ចៅសង្កាត់សំបួរ នៃក្រុងសៀមរាប លោក ឈ្លឿន ឡា កាលពីថ្ងៃទី១៤ ខែកញ្ញា ឆ្នាំ២០២១ បានដឹងថា រដ្ឋបាលសង្កាត់សំបួរ បានចែកបណ្ណចាក់វ៉ាក់សាំងជូនប្រជាពលរដ្ឋ ចាប់តាំងពីថ្ងៃម្សិលមិញ, ហើយនៅថ្ងៃនេះ លោកបានអំពាវនាវឲ្យប្រជាពលរដ្ឋដែលបានចាក់វ៉ាក់សាំងការពារជំងឺកូវីដ-១៩ រួចទាំងពីរដូស សូមទៅទទួលយកបណ្ណចាក់វ៉ាក់សាំង នៅសាលាសង្កាត់សំបូរ នៃក្រុងសៀមរាប ។
លោក ឈ្លឿន ឡា ចៅសង្កាត់សំបួរ នៃក្រុងសៀមរាប បានបញ្ជាក់ថា ម្សិលមិញនេះ យើងបានចែកបណ្ណជូនអ្នកចាក់វ៉ាក់សាំងរួចរាល់២ដូស បានចំនួន ១១៦នាក់ (ស្រី៦២នាក់)។ របៀបមកទទួលយកបណ្ណ គឺប្រជាពលរដ្ឋ ត្រូវយកកន្ទុយបណ្ណដែលក្រុមគ្រូពេទ្យប្រគល់ឲ្យ បន្ទាប់ពីចាក់ទាំងពីរដូសរួចនោះ មកជាមួយ។
បើសរុប ប្រជាពលរដ្ឋដែលចាក់វ៉ាក់សាំងការពារជំងឺកូវីដ-១៩ រួចទាំងពីរដូស នៅក្នុងសង្កាត់សំបួរ មានចំនួនជាង ៥ពាន់នាក់, ប៉ុន្តែ បណ្ណដែលចែកជូននាពេលនេះ មានតែជាង ២ពាន់បណ្ណតែប៉ុណ្ណោះ, ដូច្នេះ រដ្ឋបាលសង្កាត់ សូមអធ្យាស្រ័យចំពោះប្រជាពលរដ្ឋណាដែលរកបណ្ណមិនឃើញ ឬបណ្ណមិនទាន់ធ្លាក់មក ដោយរង់ចាំវគ្គក្រោយ នៅពេលបណ្ណធ្លាក់មក អាជ្ញាធរសង្កាត់នឹងជូនដំណឹងភ្លាម៕ ពិសិដ្ឋ CEN