បាត់ដំបង ៖ នៅ ថ្ងៃទី២ ខែមេសា ឆ្នាំ២០១៨សម្ពោធបើកឱ្យប្រើប្រាស់ជាផ្លូវការផ្លូវលេខ១៥៧៧ ក្រោមអធិបតី សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាចូលរួមជាអធិបតីក្នុងគម្រោងផ្លូវនេះមានប្រវែងសរុប ៥១,៨០គីឡូម៉ែត្រ ចាប់ពីភូមិភ្ជាវ ឃុំត្រែង ស្រុករតនៈមណ្ឌល ដល់ភូមិឆករកា ឃុំសំឡូត (ច្រកទ្វារព្រំដែន៤០០) ស្រុកសំឡូត ខេត្តបាត់ដំបង ត្រូវបានស្ថាបនាតាមស្តង់ដារចិន Class III ដែលមានទទឹងផ្លូវ៩ម៉ែត្រ ក្រាលកៅស៊ូពីរស្រទាប់ (DBST) លើទទឹងផ្លូវ៨ម៉ែត្រ។
គម្រោងផ្លូវនេះបានចំណាយថវិកាសរុបប្រមាណ ៣៨,២១២លានដុល្លារអាមេរិក ជាហិរញ្ញប្បទានសម្បទានពី សាធារណរដ្ឋប្រជាមានិតចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ដោះស្រាយផល ប៉ះពាល់ ការបោសសម្អាតមីន និងយុទ្ធភ័ណ្ឌមិនទាន់ផ្ទុះ សាងសង់ដោយក្រុមហ៊ុនសាជីវកម្មស្ពាន-ថ្នល់ចិន និងពិនិត្យបច្ចេកទេសសាងសង់ដោយក្រុមហ៊ុនទីប្រឹក្សាបច្ចេកទេសសំណង់ក្វាងចូវវ៉ានអាន ប្រើរយៈពេលសាងសង់ចំនួន២៣ខែ ដែលបានបញ្ចប់ការសាងសង់នៅចុងឆ្នាំ២០១៧កន្លងទៅនេះ។
សម្តេចក្រឡាហោម ស ខេង បានមានប្រសាសន៍ថា ផ្លូវនេះជាផ្លូវយុទ្ធសាស្ត្រមួយយ៉ាងសំខាន់សម្រាប់បម្រើដល់កិច្ចការពារជាតិ និងការអភិវឌ្ឍសេដ្ឋកិច្ច ដែលតភ្ជាប់តំបន់ភូមិភាគកណ្តាល និងវាលទំនាបផ្នែកខាងលើ ទៅកាន់ភូមិភាគខាងលិចប្រទេស ចាប់ផ្តើមពីភូមិភ្ជាវ ឃុំត្រែង ស្រុករតនមណ្ឌល ទៅភូមិឆករកា ឃុំសំឡូត ស្រុកសំឡូត ខេត្តបាត់ដំបង (ច្រកទ្វារព្រំដែន៤០០) ព្រំប្រទល់កម្ពុជា-ថៃ ជាប់នឹងខេត្តត្រាតប្រទេសថៃ។
សម្តេច ស ខេង បានថ្លែងថា សមិទ្ធផលផ្លូវនេះជាចំណងដៃដ៏ពិសិដ្ឋ ឆ្លើយតបទៅនឹងសំណូមពរ និងតម្រូវការនៃការដឹកជញ្ជូន ការធ្វើដំណើរ របស់បងប្អូនប្រជាពលរដ្ឋដែលរស់នៅតំបន់ត្រែង សំឡូត និងតំបន់ភូមិភាគខាងលិចប្រទេសទៅកាន់ក្រុងបាត់ ដំបង រាជធានីភ្នំពេញ ឬតំបន់ផ្សេងៗទូទាំងប្រទេស និងជាខ្សែផ្លូវដែលធ្វើសមាហរណកម្មពេញលេញសម្រាប់ខេត្តបាត់ដំបងទាំងមូល ព្រោះថាស្រុកសំឡូតជាស្រុកតែមួយគត់ និងចុងក្រោយបំផុត ដែលទើបមានផ្លូវកៅស៊ូ តភ្ជាប់មកក្រុងបាត់ដំបង។
លោក ទេសរដ្ឋមន្ត្រី ស៊ុន ចាន់ថុល បានអំពាវនាវដល់បងប្អូនប្រជាពលរដ្ឋ ដែលធ្វើដំណើរតាមផ្លូវថ្នល់ទាំងអស់ សូមគោរពច្បាប់ចរាចរណ៍ ដោយពាក់មួកសុវត្ថិភាពរាល់ពេលជិះម៉ូតូ ពាក់ខ្សែក្រវាត់សុវត្ថិភាពឱ្យបានត្រឹមត្រូវ ពេលជិះរថយន្ដ កុំបើកបរហួសល្បឿនកំណត់ កុំបើកបរពេលស្រវឹង ឬងងុយគេង កុំដឹកជញ្ជូនលើសទម្ងន់កម្រិតកំណត់ និងសូមកុំកែច្នៃយានយន្តខុសលក្ខណៈបច្ចេកទេសជាដាច់ខាត ព្រោះអាចបង្កឱ្យមានគ្រោះថ្នាក់ចរាចរណ៍ និងធ្វើឱ្យផ្លូវថ្នល់របស់យើងឆាប់ខូចមុនអាយុកាលកំណត់។
លោក ទេសរដ្ឋមន្ត្រី ស៊ុន ចាន់ថុល បានថ្លែងអំណរគុណយ៉ាងជ្រាលជ្រៅដល់ប្រជាជន និងរដ្ឋាភិបាល នៃសាធារណរដ្ឋប្រជាមានិតចិន ដែលបានផ្ដល់ហិរញ្ញប្បទាន និងជំនួយបច្ចេកទេសជាបន្ដបន្ទាប់ ស្រប តាមសំណូមពរ និងសេចក្ដីត្រូវការចាំបាច់របស់កម្ពុជា ដើម្បីរួមចំណែកក្នុងការស្ដារ និងអភិវឌ្ឍន៍ហេដ្ឋារចនាសម្ព័ន្ធដឹកជញ្ជូននៅក្រកម្ពុជា៕ ដោយ ៖ បញ្ញាស័ក្តិ