ថ្មីៗនេះរដ្ឋការក្រុងវ៉ាស៊ីនតោន ឲ្យដឹងថា ពួកគេយល់ព្រមនឹងផែនការរៀបចំជំនួបរវាងប្រធានាធិបតីអាមេរិក ដូណាល់ ត្រាំ និងប្រធានាធិបតីរុស្ស៊ី វ្ល៉ា ឌីមៀពូទីន នៅសេតវិមាន។ ទង្វើនេះធ្វើឲ្យលេចឮនូវការលើកឡើងជុំវិញដំណើរទស្សនកិច្ចអាមេរិកជាលើកដំបូងរបស់ប្រធានាធិបតីរុស្ស៊ី ក្នុងអំឡុងជាង១ទសវត្សរ៍កន្លងមក ពិសេសចំពេលដែលស្ថានការណ៍រវាងមហាអំណាចទាំងពីរ កំពុងមានទំនាស់ពាក្យសម្តីខ្លាំងៗព្រមទាំងសកម្មភាពបណ្តេញអ្នកការទូតទៅវិញទៅមក។
ប្រធានាធាធិបតីដូណាល់ ត្រាំ និងសមាសភាគី វ្ល៉ា ឌីមៀពូទីន
មុននោះនៅថ្ងៃទី ២ ខែមេសា វិមានក្រែមឡាំង បានប្រកាសថា លោកត្រាំ បានផ្ញើពាក្យអញ្ជើញលោកពូទីន តាមរយៈកិច្ចសន្ទនាទូរស័ព្ទ បើតាមអ្នកនាំពាក្យរុស្ស៊ី Yury Ushakov នោះសំណើរនេះពិតជាគំនិតសកម្ម និងអស្ចារ្យមួយ។
លោក Ushakov ក៏បានសម្តែងការសង្ឃឹមថា ភាពតានតឹងផ្តើមចេញពីករណីបណ្តេញអ្នកការទូតនឹងពុំជះឥទ្ធិពលដល់កិច្ចពិភាក្សាអំពីជំនួបកំពូលរវាងប្រទេសទាំងពីរ ហើយពួកគេអាចវិលត្រឡប់មកធ្វើការចរចា ដែលមានលក្ខណៈស្ថាបនា ព្រមទាំងម៉ឺងម៉ាត់បំផុត ។ មជ្ឈដ្ឋានអ្នកវិភាគលើកឡើងថា ប្រសិនបើជំនួបនោះប្រព្រឹត្តទៅមែនវាជាលើកដំបូងហើយដែលប្រធានាធិបតីរុស្ស៊ីពូទីន នឹងមកចូលរួមប្រជុំនៅសេតវិមាន បន្ទាប់ពីជំនួនមុននោះរបស់លោកជាមួយអតីតប្រធានាធិបតី George W. Bush នៅសេតវិមានកាលពីឆ្នាំ ២០០៥ ។ ក្រុមអ្នកវិភាគដដែលក៏បានលើកឡើងពីលទ្ធភាពដែលក្នុងជំនួបនោះ លោកត្រាំ និងមិននិយាយដល់បញ្ហារុស្ស៊ីអន្តរាគមន៍ចូលក្នុងការបោះឆ្នោតប្រធានាធិបតីអាមេរិក នាឆ្នាំ ២០១៦ ក៏ដូចជាការចោទប្រកាន់ក្រុងមូស្គូ ពាក់ព័ន្ធដល់ករណីបំពុលចារបុរសមុខពីរ Sergei Skripal ។
គួររំលឹកថា ប្រធានាធិបតីត្រាំ បានជួបសមាសភាគីពូទីន ពីរលើកនាឱកាសសន្និសីទកំពូល G20 នៅអាល្លឺម៉ង់កាលពីរដូវរំហើយឆ្នាំទៅមិញ និងនៅសន្និសីទ APEC នាប្រទេសវៀតណាមកាលពីខែតុលាឆ្នាំ ២០១៧ ។ មុននោះដែរ លោកពូទីនក៏ធ្លាប់ជួបជាមួយអតីតប្រធានាធិបតីអាមេរិក Barack Obama នាសន្និសីទកំពូលអន្តរជាតិ នៅអង្គការសហប្រជាជាតិនាបុរីញូយ៉ក ប្រទេសអាមេរិក ៕ សូយន
