ២៧ គ្រឿង ក្រុមហ៊ុនចំនួន២១ ព្រមទាំងអ្នកជំនួញម្នាក់ផង ដែលនៅតែបន្តលួចរកស៊ីជាមួយប្រទេសកូរ៉េខាងជើង។ តាមពិតទៅ សហរដ្ឋអាមេរិកបានស្នើឲ្យ អ.ស.ប ហាមឃាត់ កប៉ាល់ចំនួន៣៣ និង ក្រុមហ៊ុនចំនួន ២៧ ឯណោះ ទាក់ទងនឹងការលួចរត់ពន្ធជាមួយកូរ៉េខាងជើង តែចិន បានសុំពិនិត្យមើល បញ្ជីស្នើសុំ របស់អាមេរិកជាមុនសិន មុនមានការសម្រេចណាមួយកើតឡើង។
បើតាម របាយរាយណ៏មួយ ចេញផ្សាយដោយ អ.ស.ប នាពេលថ្មីៗនេះបានបង្ហាញ កាលពីឆ្នាំកន្លងទៅ កូរ៉េខាងជើង អាចរកប្រាក់ចំនូលបានរហូតដល់ ២០០ លាន ដូលា្លរ សហរដ្ឋអាមេរិក តាមរយៈការនាំចេញធ្យូងថ្ម ដែកថែប និងទំនិញផ្សេងៗ ដែលត្រូវបានហាមឃាត់។
ឯកអគ្គរដ្ឋទូត សហរដ្ឋអាមេរិក ប្រចាំ អ.ស.ប លោកស្រី Nikki Haley បានធ្វើការស្វាគមន៍ភ្លាមៗ ចំពោះការដាក់ ទណ្ឌកម្ម ទៅលើប្រទេសមានមហិច្ឆតាផលិតអាវុធនុយក្លេអ៊ែរ ដូចជា កូរ៉េខាងជើង។ សម្រាប់ អាមេរិក ការបន្ត ដាក់ទណ្ឌកម្ម នេះ គឺជាសញ្ញាប្រាប់ថា សហគមន៍អន្តរជាតិរួមកម្លាំងគ្នាដាក់សម្ពាធលើរដ្ឋាភិបាលក្រុងព្យុងយ៉ាង។
ក្នុងកំឡុងឆ្នាំ ២០១៦-២០១៧ ក្រុមហ៊ុន កូរ៉េជើងចំនួន ១២ ត្រូវបានដាក់ចូលក្នុងបញ្ជីខ្មៅ ។ ក្រៅពីនេះ ក៏មានក្រុមហ៊ុនរបស់ចិន សាំងហ្គាពួរ ប៉ាណាម៉ា សាម៉ូអា និង ប្រទេសប្រជុំកោះ Marshall មួយចំនួនផងដែរ ត្រូវបានគេបញ្ចូលក្នុងបញ្ជីខ្មៅរបស់អ.ស.ប ៕