ប្រទេសកូរ៉េ ៖ ក្រោមព្រះរាជ្យតម្រិះផ្ដួចផ្ដើមរបស់សម្ដេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស ដោយមានកិច្ចសហការគាំទ្រពីស្ថានទូតកម្ពុជា និងសប្បុរសជនកូរ៉េ ខ្មែរយើងនឹងមានទីតាំងថ្មីមួយសម្រាប់កសាងវត្តខ្មែរដែលមានរចនាបថខ្មែរ នៅលើទឹកដីកូរ៉េហើយ ដែលមានផ្ទៃដីជិត២០០០ម៉ែត្រកូរ៉េ។
លោកឡុង ឌីម៉ង់ ក្នុងព្រះរាជពិធីសម្ពោធវត្តមហាយ៉ាណា និងមជ្ឈមណ្ឌលវប្បធម៌ខ្មែរនៅកូរ៉េ ក្រោមព្រះរាជាធិបតីភាពដ៏ខ្ពង់ខ្ពស់ សម្ដេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្ដេចព្រះមហាសង្ឃរាជ នៃព្រះរាជាណាចក្រកម្ពុជា និងថ្នាក់ដឹកនាំជាន់ខ្ពស់របស់ទីក្រុងអានសាន នាថ្ងៃអាទិត្យ ១រោច ខែចែត្រ ឆ្នាំរកា នព្វស័ក ពុទ្ធសករាជ២៥៦១ ម្សិលមិញ នាទីក្រុងអានសាន បានថ្លែងសន្ទរកថា លើកឡើងថា “នេះជាចំនុចចាប់ផ្តើមឈានទៅការកសាងវត្តខ្មែរលើកទីមួយនៅកូរ៉េបានផ្តើមហើយ គឺចេញពីការសម្ពោធវត្តខ្មែរម៉ាហាយ៉ាណានិងមជ្ឍមណ្ឌលវប្បធម៌ខ្មែរនៅទីក្រុងអានសានជាមួយនឹងការថ្វាយសម្តេចព្រះមហាសង្ឃរាជ ទេព វង្ស នូវដីមួយកន្លែងទំហំប្រមាណ១៨០០ម៉ែត្រការ៉េ (ក្នុងក្រុងអានសាន) ពីសំណាក់សប្បុរសជនកូរ៉េដើម្បីសាងសង់វត្តអារាមខ្មែរដែលមានរចនាបថខ្មែរ។
ដូច្នេះសុបិន្តរបស់ពលរដ្ឋខ្មែរនៅកូរ៉េដែលចង់ឃើញមានវត្តមានទីអារាមខ្មែរនៅកូរ៉េដើម្បីជួយមើលថែទាំបងប្អូនយើងជាង ៦ម៉ឺននាក់នេះ នឹងចាប់ផ្តើមក្នុងពេលអនាគតដ៏ខ្លីខាងមុខនេះហើយ។”
គួរបញ្ជាក់ផងដែរថា វត្តមហាយ៉ាណា និងមជ្ឈមណ្ឌលវប្បធម៌ខ្មែរនៅកូរ៉េ ដែលត្រូវបានសម្ពោធនេះបានរៀបចំជាមជ្ឈមណ្ឌលបណ្ដុះបណ្ដាលជំនាញវិជ្ជាជីវៈ ភាសា និងគាំពារពលករខ្មែរ ហើយផ្នែកខាងលើបានរៀបចំជាព្រះវិហារសម្រាប់ពុទ្ធបរិស័ទគោរពប្រតិបត្តិ និងរៀបចំកម្មវិធីសាសនាផ្សេងៗ ដែលទីតាំងនេះគ្រាន់តែជាទីតាំងបណ្តោះអាសន្តប៉ុណ្តោះ ។ ក្រោយពីសប្បុរសជនជួយជាថវិកាគ្រប់គ្រាន់វត្តថ្មីនឹងឃើញនៅក្នុងប្រទេសកូរ៉េដែលមានរចនាបថខ្មែរ ពិតៗ៕ ដោយ ៖ បញ្ញាស័ក្តិ
