យោតាមទំព័រហ្វេសប៊ុកឈ្មោះ Malaysia Animal Association (MAA) ពួកគេបានរកឃើញករណីលក់សាច់ឆ្កែ និងឆ្មា ខុសច្បាប់របស់ជនជាតិវៀតណាម នៅក្នុង Johor Bahru និង Selangor ប្រទេសម៉ាឡេស៊ី ។
ករណីនេះដែលបានកើតឡើងនៅក្នុង Johor Bahru ត្រូវបានរកឃើញដោយអ្នកប្រើប្រាស់ហ្វេសប៊ុកម្នាក់ កាលពីថ្ងៃទី៣១ ខែមីនា ។ នាងបានប្រទះឃើញប្តីប្រពន្ធជនជាតិវៀតណាម ប្រកាសលក់សាច់ឆ្កែតាមអនឡាញ និងមានការរន្ធត់ចិត្តជាខ្លាំង នៅពេលឃើញបណ្តារូបភាពគួរឲ្យអាសូរ នៃសត្វឆ្កែដ៏កំសត់ទាំងនោះ ។ ពួកគេកំពុងលក់សាច់ឆ្កែក្នុងតម្លៃ ៤ ដុល្លារ ក្នុង១គ.ក្រ ហើយបានភ្ជាប់លេខទូរស័ព្ទនៅចំណង សម្រាប់អ្នកទិញដែលចូលចិត្តសាច់ពិសេសនេះ ។
នៅ Selangor សមាគមន៍សត្វម៉ាឡេស៊ី (MAA) បានបិទទីផ្សារងងឹតលក់សាច់ឆ្មារបស់ជនជាតិវៀតណាមមួយផងដែរ ។ ពួកគេបានអនុវត្តសកម្មភាពខុសច្បាប់ទាំងនេះ នៅក្នុងកន្លែងលាក់បាំង ដោយមានអ្នកស្រុកនៅទីនោះជាអតិថិជនដ៏សំខាន់របស់ពួកគេ ។ នេះគឺជាមុខរបរដ៏ឃោរឃៅមួយរបស់ពួកគេ ដែលអាចរកប្រាក់ចំណូលបានរាប់ពាន់រីងហ្គីតក្នុង១ខែ ។
MAA ក៏បានជម្រុញឲ្យរដ្ឋាភិបាលអនុម័តច្បាប់ ដើម្បីដាក់សត្វដូចជាឆ្កែ និងឆ្មា ស្ថិតក្រោមប្រភេទនៃសត្វដែលមិនមានន័យសម្រាប់ការប្រើប្រាស់ ដើម្បីហាមឃាត់ការសម្លាប់សត្វទាំងនេះនៅក្នុងប្រទេស ៕ ចន្ទី
