ភ្នំពេញ ៖ លោកអង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌ និងជាប្រធានគណៈកម្មការថ្នាក់ជាតិ លើកលែងទោស និងបន្ធូរបន្ថយទោស កាលពីថ្ងៃទី៤ ខែមេសា ឆ្នាំ២០១៨ នៅទីស្តីការក្រសួងយុត្តិធម៌ បានរៀបចំកិច្ចប្រជុំស្តីពី ការពិនិត្យ និងវាតម្លៃបញ្ជីឈ្មោះ ទណ្ឌិត ស្នើបន្ធូរបន្ថយទោស និងលើកលែងទោស ក្នុងឱកាសពិធីបុណ្យចូលឆ្នាំ ប្រពៃណីជាតិខ្មែរ។
លោករដ្ឋមន្ត្រីក្រសួងយុត្តិធម៌ បានថ្លែងថា បញ្ជីឈ្មោះទណ្ឌិតស្នើសុំបន្ថូរបន្ថយទោស និងលើកលែងទោស ក្នុងឱកាសបុណ្យចូលឆ្នាំថ្មីប្រពៃណីជាតិ មានទណ្ឌិតស្នើសុំសរុប ៣២១នាក់ (ស្ត្រី២៨នាក់) មកពីពន្ធនាគារចំនួន២០ និងមណ្ឌលអប់រំកែប្រែចំនួន៤។ ក្នុងចំណោមទណ្ឌិតសរុបចំនួន៣២១នាក់ នោះមានជនជាតិបរទេសប្រមាណ១០ភាគរយ បានអនុវត្តទោសពីរភាគបី និងការបន្ថូរបន្ថយទោសមួយភាគបី ស្របទៅតាមក្រឹត្យច្បាប់លេខ២៨ និងច្បាប់ស្តីពីពន្ធនាគារ។ ទណ្ឌិត៣២១នាក់នោះ ពាក់ព័ន្ធនឹងសំណុំរឿងចម្រុះ អំពើឆក់ ប្លន់ លួច រំលោភ ឆបោក ឃាតកម្ម ជាដើម។
នៅក្រោយកិច្ចប្រជុំ លោក សុច សុផាន់ណារ៉ា អគ្គនាយករង នៃអគ្គនាយកដ្ឋាន កិច្ចការអយ្យការ និងព្រហ្មទណ្ឌ ក្រសួងយុត្តិធម៌ បានថ្លែងប្រាប់ក្រុមអ្នកយកព័ត៌មានថា ការស្នើសុំលើកលែងទោស និងបន្ធូរបន្ថយទោស គឺត្រូវអនុវត្តតាមក្រឹត្យច្បាប់លេខ២៨ និងច្បាប់ស្តីពីពន្ធនាគារ ចំពោះទណ្ឌិតទាំងឡាយណាដែលអនុវត្តទោសបាន១/៣ នៃទោសដាក់ពន្ធនាគារ អាចស្នើសុំបន្ធូរបន្ថយទោស និងអនុវត្តទោសបាន២/៣ អាចស្នើសុំលើកលែងទោសបាន។ ក៏ប៉ុន្តែមិនមែនគ្រប់ទណ្ឌិតដែលអនុវត្តមានលក្ខខណ្ឌខាងលើ សុទ្ធតែត្រូវទទួលការបន្ធូរបន្ថយទោស និងលើកលែងទោសនោះទេ គឺគណៈកម្មការថ្នាក់ជាតិ ដែលដឹកនាំដោយ លោករដ្ឋមន្ត្រី អង្គ វង្សវឌ្ឍនា យកចិត្តទុកដាក់បំផុត ដោយត្រូវពិនិត្យបន្ថែមទៀតទាក់ទងទៅនឹងការកែប្រែរបស់ទណ្ឌិត នៅក្នុងពន្ធនាគារ ភ្ជាប់ជាមួយឯកសារពាក់ព័ន្ធ ជាពិសេសសាលក្រម ឬសាលដីកាស្ថាពរ។
លោក សុច សុផាន់ណារ៉ា បានបន្តថា ចំណែកទណ្ឌិតណាដែលមិនកែប្រែ ប្រព្រឹត្តដដែលៗ ឬស្ថិតក្នុងស្ថានភាពមិនរាងចាល ហើយជាពិសេសបទល្មើសណាដែលកាច់សាហាវ ដែលមានកម្រិតបទល្មើសធ្ងន់ធ្ងរ ។ ក្រសួងបានយកចិត្តទុកដាក់ យ៉ាងខ្លាំងចំពោះបញ្ហានេះ ទាមទារពិនិត្យ ពិភាក្សាគ្នាយ៉ាងល្អិតល្អន់ជាទីបំផុត។
បើតាមរបាយការណ៍របស់ក្រសួងមហាផ្ទៃ បានឲ្យដឹងថា ឆ្នាំ២០១៧កន្លងទៅ ព្រះមហាក្សត្របានបន្ធូរបន្ថយទោស និងលើកលែងទោសដល់ទណ្ឌិតសរុបចំនួន១៥៧នាក់ (ស្រី២០នាក់) ដោយក្នុងព្រះរាជពិធីបុណ្យចូលឆ្នាំប្រពៃណីខ្មែរចំនួន៧២នាក់ (ស្រី១១នាក់) ពិធីបុណ្យពិសាខបូជា ៣៥នាក់ (ស្រី៤នាក់) និងពិធីបុណ្យអុំទូកបណ្ដែតប្រទីប សំពះព្រះខែ និងអកអំបុក៥០នាក់ ស្រី៥នាក់៕ ដោយ ៖ បញ្ញាស័ក្តិ