ភ្នំពញ ៖ នៅថ្ងៃទី១ ខែមេសា ឆ្នាំ២០១៨នេះ ជាថ្ងៃប្រវត្តិសាស្ត្រថ្មីមួយទៀតហើយ ដែលរថភ្លើងមួយខ្សែបានបើកចូល ទៅកាន់ស្ថានីយទើបសាងសង់ថ្មី នៅក្នុងអាកាសយានដ្ឋានអន្តរជាតិភ្នំពេញ ដើម្បីសាកល្បងមើលសិន មុនដំណើរការផ្លូវការ ឲ្យបានមុនឱកាសបុណ្យចូលឆ្នាំថ្មីប្រពៃណីជាតិខាងមុខ។
ក្រសួងសាធារណការ នឹងដាក់ឲ្យដំណើរផ្លូវដែកថ្មី ចូលព្រលានយន្តហោះនេះ នឹងដាក់ឲ្យប្រើប្រាស់រថភ្លើងចំនួន ៣គ្រឿង ដែលបញ្ជាទិញពីប្រទេសម៉ិចស៊ិក។ការដំណើរតាមរថភ្លើងពីស្ថានីយរថភ្លើងក្នុងរាជធានីភ្នំពេញ ទៅកាន់ព្រលានយន្តហោះអន្តរជាតិភ្នំពេញ ចំណាយពេលត្រឹមតែ ២០-២៥នាទី។ នៅក្នុងរថភ្លើងមានដាក់ម៉ាស៊ីនត្រជាក់ ហើយប្រជាពលរដ្ឋដែលរស់នៅក្បែរព្រលានយន្តហោះ ហើយចង់ឡើងមករាជធានីភ្នំពេញ ក៏អាចប្រើប្រាស់រថភ្លើងនេះបានដែរ។
បើតាមគណនី Facebook របស់ក្រសួងសាធារណការ និងដឹកជញ្ជូន កាលពីថ្ងៃទី១ខែមេសាឆ្នាំ២០១៨ បានឲ្យដឹងថា “អស្ចារ្យ! ថ្ងៃ១ មេសា ២០១៨ វេលាម៉ោង ១៤:៤៥នាទី នេះ ជាពេលវេលាដែររថភ្លើងដំបូងបង្អស់បានបើក ចូលទៅកាន់ស្ថានីទើបសាងសង់ថ្មី នៅអាកាសយានដ្ឋានអន្តរជាតិភ្នំពេញ។ ផ្លូវដែកឆ្លងកាត់តាមបណ្តោយមហាវិថីសហព័ន្ធរុស្ស៊ីនេះមានប្រវែងប្រមាណ ១៦០០ម៉ែត្រ តភ្ជាប់ពីផ្លូវដែកស្ថានីយអាយស្ម័យយានភ្នំពេញ ដែលមានស្រាប់ មកកាន់ស្ថានីយថ្មី នៅអាកាសយានដ្ឋានអន្តរជាតិភ្នំពេញ។ ជាមួយនឹងការដឹកជញ្ជូនថ្មីក្នុងរាជធានីភ្នំពេញនេះ នឹងជួយសម្រួលដល់ អ្នកដំណើរ ទៅព្រលានយន្តហោះ មិនមានការព្រួយបារម្ភបញ្ហាកកស្ទះ និងគ្រោះថ្នាក់ចរាចរណ៍ឡើយ។ ចុះពិនិត្យការដ្ឋានតភ្ជាប់ផ្លូវដែក ចូលអាកាសយានដ្ឋានអន្តរជាតិភ្នំពេញ គ្រោងដាក់ដំណើរការ មុនចូលឆ្នាំខ្មែរ ខាងមុខនេះ”។
សូមបញ្ជាក់ថា កាលពីយប់ថ្ងៃទី៩ ខែមីនា ឆ្នាំ២០១៨ លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងឃួង ស្រេង អភិបាលរាជធានីភ្នំពេញ បានចុះពិនិត្យការដ្ឋានផ្លូវដែកតភ្ជាប់ ពីស្ថានីយអាយស្ម័យយានភ្នំពេញ ចូលអាកាសយានដ្ឋានអន្តរជាតិភ្នំពេញ ត្រង់ទីតាំងកំណាត់ផ្លូវដែកឆ្លងកាត់មហាវិថីសហព័ន្ធរុស្ស៊ី។
ផ្លូវដែកដែលកំពុងសាងសង់នេះមានប្រវែងប្រមាណ ១៦០០ម៉ែត្រ តភ្ជាប់ពីផ្លូវដែកដែលមានស្រាប់ មកកាន់ស្ថានីយកំពុងរៀបចំថ្មី នៅអាកាសយានដ្ឋាន។ បច្ចុប្បន្នសម្រេចបាន ប្រមាណ ១៣០០ម៉ែត្រ គិតចាប់ពីដើមខែមករាឆ្នាំ២០១៨ ខណៈដែលស្ថានីយថ្មីនៅក្នុងអាកាសយានដ្ឋាន កំពុងដំណើរការសាងសង់ ដើម្បីដាក់ឲ្យដំណើរការ មុនចូលឆ្នាំថ្មីប្រពៃណីជាតិខ្មែរ តាមការគ្រោងទុក។
ជាមួយនឹងការដឹកជញ្ជូនថ្មីក្នុងរាជធានីភ្នំពេញនេះ នឹងជួយសម្រួលដល់ អ្នកដំណើរ ទៅព្រលានយន្តហោះ មិនមានការព្រួយបារម្ភបញ្ហាកកស្ទះ និងគ្រោះថ្នាក់ចរាចរណ៍ឡើយ។
អ្វីដែលពិសេស គឺផ្លូវប្រមាណជាង ១គីឡូម៉ែត្រនេះត្រូវបានពង្រីក ទទឹងដល់ទៅ ១៤ម៉ែត្រ មានផ្លូវរថភ្លើងកណ្តាល បង្កប់ក្រោមថ្នល់បេតុង ដែលអនុញ្ញាតឲ្យយានយន្តធ្វើចរាចរណ៍ លើនោះបានដោយមិនមានការព្រួយបារម្ភ។ ដោយឡែកត្រង់កំណាត់ឆ្លងកាត់ផ្លូវសហព័ន្ធរុស្ស៊ី ត្រូវបានបង្កប់ ក្នុងកៅស៊ូអេស៊ីផងដែរ។
ដើម្បីចូលរួមកាត់បន្ថយការកកស្ទះចរាចរណ៍ ក្រុមការងារអនុវត្តការងារសាងសង់ផ្លូវដែកតែពេលយប់ប៉ុណ្ណោះ។
រថភ្លើងដែលនឹងដាក់ដំណើរការផ្លូវការ គឺកំពុងរៀបចំនីតិវិធីនាំមកមកពីប្រទេស ម៉ិចស៊ីកូ មានបីការ៉ុង ផ្ទុកអ្នកដំណើរប្រមាណ ១៥០នាក់ មានសុវត្ថិភាពខ្ពស់ និងផាសុខភាព ក្នុងការធ្វើដំណើរ។
ក្រៅពីនេះក្រសួង ក៏នឹងសិក្សាលទ្ធភាព ស្នើការសហការពីលេខាធិការដ្ឋានអាកាសចរណ៍ស៊ីវិល ដើម្បីអនុញ្ញាតឲ្យ មានការកត់ត្រាចូល (Check in) អីវ៉ានរបស់អ្នកដំណើរតាមយន្តហោះ ពីស្ថានីយរថភ្លើងភ្នំពេញ ដើម្បី ដឹកជញ្ជូនអីវ៉ានតាមរថភ្លើង ដាក់ចូលក្នុងយន្តហោះតែម្តង៕ ដោយ ៖ បញ្ញាស័ក្តិ
