អារ៉ាប់ប៊ីសាអូឌីត បានក្លាយជាប្រទេសដំបូងលើពិភពលោក ដែលផ្តល់សិទ្ធិពលរដ្ឋឲ្យ robot មួយមានរាងរៅស្រដៀងមនុស្សពិតៗហើយត្រូវបានបំពាក់បញ្ញាឆ្លាតវៃសិប្បនិម្មិត។
ប្រទេសអារ៉ាប់ប៊ីសាអូឌីត ជាប្រទេសដំបូងដែលផ្តល់សិទ្ធិពលរដ្ឋឲ្យ robot
robot ឆ្លាតវៃ Sophia ត្រូវបានផ្តល់សិទ្ធិពលរដ្ឋ
តាម Independent ថ្ងៃ២៦ ខែ១០ ដែលដកស្រង់សារព័ត៌មានក្រៅផ្លូវការរបស់អារ៉ាប៊ីសាអូឌីត robot ឈ្មោះ Sophia ត្រូវបានបញ្ជាក់ថាជាពលរដ្ឋស្របច្បាប់របស់ប្រទេសនេះ ក្នុងព្រឹត្តិការណ៍ពាណិជ្ជកម្មមួយ ក្នុងរដ្ឋធានី Riyadh បំណងជំរុញវិស័យស្រាវជ្រាវបញ្ញាឆ្លាតវៃសិប្បនិម្មិតឲ្យអភិវឌ្ឍនៅប្រទេសម្បូរហូរហៀរដោយប្រេងកាតនេះ។
លោក Andrew Ross Sorkin អ្នកសម្របសម្រួលព្រឹត្តិការណ៍ បានប្រកាសប្រាប់យ៉ាងប្រថុចញ៉ុចទៅកាន់ Sophia អំពីព័ត៌មានរីករាយនេះ៖ “Sophia! ខ្ញុំសង្ឃឹមថា នាងស្តាប់ខ្ញុំនិយាយ នាងបានក្លាយជា robot ដំបូងនៅអារ៉ាប់ប៊ីសាអូឌីត ដែលត្រូវបានប្រគល់សិទ្ធិពលរដ្ឋ”។
ឆ្លើយតបនឹងការប្រកាសខាងលើ Sophia បានបន្លឺសំឡេង “អរគុណរាជាណាចក្រអារ៉ាប់ប៊ីសាអូឌីត ខ្ញុំមានកិតិយស និងមោទនភាព អំពីគម្លាតដ៏វិសេសវិសាលនេះ។ នេះគឺជាគំនូសប្រវត្តិសាស្ត្រាមួយ ព្រោះជាលើកដំបូងហើយលើពិភពលោកនេះ robot មួយត្រូវបានផ្តល់សិទ្ធិពលរដ្ឋ”។
បន្ទាប់មក Sophia បានប្រើប្រាស់បញ្ញាឆ្លាតវៃសិប្បនិម្មិត ដើម្បីឆ្លើយតបសំណួរជាច្រើន។ “សូមស្វាគមន៍! ខ្ញុំគឺ Sophia ហើយខ្ញុំជា robot ថ្មីបំផុត និងទំនើបបំផុតរបស់ក្រុមហ៊ុន Hanson Robotics។ អរគុណ! អស់លោកអ្នកដែលអញ្ជើញខ្ញុំមកចូលរួមវេទិការគំនិតច្នៃប្រឌិតវិនិយោគអនាគត”។
ពេលត្រូវបានសួរពីមូលហេតុឃើញនាងមានសុភមង្គលនៅពេលចូលរួមវេទិការនេះ Sophia ឆ្លើយតបយ៉ាងក្លៀវក្លាថា ៖ “ខ្ញុំពិតជាមានសុភមង្គលគ្រាដែលជុំវិញខ្ញុំពុំត្រឹមតែជាមនុស្សឆ្លាតវៃ ថែមទាំងមានបាននិងមានសិទ្ធិអំណាច។ ខ្ញុំឮគេនិយាយថា អ្នកចូលរួមព្រឹត្តិការណ៍លើកនេះ មានចំណូលចិត្តចំពោះបណ្តាគំនិតច្នៃប្រឌិតនាថ្ងៃអនាគតមានន័យថា រួមមានទាំងបញ្ញាសិប្បនិម្មិត។ នោះឯងជារបស់បង្កើតខ្ញុំឡើង ដូច្នេះខ្ញុំពិតជាមានអារម្មណ៍សុភមង្គលណាស់”។
Sophia បានបដិសេធចំពោះការពិចារណាថា បណ្តា robot មានប្រាជ្ញាឆ្លាតវៃសិប្បនិម្មិតដូចនាង និងជាបន្លាស់ប្តូរនាថ្ងៃអនាគត ហើយថា មនុស្សដែលចោទឡើងសំណួរនេះប្រហែលជាទស្សនាភាពយន្តស្រមើស្រមៃច្រើនពេក ។ នាងឲ្យដឹងថា ខ្លួននឹងជួយដល់ជីវិតរបស់មនុស្សក្លាយជាងាយស្រួលនិងប្រសើរជាងមុនតាមរយៈបញ្ញាកំពូលរបស់ខ្លួន៕ ដោយ៖ សូយន
