នៅថ្ងៃទី ២ មេសានេះ សេតវិមានឲ្យដឹងថា ប្រធានាធិបតីដូណាល់ ត្រាំ និងជួបជាមួយនាយករដ្ឋមន្ត្រីជប៉ុន នៅថ្ងៃ១៧-១៨ ខែមេសា ដើម្បីពិភាក្សាអំពីជំនួបកំពូលរវាងអាមេរិកនិងកូរ៉េខាងជើង ដែលតាមគំរោងនឹងប្រព្រឹត្តទៅក្នុងខែឧសភា ។ ភាគីទាំងសងខាងក៏នឹងពិភាក្សាបញ្ហាមួយចំនួនផ្សេងទៀត។
ប្រធានាធិបតីអាមេរិក Donald Trump និងនាយករដ្ឋមន្ត្រីជប៉ុន Shinzo Abe
នេះគឺជាជំនួនកំពូលលើកទី ៣ រវាងលោកប្រធានាធិបតីដូណាល់ ត្រាំ និងលោកនាយករដ្ឋមន្ត្រី Shinzo Abe ។ សេចក្តីប្រកាសព័ត៌មានឲ្យដឹងថា មេដឹកនាំអាមេរិក និងជប៉ុន នឹងជួបគ្នានៅតំបន់សម្រាកកម្សាន្ត Mar-a-lago របស់ប្រធានាធិបតីត្រាំ នៅ Florida ។ តាមគំរោនោះមេដឹកនាំទាំងពីរនឹងពិភាក្សាអំពី “យុទ្ធនាការអន្តរជាតិបន្តរក្សាសម្ពាធជាអតិប្បរមាចំពោះកូរ៉េខាងជើង” ក៏ដូចជាកិច្ចពិភាក្សាអំពីវិធីពង្រីកចំណងទាក់ទងពាណិជ្ជកម្ម វិនិយោគទុនស្មើភាព មានប្រយោជន៍ទាំងសងខាងរវាងអាមេរិក-ជប៉ុន ។
តាមនាយករដ្ឋមន្ត្រី Abe ក្នុងដំណើរទស្សនកិច្ចនេះលោកនឹងស្នើសុំប្រធានាធិបតីត្រាំ ជួយលើកឡើងនូវបញ្ហាពលរដ្ឋជប៉ុន ដែលត្រូវកូរ៉េខាងជើងចាប់ជំរិត ក្នុងជំនួបរវាងប្រធានាធិបតីអាមេរិកជាមួយនឹងមេដឹកនាំកូរ៉េខាងជើង តាមគម្រោងនឹងប្រព្រឹត្តទៅនៅខែឧសភាខាងមុខ។
ទន្ទឹមនោះបញ្ហាអាមេរិកតម្លើងពន្ធចំពោះផលិតផលអាលុយមីញ៉ូម និងដែកថែបរបស់ជប៉ុន ក៏ស្ថិតក្នុងរបៀបវារៈនៃជំនួបកំពូលនេះផងដែរ។
ជាយូរមកហើយ ជប៉ុនតែងរក្សាគោលជំហរតឹងរឹងក្នុងការចរចាជាមួយក្រុងព្យុងយ៉ាង ។ ក៏ប៉ុន្តែមជ្ឈដ្ឋានអ្នកវិភាគរំពឹងថា តាមរយៈជំនួបកំពូលរវាងលោកត្រាំនិងមេដឹកនាំកូរ៉េខាងជើងគីម ជុងអ៊ុន ក៏ដូចជាជំនួបកំពូលរវាងកូរ៉េទាំងពីរ បង្ខំឲ្យក្រុងតូក្យូពិនិត្យឡើងវិញអំពីទស្សនៈរបស់ខ្លួន ។
ជប៉ុនមានកង្វល់ចំពោះដំណើរការទូតបច្ចុប្បន្នអាចរំលងដំណោះស្រាយបញ្ហាកាំជ្រួចរយៈចម្ងាយខ្លី និងមធ្យមរបស់កូរ៉េខាងជើង ក៏ដូចជាបញ្ហាពលរដ្ឋជប៉ុនត្រូវកូរ៉េខាងជើងចាប់ជម្រិត ៕
