បន្ទាយមានជ័យ ៖ រឿងរ៉ាវសម្លាប់ក្មេងស្រីសិស្សសាលានៅប៉ោយប៉ែត សមត្ថកិច្ចថា ជាឃាតកម្មគិតទុកជាមុន តែមុននេះក៏ប៉ុនប៉ងជំរិតទារប្រាក់មិនសម្រេច ព្រោះវាបានផ្តើមចេញពីការប៉ុនប៉ងជំរិតទារប្រាក់យ៉ាងតិច៤ពាន់ដុល្លារ ពីម្តាយមីងជាអាណាព្យាបាលរបស់ក្មេងរងគ្រោះ ព្រោះជនល្មើសចង់បានលុយថ្លៃជំនូនដើម្បីរៀបការជាមួយនារីសង្សារផងដែរ។
ឧត្តមសេនីយ៍ បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យប្រាប់សារព័ត៌មានថ្ងៃទី១ខែមេសាថា ឃាតករឈាមរាវវ័យក្មេង សុកឃឿន សយធី ហៅវុទ្ធី បានធ្វើមនុស្សឃាតគិតទុកជាមុនលើកុមារី ស្រៀង ឈុនអ៊ី ហៅលីហ្សា អាយុ ១១ឆ្នាំ កាលពីល្ងាចថ្ងៃទី៣០មីនាឆ្នាំ២០១៨នៅក្រុងប៉ោយប៉ែតកន្លងមកនោះ មិនមែនជាករណីចាប់ជំតឹតទារប្រាក់ឡើយ។
នៅថ្ងៃទី១ខែមេសហើយនាំឃាតកទៅអោយធ្វើត្រាប់ឡើងវិញនូវសកម្មភាពឃាតកម្មក្មេងស្រីនៅបន្ទប់ជួលលរខ៥ ក្បែរខារ៉ាអូខេ K 1 នៅភូមិក្បាលស្ពាន១ សង្កាត់/ក្រុងប៉ោយប៉ែត ។
លោកមេបញ្ជាការកងរាជអាវុធហត្ថខេត្តបន្ទាយមានជ័យអោយដឹងបន្តថា ៖ យុវជនជាឃាតក សុកឃឿន សុយធី ហៅ វុទ្ធី នេះសារភាពថា ខ្លួនជាកូនដែលដើរចោលម៉ែឪ មកស្នាក់នៅបន្ទប់ជួលនិងស៊ីឈ្នួលលក់ថ្នាំពេទ្យអោយគេ ។ ជនល្មើសនេះក៏បានស្រឡាញ់ នារីវ័យក្មេងម្នាក់បម្រើការនៅក្លឹបកំសាន្តមួយ ហើយមានសន្ទុះចិត្តចង់រៀបការនឹងនាង តែរកលុយមិនទាន់បាន។
ជនល្មើសមានគំនិតភ្លើតភ្លើនក្នុងផ្លូវទុច្ចរឹត ក៏រៀបគម្រោងម្នាក់ឯងថា ត្រូវរកលុយអោយបានរហ័សដូចត្រូវឆ្នោត ហើយក៏បែកគំនិតប្រថុយចាប់ក្មេងខាងលើបង្ខាំង ហើយនឹងអាលទារប្រាក់ពីម្តាយមីងនាងដែលជាអាណាព្យបាលឈ្មោះហេង ម៉េត មានមុខរបរដូរលុយនិងវេរលុយ។
បើយោងសំដីលោកឧត្តមសេនីយ៍ត្រី បោន ប៊ិន ដោយសារ ជនល្មើសនេះនិងក្មេងស្រីរងគ្រោះស្គាល់ រាប់អាននិងមានលំនៅក្បែរគ្នាឯភូមិសោលាខ្មែរឃុំអូរបីជាន់ស្រុកអូរជ្រៅ ទើបក្មេងស្រីរងគ្រោះព្រមជិះម៉ូតូជាមួយខ្លួនពីសាលាឯកជនពន្លកខ្មែរនៅភូមិបាលីលេយ្យ១ សង្កាត់ប៉ោយប៉ែត នៅម៉ោង៤និង១០នាទីល្ងាច ថ្ងៃទី៣០ ខែមីនា ទៅដាក់ក្នុងបន្ទប់ជួលដោយកុហកថា ម្តាយមីងនាងចាំនៅទីនោះ។
ប៉ុន្តែពេលទៅដល់បន្ទប់១សន្ទុះធំ ជនល្មើសខ្លាចក្មេងស្រីរងគ្រោះស្រែកយំឬឡូឡាឮដល់គេឯង ព្រោះនាងមិនឃើញម្តាយមីង ទើបគេបញ្ឆោតក្មេងស្រីថា ជួយរកលុយដែលខ្លួនជ្រុះបាត់ ហើយគេក៏ចេញពីបន្ទប់ទឹកមកយកក្រមារឹត-កក្មេងស្រីអោយថប់ដង្ហើមស្លាប់។ បន្ទាប់មក គេបានយកស្គុតស ថ្លារុំមាត់ ក ដៃជើងនាងអោយជាប់ទៀត។
ខណ:នោះ នៅឯសាលារៀនពន្លកខ្មែរ នាយកសាលានិងឱពុកមាក្មេងស្រីរងគ្រោះមានឈ្មោះស្រៀង កំសត់និងម្តាយមីងហេង ម៉េតវិញបានផ្អើលឆោឡោ ហើយប្តឹងមកមូលដ្ឋានកងរាជអាវុធហត្ថក្រុងប៉ោយប៉ែតពីករណីបាត់កុមារីស្រៀង ឈុនអ៊ី ហៅលីហ្សា ។
ពេលនោះលោកមេបញ្ជការផ្ទាល់ បានបញ្ជារអោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតនិងលោកវរសេនីយ៍ ម៉ែន ភារម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៍និងសុំការសម្របសម្រួលនិតិវិធីពីលោកមាស ច័ន្ទពិសិដ្ឋ ព្រះរាជអាជ្ញានៃអយ្យការអមសាលាដំបូងខេត្តផង និងសហការជាមួយមន្ទិរសាធារណការនិងដឹកជញ្ជូនខេត្តផង បានចេញកម្លាំងស៊ើបអង្កេត ស្រាវជ្រាវតាមសមត្ថភាពជំនាញរកឃើញលេខម៉ូតូ ហើយតាមទៅបន្ទប់ជនល្មើសស្នាក់នៅដែលប្រព្រឹត្តបទល្មើសដូចខាងលើនៅម៉ោង៧និង១០នាទីយប់ថ្ងៃទី៣០មីនា។
ចំពោះមុខសភាពការណ៍នេះ មុននឹងបើកទ្វារអោយសមត្ថកិច្ចចូលទៅឆែក ជនល្មើសបានយកសពក្មេងស្រីរងគ្រោះច្រកចូលការ៉ុង ហើយញាត់លាក់ក្នុងទូរខោអាវ ហើយនិយាយឆ្លើយតបជាមួយកម្លាំងសមត្ថកិច្ច ធ្វើដូចធម្មតាគ្មានរឿងអ្វីកើតឡើង ។
ប៉ុន្តែដោយមានការសង្ស័យ ហើយរកឃើញតម្រុយ វត្ថុតាងនិងអង្គហេតុបទល្មើសដែលស៊ីសង្វាក់ ទើបជនល្មើសបានសារភាព ខ្លួនបាត់រឹតកសម្លាប់ក្មេងស្រីរងគ្រោះទៅហើយៗត្រៀមដឹកសពយកទៅចោលបំបាត់ដាន។ ហើយថាខ្លួនធ្វើនេះដើម្បីចង់បង្ខាំងនាងទុក ដើម្បីហៅទូរស័ព្ទទៅម្តាយមីងជាអាណាព្យាបាលរបស់នាងបឺយកប្រាក់មកលោះយា់ងតិចក៏៤ពាន់ទៅ១ម៉ឺនដុល្លាដែរ ។ តែគ្មានឱកាសល្អ សមត្ថកិច្ចអហក៏មកដល់ល្មម។
លោកឧត្តមសេនីយ៍ បោន ប៊ិន បានថ្លែងអំណរគុណដល់ការចង្អរុបង្ហាញពីថ្នាក់លើនិងកិច្ចសម្របសម្រួល សហការរបស់មន្ត្រី អ្នកពាក់ព័ន្ធ ព្រមទាំងប្រតិបត្តិរបស់កម្លាំងអ ហ ដែលឈានដល់បង្ក្រាបបានជនល្មើសនេះ ។ប៉ុន្តែសម្តែងការសោកស្តាយនិងចូលរួមរំលែកទុក្ខចំពោះគ្រួសារក្មេងស្រីរងគ្រោះដែលស្លាប់។ អាវុធហត្ថក៏បានរំលឹកដាស់តឿន កុំអោយយកគំរូអាក្រក់ ឃោរឃៅរបស់ឃាតកវ័យក្មេងនេះ ហើយអំពាវនាអោយយុវជនទាំងឡាយកុំយកតម្រាប់តារ ហើយអោយយុវជនចេះប្រើប្រាសវ័យលូតលាស់របស់ខ្លួនទៅជាការខិតខំរៀនសូត្រ ធ្វើអំពើល្អសម្រាប់អនាគតខ្លួន និងត្រូវចៀសអោយឆ្ងាយពីគំនិតនិងភាពភ្លើតភ្លើន ផ្តេសផ្តាស កុំប្រព្រឹត្តអបាយមុខ កុំសេពគ្រឿងញៀនស្រវឹងគ្រប់ប្រភេទ កុំបណ្តោយខ្លួនក្លាយជាក្មេងទំនើង ជាបងធំ កុំក្លាយខ្លួនជាជនល្មើស។ល។ ក៏ថ្លែងអំណគុណដល់លោកឧត្តមដេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ផ្តល់កិច្ចសហការក្នុងនាមសមត្ថកិច្ចដែលធ្វើអ្វីដើម្បីភូមិឃុំមានសុវត្ថិភាព ដើម្បីសន្តិសុខជូនពលរដ្ឋនិងផ្តល់នូវថវិកាលើកទឹកចិត្តចំនួន២លានរៀលដល់កម្លាំងអាវុធហត្ថ។
នៅចុងក្រោយ លោកឧត្តមសេនីយ៍ត្រីមេបញ្ជាការកងរាជអាវុធហត្ថខេត្តបន្ទាយមានជ័យ បានសំណូមពរដល់មន្ត្រីអាជ្ញាធរដែនដី សមត្ថកិច្ច អង្គភាព សាលារៀន អាណាព្យាលសិស្សបន្តសហការល្អ បង្កើនការអប់រំ ផ្សព្វផ្សាយនិងក្មួយៗជាកុមារ ជាកុមារ ជាយុវជនផ្ទាល់មេត្តាប្រុងប្រយ័ត្នគ្រប់យ៉ាងនូវសុវត្ថិភាព បង្ការទប់ស្កាត់នូវគ្រោះថ្នាក់ឬបញ្ហាអ្វីកើតឡើង។ ព្រោះថា បើទោះបីជាសំណាញ់សុវត្ថិភាពរបស់សមត្ថកិច្ចប្រទាក់ក្រឡាយ៉ាងណា ក៏គង់នៅមានចន្លោះប្រហោង ដូចជាមានឧប្បត្តិហេតុដូចករណីនេះ ៕ ដោយ ៖ បន្ទាយ
