នៅថ្ងៃទី ២ ខែមេសា ម្សិលមិញនេះ ប៉ូលិសថៃបានប្រកាសថា គេទើបកម្ទេចបានខ្សែរយៈជួញដូរគ្រឿងញៀនទឹកកកដ៏ធំ ហើយរឹបអូសបានគ្រឿងញៀនទឹកកករហូតដល់ទៅ ៦៥០ គីឡូក្រាម ដែលតម្លៃនៅទីផ្សារងងឹតតម្លៃ ៥២០លានបាត (ប្រហែល ១៧លានដុល្លារ) នៅខេត្ត Songkhla ។
ប៉ូលិសថៃធ្វើសន្និសីទកាសែត ហើយប្រកាសពីវត្ថុតាងដែលប្រមូលបាន
ប៉ូលិសថៃ បានចាប់ឃាត់ខ្លួនជនសង្ស័យម្នាក់នៅខេត្ត Songkhla ពេលកំពុងដឹកជញ្ជូនបរិមាណគ្រឿងញៀនដ៏ច្រើនឆ្ពោះទៅកាន់ព្រំដែនម៉ាឡេស៊ី ។ បន្ទាប់មកជនសង្ស័យម្នាក់ទៀត ក៏បានត្រូវចាប់ខ្លួននៅខេត្ត Phitsanulok ចម្ងាយពីនេះជាង ១.៣០០គីឡូម៉ែត្រ ។ ជនសង្ស័យទាំងពីរសុទ្ធសឹងជាសញ្ជាតិថៃ។
ការស៊ើបអង្កេតបឋមឲ្យដឹងថា ជនសង្ស័យទាំងពីររូបនេះគឺជាសមាជិកនៃបណ្តាញជួញគ្រឿងញៀនឆ្លងប្រទេសមានឈ្មោះថា Phor Liang Tee ។ នេះគឺជាអង្គការចាត់តាំងមួយត្រូវបានសន្និដ្ឋានថា វាមានពាក់ព័ន្ធដល់ករណីជួញដូរគ្រឿងញៀន និងជួញដូរមនុស្សជាច្រើន ។ ក្រុមឧក្រិដ្ឋកម្មឆ្លងដែននេះ បានរៀបចំផែនការ ដើម្បីដឹកជញ្ជូនគ្រឿងញៀនខាងលើពីតំបន់ភាគខាងជើងថៃ ប្រមូលផ្តុំមកខេត្ត Songkhla រួចទើបបញ្ជូនឆ្លងដែនទៅកាន់ម៉ាឡេស៊ី ។
រយៈពេលកន្លងទៅថ្មីៗនេះ ថៃបានកម្ទេចខ្សែរយៈជួញដូរគ្រឿងញៀនទ្រង់ទ្រាយធំជាច្រើនករណី ។ នៅចុងឆ្នាំ ២០១៧ ថៃក៏បានដំណើរការកម្ទេចបរិមាណគ្រឿងញៀនដល់ទៅ ១៧ តោន ដែលមានតម្លៃជាង ៥០០លានដុល្លារ ៕ សូយន