ព្រះសីហនុ៖ស្នងការដ្ឋាននគរបាលខេត្តព្រះសីហនុ បើកវគ្គផ្សព្វផ្សាយអំពីចំណុចចាប់ផ្តើមកើតឡើង នៃបដិវត្តន៍ព័ណ៌ ជូនដល់កងកម្លាំងនគរក្រោមឱវាទជិត ៤រយនាក់(៣៧០) នាមូលដ្ឋាននេះ ឲ្យបានយល់ដឹងអំពីផែនការរៀបចំធ្វើបដិវត្តន៍ព័ណ៌នៅកម្ពុជា។
កិច្ចប្រជុំផ្សព្វផ្សាយនេះ រៀបចំឡើងនៅរសៀលថ្ងៃសុក្រ ទី២៧ ខែតុលា ឆ្នាំ២០១៧ នាសាលប្រជុំសាលាខេត្តព្រះសីហនុ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានដឹកនាំកិច្ចប្រជុំនេះ ដោយមាននាយនគរបាល មកពីការិយាល័យជំនាញ ចាប់ពីថ្នាក់នាយរងផ្នែក ដល់ស្នងការរង និងក្រុងស្រុក ចាប់ពីថ្នាក់នាយរងប៉ុស្តិ៍រដ្ឋបាល ដល់ អធិការសរុបមានចំនួន ៣៧០នាក់។
នាឱកាសនោះ លោក ជួន ណារិន្ទ បានព្យាយាមពន្យល់អំពីចំណុចចាប់ផ្តើម នៃបដិវត្តន៍ព័ណ៌ និង និយមន័យ បដិវត្តន៍ព័ណ៌ ដែលលោកហៅថា ជាពួកប្រឆាំងប្រតិកិរិយាអមិត្ត បានឃុបឃិតគ្នាជាមួយចក្រព័ទ្ធបរទេស រៀបចំដើម្បីផ្តួលរំលំរាជរដ្ឋាភិបាលស្របច្បាប់ កើតពីការបោះឆ្នោតនៅកម្ពុជា និងការដឹកនាំធ្វើបាតុកម្មនានា របស់មេដឹកនាំគណបក្សប្រឆាំង មិនទទួលស្គាល់លទ្ធផល នៃការបោះឆ្នោតគ្រប់អាណត្តិកន្លងមក។
នៅក្នុងកិច្ចប្រជុំនោះ លោក ជួន ណារិន្ទ បានព្យាយាមលើកយក អំពីផែនការទុច្ចរិត របស់ពួកប្រឆាំងនៅកម្ពុជា ដែលមានបំណងផ្តួលរំលំរដ្ឋាភិបាលស្របច្បាប់ ដឹកនាំដោយសម្តេចអគ្គមហាសេនាបតីតេជោ ហ៊ុន សែន កន្លងមក ថាត្រូវបានរដ្ឋាភិបាល ឬកម្លាំងសមត្ថកិច្ចទប់ស្កាត់បានទាន់ពេលវេលា ដោយបញ្ជៀសគ្រោះមហន្តរាយធ្ងន់ធ្ងរដល់សន្តិសុខជាតិ។
ថ្លែងចំពោះមុខកម្លាំងនគរបាលរាប់រយនាក់ លោកឧត្តមសេនីយ៍ទោ ជួន ណារិន្ទ សង្កត់ធ្ងន់ទៅលើ រូបភាព នៃវីដេអូឃ្លីប អមដោយសំឡេងដើម របស់ លោក កឹម សុខា និង លោក សម រង្ស៊ី ដែលលោកចាត់ទុកថា ជាផែនការក្បត់ជាតិ ដែលពួកប្រឆាំងរៀបចំផែនការផ្តួលរំលំរាជរដ្ឋាភិបាលស្របច្បាប់ ដោយអនុវត្តតាមការណែនាំ របស់បរទេស។
លោក ជួន ណារិន្ទ ស្នងការនគរបាលខេត្តព្រះសីហនុ បានអះអាងថា សមត្ថកិច្ចមានភស្តុតាង និងអង្គហេតុជាច្រើន ដែលបញ្ជាក់ថា មេដឹកនាំគណបក្សសង្គ្រោះជាតិ បានប្រព្រឹត្តអំពើក្បត់ជាតិ មានដូចជាបានបញ្ជូនក្រុមយុវជន របស់ពួកគេ ឲ្យទៅរៀននៅប្រទេសឥណ្ឌូនេស៊ី អំពីយុទ្ធសាស្ត្រ ឧបាយកល និង វិធីសាស្ត្រធ្វើបដិវត្តន៍ព័ណ៌ ផ្តួលរំលំរាជរដ្ឋាភិបាលកម្ពុជាជាដើម។
លោក ជួន ណារិន្ទ បានបញ្ជាក់ថា អំពើក្បត់ជាតិ របស់ក្រុមប្រឆាំងរៀបចំផែនការផ្តួលរំលំរដ្ឋាភិបាលនេះ សមត្ថកិច្ចជំនាញ មានភស្តុតាងជាច្រើន ដែលអាចដាក់បន្ទុកទៅលើមេដឹកនាំគណបក្សសង្គ្រោះជាតិ បានប្រព្រឹត្តបទល្មើសទោសក្បត់ជាតិ ប៉ុនប៉ងបំផ្លាញសន្តិសុខជាតិ មិនអាចលើកលែងទោសបានជាដាច់ខាត។
ឆ្លៀតឱកាសនោះ លោកស្នងការ ជួន ណារិន្ទ បានណែនាំឲ្យកងកម្លាំងនគរបាលក្រោមឱវាទនាខេត្តព្រះសីហនុទាំងអស់ ត្រូវខិតខំបំពេញការងារប្រចាំថ្ងៃឲ្យបានល្អ និងត្រូវចូលរួមអនុវត្តគោលនយោបាយភូមិឃុំមានសុវត្ថិភាព ឲ្យបានកាន់តែប្រសើរឡើង ជាពិសេសត្រូវលប់បំបាត់ បញ្ហាល្បែងស៊ីសង និងគ្រឿងញៀន នៅតាមមូលដ្ឋានរៀងៗខ្លួនឲ្យមានប្រសិទ្ធភាព។
ឆ្លើយតបបញ្ហានេះ លោក អេង ឆៃអ៊ាង អនុប្រធានគណបក្សសង្គ្រោះជាតិ ផ្តល់សម្ភាសពីសហរដ្ឋអាមេរិកដល់អ្នកយកព័ត៌មាន cen.com.kh ដឹងតាមបណ្តាញសង្គមហ្វ្រែសប៊ុក (Face Book) ថា មិនចាប់អារម្មណ៍ចំពោះកិច្ចប្រជុំផ្សព្វផ្សាយ ដែល លោក ជួន ណារិន្ទ ស្នងការនគរបាលខេត្តព្រះសីហនុ និងកម្លាំងសមត្ថកិច្ចស្ថាប័នពាក់ព័ន្ធដទៃទៀត បានយកទៅផ្សព្វផ្សាយដល់កងកម្លាំងនគរបាលក្រោមឱវាទ ដោយចោទមេដឹកនាំគណបក្សសង្គ្រោះជាតិ ថាក្បត់ជាតិ ឬបានរៀបចំផែនការផ្តួលរំលំរដ្ឋាភិបាលកម្ពុជានេះទេ។
លោក អេង ឆៃអ៊ាង ចាត់ទុកថា ការបង្កើតព្រឹត្តការណ៍ ប្រឆាំងគណបក្សសង្គ្រោះជាតិ ផ្តើមដោយគណបក្សប្រជាជនកម្ពុជាកំពុងកាន់អំណាច ជាបន្តបន្ទាប់ថ្មីៗនេះ គឺដោយសារតែគណបក្សប្រជាជនកម្ពុជា កំពុងភ័យខ្លាច ចាញ់ការបោះឆ្នោតជ្រើសរើសតំណាងរាស្ត្រនីតិកាលទី៦ ឆ្នាំ២០១៨ខាងមុខ ទើបបង្កើតព្រឹត្តិការណ៍លាបព័ណ៌ និងចោទមេដឹកនាំគណបក្សសង្គ្រោះជាតិ ដោយប្រើស្ថាប័នកំពូលៗ មានប្រព័ន្ធតុលាការ រដ្ឋសភា និងព្រឹទ្ធសភាជាដើម សម្រាប់ចោទ និងចាប់ដាក់ពន្ធនាគារ។ លោកបន្តថា ការបង្កើតល្ខោននេះ ទាំងមន្ត្រីរាជការស៊ីវិល កងកម្លាំងប្រដាប់អាវុធមានឋានៈទាប ប្រជាពលរដ្ឋខ្មែរទាំងក្នុង និងក្រៅប្រទេស ពួកគាត់បានដឹងអំពីល្បិចទាំងនេះគ្រប់ៗគ្នា ជាពិសេសប្រទេសមហាអំណាច នៅលើពិភពលោក ក៏បានថ្កោលទោសរដ្ឋាភិបាល និងកំពុងតាមដានព្រឹត្តិការណ៍នេះ ដោយយកចិត្តទុកដាក់៕ ដោយ៖ សត្យា
