Brad Pitt និង Angelina Jolie បានលែងលះគ្នាជាផ្លូវការ បន្ទាប់ពីចំណងស្នេហាផ្អែមល្ហែម និងរៀបអាពាហ៍ពិពាហ៍បាន២ឆ្នាំ ។
កាសែត The Sun ថ្មីៗនេះទើបបញ្ជាក់ជាផ្លូវការថា និមិត្តរូបនៃទំនាក់ទំនងប្តីប្រពន្ធនៅហូលីវូត ២រូប នេះបានឈានដល់ការព្រមព្រៀងចិញ្ចឹមកូន និងបំពេញរួចរាល់នូវបែបបទលែងលះអូសបន្លាយរយៈពេលជិតពីរឆ្នាំកន្លងមក ។
ពេលនេះអ្នកទាំងពីរបានចែកផ្លូវគ្នាហើយ
ប្រភពស្និទ្ធស្នាលនឹងប្តីប្រពន្ធ២នាក់ ឲ្យដឹងថា ៖ “បណ្តាប្រការនៃការលែងលះត្រូវបានភាគីទាំងពីរយល់ព្រម ។ ពួកគេបានសម្រេចរួចរាល់លើផ្នែកច្បាប់ ហើយនឹងដាក់ជូនតុលាការចេញដីកាសម្រេចចុងក្រោយក្នុងអំឡុងប៉ុន្មានសប្តាហ៍ទៀត ។ នេះពិតជារបត់ធំមួយចាប់តាំងពីអាពាហ៍ពិពាហ៍ត្រូវបានបញ្ចប់ ពិសេសគឺចំពោះការចោទប្រកាន់ទាំងឡាយរបស់ Angelina ប្រឆាំងនឹង Brad Pitt ។ ពិតណាស់ពួកគេបានទុកពេលវេលាដល់កូនៗនិងរវាងពួកគេទាំងពីរ។ អ្នកទាំងពីរសុទ្ធតែយល់ច្បាស់ថា សារៈសំខាន់ចំពោះកូនៗពួកគេនោះគឺការដែលឪពុកម្តាយរបស់ពួកវាមានចំណងទាក់ទងគោរពគ្នាទៅវិញទៅមក”។
ក្រោយការស្រឡាញ់គ្នាអស់ពេល ១០ឆ្នាំ និងរៀបការគ្នាបាន២ឆ្នាំ Angelina Jolie និង Brad Pitt បានរស់នៅដោយឡែកពីគ្នាតាំងពីឆ្នាំ ២០១៦ បន្ទាប់ពី Angelina ដាក់ពាក្យប្តឹងសុំលែងលះ ។ បណ្តឹងលែងលះរបស់ Angelina កាលពីខែមិថុនា ឆ្នាំ ២០១៦ បានចោទប្រកាន់ Brad Pitt ប្រព្រឹត្តអំពើហិង្សាទៅលើកូនប្រុស។
Brad Pitt និង Angelina មានកូនរួមចំនួន ៦នាក់ ៖ កូនបង្កើត ៣នាក់ និងកូនចិញ្ចឹម ៣នាក់ រួមមាន ៖ Maddox អាយុ 16 ឆ្នាំ, Pax Thiên អាយុ 14 ឆ្នាំ, Zahara អាយុ 13 ឆ្នាំ, Shiloh អាយុ 11 ឆ្នាំ និងកូនភ្លោះ song sinh Vivienne – Knox អាយុ 9 ឆ្នាំ ។
ក្រោយពីអ្នកទាំងពីរ បានព្រមព្រៀងគ្នានោះការលែងលះរបស់ពួកគេទាំងពីរនឹងប្រព្រឹត្តទៅយ៉ាងលឿនបំផុត ។
រឿងរ៉ាវស្នេហារបស់ Angelina និង Brad Pitt ធ្លាប់បានធ្វើឲ្យមនុស្សជាច្រើនមានការស្ងើចសរសើរយ៉ាងខ្លាំង ពួកគេបានជួប ហើយស្រឡាញ់គ្នាបន្ទាប់ពីសម្តែងរួមគ្នាក្នុងខ្សែភាពយន្ត “លោកនិងលោកស្រី Smith” កាលពីឆ្នាំ ២០០៤ បន្ទាប់មកអ្នកទាំងពីរបានរងការរិះគន់យ៉ាងខ្លាំងពិសេសគឺ Angelina ដោយគេចោទនាងថា គឺជាជនទី៣ លូកលាន់ធ្វើឲ្យបែកបាក់សុភមង្គលគ្រួសារអ្នកដទៃ ៕ ចន្ទ្រា
