ប្រធានរដ្ឋចិន ស៊ី ជិនពៀន តាម KBS World នៅថ្ងៃទី ១ មេសា ម្សិលមិញនេះ ទីភ្នាក់ងារសារព័ត៌មានរបស់ជប៉ុន Kyodo បានចុះផ្សាយព័ត៌មានថា ប្រធានរដ្ឋចិន ស៊ី ជិនពៀន ធ្លាប់បានផ្តើមសំណើរទៅកាន់ប្រធានាធិបតីអាមេរិក Donald Trump ចំពោះការដែលប្រទេសកូរ៉េទាំងពីរគប្បីចុះហត្ថលេខាលើសន្ធិសញ្ញាសន្តិភាពមួយជំនួសឲ្យសន្ធិសញ្ញា ផ្អាកសង្គ្រាមបច្ចុប្បន្ននេះ ។
តាមនោះលោកស៊ី ជិនពៀន បានផ្តើមសំណើរខាងលើ តាមរយៈការសន្ទនាទូរស័ព្ទជាមួយប្រធានាធិបតី Trump នៅថ្ងៃ ០៩ មីនា កន្លងមក ។
គួររំលឹកថា កាលពីខែកក្កដា ឆ្នាំ ១៩៥៣ កូរ៉េខាងជើង ចិន រួមជាមួយគណៈបញ្ជាការអង្គការសហប្រជាជាតិ បានចុះហត្ថលេខាលើសន្ធិសញ្ញាផ្អាកសង្គ្រាមមួយ ដើម្បីបង្អាកជាបណ្តោះអាសន្នសង្គ្រាមដែលកំពុងផ្ទុះឡើងនៅឧបទ្វីបកូរ៉េ ។ តាមក្យូដូដដែលដែលបានដកស្រង់ប្រភពព័ត៌មានការទូតនៅអាមេរិក និងចិនឲ្យដឹងថា លោកស៊ី ជិនពៀន បានផ្តើមសំណើរឲ្យយកសន្ធិសញ្ញាសន្តិភាពជំនួសឲ្យសន្ធិសញ្ញាផ្អាកសង្គ្រាមបណ្តោះអាសន្ន ។
ទោះយ៉ាងណាលោក Trump ពុំបានមានចម្លើយជាក់លាក់អ្វីទេ នៅពេលនោះដោយគ្រាន់តែស្នើសុំឲ្យចិនបន្តរក្សាសម្ពាធចំពោះកូរ៉េខាងជើង៕ ចន្ទ្រា