កណ្តល ៖ បុរសម្នាក់បានដើរទាក់ខ្សែលួសដែលគេរាយឆក់កណ្តុរបណ្តាលឲ្យស្លាប់ភ្លាមៗនៅហ្នឹងកន្លែង ចំណែកអ្នកដែលរាយខ្សែលួសនោះ ក្រោយដឹងហេតុការណ៍នេះ បានរត់គេចខ្លួនបាត់។ ហេតុការណ៍កើតឡើងកាលពីរំលងអធ្រាត្រថ្ងៃទី៣១ ខែមីនា ឆ្នាំ២០១៨ នៅចំណុចជើងទំនប់ប្រឡាយតាសែនតូចក្បាលដីស្រែប្រាំងរបស់ឈ្មោះ អ៊ុយ ណាំគា ភូមិឈើទាល ឃុំព្រែកអញ្ចាញស្រុកមុខកំពូល ខេត្តកណ្តាល។
សមត្ថកិច្ចបានឲ្យដឹងថា ជនរងគ្រោះឈ្មោះ ប៉ុន រ៉ន អាយុ២៨ឆ្នាំ នៅភូមិឈើទាល ឃុំ ព្រែកអញ្ចាញ ស្រុកមុខកំពូល ខេត្តកណ្តាល មុខរបរកសិករ។ ចំណែកជនងសង្ស័យឈ្មោះ វ៉ាន់នី វណ្ណរាប ភេទប្រុស អាយុ២៦ឆ្នាំ នៅភូមិថ្មីឃុំស្វាយអំពារ ស្រុកមុខកំពូល ខេត្តកណ្ដាល(គេចខ្លួន)។ វត្ថុតាងចាប់យកបានរួមមានៈ ម៉ូទ័រ ចំនួន១, អាគុយ ម៉ាក33C 70អំពែពណ៌ខ្មៅចំនួន០១ ខ្សែលួសពណ៌ស១ដុំប្រវែង៣០០ម៉ែត្រ។
សមត្ថកិច្ចបានបន្តថាកាលពីថ្ងៃទី៣០ ខែមីនា ឆ្នាំ២០១៨ វេលាម៉ោង២២និង១០នាទី ជនរងគ្រោះបានផឹកស៊ីបន្តិចបន្តួចនៅផ្ទះរបស់ឈ្មោះ គុល កែម ជាមួយឈ្មោះ កែម រ៉ុន និងឈ្មោះកែម តាក ក្រោយពីផឹកស៊ីរួចឈ្មោះប៉ុន រ៉នបានបបួលឈ្មោះ កែម រ៉ុនទៅមើលម៉ាស៊ីនបូមទឹកដាក់ឈូកនៅចំណុចតាសែនដោយជនរងគ្រោះជិះម៉ូតូរបស់ខ្លួនម៉ាកស៊ីរុសឌុប ឈ្មោះកែម រ៉ុនចេញពីផ្ទះទៅ។ ពេលទៅដល់ឈ្មោះកែមរ៉ុន ទៅមើលម៉ាស៊ីនបូមទឹក របស់ខ្លួន ចំណែកជនរងគ្រោះក៏ដើរទៅមើលចំការឈូករបស់ខ្លួនដែរ រហូតដល់ម៉ោងប្រហែល០០និង០០នាទីឈ្មោះ កែម រ៉ុន បានដើរទៅហៅជនរងគ្រោះដើម្បីត្រឡប់ទៅផ្ទះវិញ ស្រាប់តែឃើញជនរងគ្រោះដេកដួលនៅក្បែរចំការឈូកជាប់ផ្លូវ ឃើញដូចនេះឈ្មោះ កែម រ៉ុន ក៏ស្ទុះទៅជួយដោយស្ទាបដង្ហើមឃើញថាជនរងគ្រោះបានដាច់ខ្យល់ស្លាប់បាត់ទៅហើយ បន្ទាប់មកក៏បានទូរស័ព្ទទៅឈ្មោះ ផ្លយ ឲ្យមកប្រាប់ប្រពន្ធជនរងគ្រោះឲ្យមកយកប្ដីនៅចំណុចចំការឈូកថា ប្ដីដេកដួលស្លាប់មិនដឹងមូលហេតុអ្វីទេ។ មួយសន្ទុះក្រោយមក ទើបប្រពន្ធនិងបង ប្អូនបានយករ៉ឺម៉កម៉ូតូដឹកសពជនរងគ្រោះយកទៅគ្លីនិកប៉ៃលិន តែគ្រូពេទ្យបាន ប្រាប់ថាជនរងគ្រោះបានស្លាប់បាត់ទៅហើយ រួចក៏ដឹកសព ជនរងគ្រោះត្រឡប់មកផ្ទះវិញតែម្ដង។
នគរបាលប៉ុស្តិ៍រដ្ឋបាលព្រែកអញ្ចាញ បានសហការជាមួយផ្នែកជំនាញយុត្តិធម៌និងអាជ្ញាធរមូលដ្ធានបានចុះធ្វើការពិនិត្យសាសពជនរងគ្រោះឃើញមានស្លាកស្នាមៈ ទ្រុតនៅលើស្បែកទ្រូងខាងស្ដាំ ស្នាមរលាត់ស្បែកនៅលើពោះខាងឆ្វេង (ដោយសារក្រចកដៃអ្នកជួយលើក អូសជនរងគ្រោះ) ស្នាមទ្រុតនៅលើស្បែកខ្នងកដៃខាងស្ដាំ ស្នាមមុតមេជើងស្ដាំប្រវែង២,៥សង់ទីម៉ែត្រ ស្នាមខ្លោចឆ្អាខ្មៅលើទ្រូងស្ដាំ ១កន្លែងប្រវែង៧សង់ទីម៉ែត្រនិងមួយកន្លែងទៀតប្រវែង៤សង់ទីម៉ែត្រ។
ការសន្និដ្ឋានយោងតាមការស្រាវជ្រាវនិងការពិនិត្យហេតុជាក់ស្ដែងរបស់ផ្នែកជំនាញនគរបាលយុត្តិធម៌ធ្វើការសន្និដ្ឋានបានថាជនរងគ្រោះស្លាប់ដោយសារឆក់ថរន្តអគ្គិសនី ឧបករណ៍ឆក់សត្វកណ្ដុរ ពិតប្រាកដមែន៕ ដោយ ៖ បញ្ញាស័ក្តិ