ត្បូងឃ្មុំ ៖ ម្តាយ រួមទាំងកូនប្រុស ២នាក់ ត្រូវបានឃាតករកាប់សម្លាប់នៅលើផ្ទះស្លាប់យ៉ាងអណោចអធ័ម ខណៈឃាតករត្រូវបានគេសង្ស័យថា ជាប្តីចុងដែលទើបរៀបការ ព្រោះក្រោយកើតហេតុ ប្តីចុងរូបនោះ បានប្រមូលទ្រព្យសម្បត្តិ រត់បាត់ ។
ហេតុការណ៍ឃាតកម្មដ៏សាហាវបានកើតឡើងនៅភូមិដូង ឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ កាលពីយប់ថ្ងៃទី៣១ ខែមីនា ឆ្នាំ២០១៨។
មន្ត្រីនគរបាលប៉ុស្តិ៍រដ្ឋបាល ឃុំថ្មពេជ្រ បានឲ្យដឹងថា ហេតុការណ៍នេះ បានកើតឡើងតាំងពីយប់មកម្ល៉េះ លុះមកដល់ម៉ោង ប្រមាណ១២ ថ្ងៃត្រង់ ថ្ងៃទី១ ខែមេសា ឆ្នាំ២០១៨ ទើបមានប្រជាពលរដ្ឋមករាយការណ៍ថា គ្រួសារឈ្មោះ ឃាន សុខលាន ភេទស្រីអាយុ ៤៣ឆ្នាំ រស់នៅភូមិដូងឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ ត្រូវបានគេកាប់សម្លាប់ទាំងម្តាយ និងកូនប្រុស២នាក់ នៅលើផ្ទះ។
ជនរងគ្រោះ ឈ្មោះ ឃាន សុខលាន ភេទស្រី អាយុ ៤៣ឆ្នាំ ជាម្ដាយ ត្រូវឃាតករកាប់ចំនួន៣កាំបិតចំពីលើ ក ឈ្មោះ ធឿន វណ្ណៈ ភេទប្រុស អាយុ១៧ឆ្នាំ ត្រូវឃាតករកាប់ចំនួន២កាំបិតលើ ក និងក្បាល និង ឈ្មោះ ធឿន ធារី ភេទប្រុស អាយុ១១ឆ្នាំ ត្រូវឃាតករកាប់១កាំបិតលើ ក ។ ក្រោយទទួលបានព័ត៌មាន កម្លាំងនគរបាលខេត្តត្បូងឃ្មុំ សហការជាមួយកម្លាំងជំនាញ នៃអធិការដ្ឋាននគរបាលស្រុកត្បូងឃ្មុំ នគរបាលប៉ុស្តិ៍រដ្ឋបាលថ្មពេជ្រ ចុះដល់កន្លែងកើតហេតុ ធ្វើការស្រាវជ្រាវ និងសន្និដ្ឋានថា ជនរងគ្រោះអាចស្លាប់ចន្លោះ ម៉ោង១២យប់ ថ្ងៃទី៣១ ខែមីនា ឆ្នាំ២០១៨ ឈានចូល ថ្ងៃទី១ ខែមេសា ឆ្នាំ២០១៨។ បើតាមប្រភពពីប្រជាពលរដ្ឋដែលរស់នៅក្បែរផ្ទះជនរងគ្រោះ បានឲ្យដឹងថា ជនរងគ្រោះ ជាម្តាយ បានយកប្តីចុង ទើបរៀបការថ្មីៗនេះ មានឈ្មោះ ជ្រាំង ភូ អាយុ៤៨ឆ្នាំ មានស្រុកកំណើតនៅ ភូមិអកមូល ឃុំម្រាម ស្រុករមាសហែក ខេត្តស្វាយរៀង។ នៅមុនពេលកើតហេតុ ប្តីចុងរូបនេះ តែងដើរផឹងស៊ី និយាយប្រាប់គេថា ខឹងប្រពន្ធ ដែលមិនព្រមធ្វើតាមខ្លួន ទិញឡានជិះ និងចំណាយលុយឲ្យរកស៊ី ហើយនៅក្រោយពេលហេតុការណ៍នេះ កើតឡើង ប្តីចុង រូបនោះ ក៏រត់បាត់ ដែលនេះត្រូវបានសមត្ថកិច្ចដាក់ការសង្ស័យថា ឃាតករសម្លាប់គ្រួសារជនរងគ្រោះ គឺជាប្តីចុងជាអ្នកប្រព្រឹត្តិ ដើម្បីប្លន់យកទ្រព្យសម្បត្តិ ។ ហើយមកដល់ពេលនេះ សមត្ថកិច្ចមិនទាន់ស្រាវជ្រាវ ចាប់ជនសង្ស័យបាននៅឡើយទេ៕ ដោយ៖បញ្ញាស័ក្តិ