ថ្មីៗនេះ អ្នកប្រើប្រាស់បណ្តាញសង្គម ពិតជាមានការភ្ញាក់ផ្អើលខ្លាំងតែម្តង ក្រោយគណនីហ្វេសប៊ុកឈ្មោះ Leonald Lu បានចែករំលែកករណីដ៏ចម្លែកមួយ គ្រាដែលសត្វស្វា១ក្បាល បានលួចចូលផ្ទះមួយកន្លែងនៅភូមិ Taman Testari Putra ប្រទេសម៉ាឡេស៊ី ប៉ុន្តែ អ្វីដែលមិននឹកស្មានដល់ គឺចោរស្វានោះបានលួចយកកូនឆ្កែម្ចាស់ផ្ទះទៅបាត់តែម្តង។
ភ្ជាប់ជាមួយរូបភាពបង្ហាញសត្វស្វា១ក្បាល ស្ថិតនៅលើខ្សែភ្លើង ខណៈដៃរបស់វាកំពុងកាន់អ្វីទំនងជាកូនឆ្កែ ម្ចាស់គណនីហ្វេសប៊ុកខាងលើ បានសរសេរថា៖ «តំបន់លំនៅដ្ឋាននៅ Selangor មានសត្វស្វាជាច្រើនដែលចូលចិត្តចូលផ្ទះអ្នកស្រុក ដើម្បីលួចឆ្មានិងឆ្កែ របស់ពួកគេ»។
លោក Leonald បាននិយាយថា គាត់មិនដឹងថាជាឆ្កែរបស់អ្នកណាទេ ប៉ុន្តែវាគួរតែជាកម្មសិទ្ធិរបស់នរណាម្នាក់ ព្រោះអ្នកភូមិតែងតែត្អូញត្អែរអំពីការបាត់សត្វចិញ្ចឹម។
បុរសរូបនេះក៏បានចែករំលែកឲ្យដឹងផងដែរថា សត្វស្វាមិនដែលចូលមកក្នុងផ្ទះរបស់គាត់ពីមុនទេ ប៉ុន្តែគាត់បានឃើញពួកវាព្យួរខ្លួនរណេងរណោងនៅជុំវិញរានហាលរថយន្តនៃផ្ទះផ្សេងទៀត។ ដោយហេតុផលនោះ គាត់គិតថាស្វា គឺពិតណស់ស្ថិតនៅពីក្រោយករណីសត្វចិញ្ចឹមដែលបាត់។
តែទោះយ៉ាងណា ដោយសារតែឃើញកូនឆ្កែនោះ ស្ថិតក្នុងស្ថានភាពដ៏គ្រោះថ្នាក់អាចធ្លាប់ពីដើមឈើ អ្នកភូមិនិងម្ចាស់ឆ្កែ បានខលទូរស័ព្ទទាក់ទងទៅអាជ្ញាធរក្នុងតំបន់ ឲ្យមកជួយអន្តរាគមន៍។
រហូតដល់ថ្ងៃទី១៩ អ្នកភូមិ និងក្រុមអភិរក្សសត្វព្រៃ បានធ្វើការសង្គ្រោះកូនឆ្កែនោះបានដោយជោគជ័យ តាមរយៈវិធីបង្អើលសត្វស្វាមួយក្បាលនោះឲ្យភ័យ ដើម្បីឲ្យវាទម្លាក់កូនឆ្កែនោះចុះក្រោម ដោយមានអ្នកចាំត្រងកូនឆ្កែនោះ ជាមួយក្រណាត់៕ រក្សាសិទ្ធិដោយ៖ លឹម ហុង