បន្ទាយមានជ័យ ៖ បុរសជាប្តីដែលជាមនុស្សញៀនថ្នាំ បានប្រើអំពើហិង្សានិងវាយប្រពន្ធស្លាប់ ហើយត្រូវបាននគរបាលក្រុងប៉ោយប៉ែត ស្រាវជ្រាវ និងបាននាំខ្លួនឃាតករសម្លាប់ប្រពន្ធខ្លួនឯង មកធ្វើត្រាប់ពីសកម្មភាពរបស់ខ្លួន នៅភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត នៅថ្ងៃទី៤ ខែមេសា ឆ្នាំ២០១៨នេះ ក្រោយចាប់បានរួចមក។
លោកវរសេនីយ៍ឯក ធិន ស៊ិនដេត អធិការក្រុងប៉ោយប៉ែត បានថ្លែងថា ក្រោយពីមានការសម្របសម្រួលពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូង និងបញ្ជាផ្ទាល់លោកឧត្តមសេនីយ៍ទោ អាត់ ខែម ស្នងការនគរបាលខេត្ត លើសំណុំករណីឃាតកម្ម ដែលកើតឡើងកាលពីយប់ថ្ងៃទី២៩ ខែមីនា ឆ្នាំ២០១៨កន្លងមកនេះ នៅពេលនេះ ជនដៃដល់ជាប្តី ត្រូវបានកម្លាំងនគរបាលចាប់ខ្លួន។
លោកអធិការបន្តថា ជនរងគ្រោះឈ្មោះ ស្រី កា អាយុ២៥ឆ្នាំ រស់នៅភូមិ កើតហេតុខាងលើ មានស្លាកស្នាម រយះក្បាល២កន្លែង ស្នាមភ្នែកជាំទាំងសងខាង និងស្នាមជាំពេញដងខ្លួន។ ជនសង្ស័យឈ្មោះ បឿន សំប៊ុស អាយុ២៥ឆ្នាំ មានស្រុកកំណើតភូមិថ្មគោល ឃុំតាម៉ឺន ស្រុកបាត់ដំបង ខេត្តបាត់ដំបង ដែលជាមនុស្សញៀនថ្នាំ ហើយតែងតែប្រើអំពើហិង្សាលើប្រពន្ធជារឿយៗ។
លោកអធិការបន្ថែមថា ជនសង្ស័យឈ្មោះ បឿន សំប៊ុស ជាមនុស្សញៀនថ្នាំ តែងតែវាយធ្វើបាបប្រពន្ធ ឲ្យរបួសធ្ងន់ធ្ងរ រហូតដល់ស្លាប់ពិតប្រាកដមែន។ បន្ទាប់ពីវាយសម្លាប់ប្រពន្ធហើយ ជនសង្ស័យបានរត់គេចខ្លួន ទៅលាក់ខ្លួននៅស្រុកថ្មគោល លុះនៅយប់ថ្ងៃទី៣ ខែមេសា ឆ្នាំ២០១៨ កម្លាំងមូលដ្ឋានស្រុកថ្មគោល បានឃើញជនសង្ស័យខាងលើ ក៏បានធ្វើការឃាត់ខ្លួនរួចបញ្ជូន មកអធិការដ្ឋាននគរបាលក្រុងប៉ោយប៉ែត។ បន្ទាប់ពីការធ្វើត្រាប់ពីសកម្មភាពផ្ទាល់រួចមក ជនសង្ស័យបានសារភាព ថាខ្លួនពិតជាបានសម្លាប់ប្រពន្ធពិតប្រាកដមែន។
បច្ចុប្បន្ននេះ ជនសង្ស័យត្រូវបានបញ្ជូនខ្លួនទៅការិយាល័យជំនាញខេត្ត ដើម្បីចាត់ការបន្តទៅតាមនីតិវិធីច្បាប់៕ ដោយ៖បញ្ញាស័ក្តិ
