ភ្នំពេញ ៖ សម្តេចក្រឡាហោម ស ខេង បានថ្លែងថា បច្ចុប្បន្ននេះ នៅតែមានឈ្មួញទុច្ចរិតលួចផលិត ផលិតផល និងនាំចូលផលិតផលក្លែងក្លាយ ដោយគ្មានការខ្លាចរអាដល់សមត្ថកិច្ចឡើយ ហើយទង្វើនេះ គឺដោយសារតែស្ថាប័នទាំងអស់គ្មានការសហការគ្នា រវាងក្រសួងដែលពាក់ព័ន្ធជាមួយសមត្ថកិច្ចក្រសួងមហាផ្ទៃ ។
សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានអះអាងថា ឈ្មួញទុច្ចរិត នៅតែគឃ្លើនដាក់សមត្ថកិច្ច និងឈ្មួញខ្លះមានអ្នកកាងពីក្រោយខ្នង ជាដើម ។
ក្នុងកម្មវិធីបិទសន្និបាតបូកសរុបលទ្ធផលការងារឆ្នាំ២០១៧ និងលើកទិសដៅការងារឆ្នាំ២០១៨ របស់គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គម នារសៀលថ្ងៃទី៤ ខែមេសា ឆ្នាំ២០១៨នេះ នៅទីស្តីការក្រសួងមហាផ្ទៃ សម្តេចក្រឡាហោម ស ខេង បានលើកឡើងទៀតថា ផលិតផលក្លែងក្លាយនេះ មិនត្រឹមតែធ្វើឲ្យប៉ះពាល់ដល់សុខភាពអ្នកប្រើប្រាស់ និងអ្នកបរិភោគប៉ុណ្ណោះទេ គឺវាបានធ្វើឲ្យខាតបង់ដល់សេដ្ឋកិច្ចយ៉ាងធ្ងន់ធ្ងរ ដល់ប្រទេសជាតិផងដែរ ។ សម្តេចក្រឡាហោមក៏បានធ្វើការអំពាវនាវជាថ្មីម្តងទៀតដល់ស្ថាប័នពាក់ព័ន្ធទាំងអស់ ត្រូវតែរួមសហការគ្នាដាច់ខាតទប់ស្កាត់និងការពារមិនឲ្យផលិតផលក្លែងក្លាយនេះ កើតមាននៅកម្ពុជានោះឡើយ។
សូមរំលឹកថា កាលពីឆ្នាំ២០១៧កន្លងទៅនេះ គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ ដល់សុខភាព និងសុវត្ថិភាពសង្គមបានបង្ក្រាបផលិតផលក្លែងក្លាយមានចំនួន ១៩ករណី រឹបអូសវត្ថុតាង សរុបចំនួន ៥៩៧,៥តោន ធ្វើពិធីដុតបំផ្លាញចោល ៨១តោន ឃាត់ខ្លួនជនសង្ស័យចំនួន ៦នាក់ កសាងសំណុំរឿងបញ្ជូនទៅតុលាការ ។
ដោយឡែកកាលពីថ្ងៃទី៣ ខែមេសា ឆ្នាំ២០១៨ ក្រសួងមហាផ្ទៃក៏បានកិនកម្ទេចចោលនូវផលិតផលក្លែងក្លាយមួយចំនួន មានដូចជា លេលាបស្បែក និងលាបមុខ អាហារបំប៉ន ឱសថក្លែងក្លាយ និងផលិតផលក្លែងក្លាយមួយចំនួនទៀត ចំនួនជាង១១០តោន ៕ ដោយ៖បញ្ញាស័ក្តិ