បន្ទាយមានជ័យ ៖ សម្ព័ន្ធភាពស៊ីវិលនានាក្នុងខេត្ត ស្រុក-ក្រុង បានចុះសួរសុខទុក្ខ ផ្តល់អំណោយដល់កងកម្លាំងការពារព្រំដែនទូទាំងខេត្តបន្ទាយមានជ័យ ក្នុងពេលព្រមៗគ្នាកាលពីថ្ងៃទី៥ ខែមេសា ឆ្នាំ២០១៨ ។
លោក លី សារី អភិបាលរងខេត្តបន្ទាយមានជ័យ បានដឹកនាំប្រតិភូសម្ព័ន្ធភាពស៊ីវិលរួម រដ្ឋបាលខេត្ត រដ្ឋបាលស្រុកស្វាយចេក មន្ទីរអប់រំ មន្ទីររ៉ែ មន្ទីរមុខងារសាធារណ: អាជីវករនានា បានចុះសួរសុខទុក្ខនិងផ្តលអំណោយក្នុងឱកាសបុណ្យចូលឆ្នាំថ្មីឆ្នាំចដល់កងទ័ពអនុសេនាធំលេខ៣ ផ្នែកសឹករងស្រុកស្វាយចេក។
មេបញ្ជាការងកងនេះបាននិយាយថា៖ កម្លាំងខ្លួនឈរជើងនៅក្នុងភូមិសាស្ត្រផងនិងសហការនៅបណ្តោយព្រំដែនផង។
លោកលី សារី បានរំលឹកនិងថ្លែងកោតសរសើរនូវស្នាដៃ ពលិកម្មប្រកបដោយប្តូរផ្តាច់របស់កងកម្លាំងទាំងចូលរួមការពារ ថែរក្សាសន្តិសុខ សណ្តាប់ធ្នាប់សុវត្ថិភាពជូនប្រជាពលរដ្ឋនិងភូមិឃុំ ក៏ដូចជាស្ថេរភាពនយោបាយ សង្គមនិងបូរណភាពទឹកដីព្រំដែន។
ជាការឆ្លើយតបនូវកម្លាំងមហាសាមគ្គីជាតិក្នុងចលនាសមរភូមិក្រោយ ជួយសមរភូមិមុខ សម្ព័ន្ធភាពស៊ីវិលខាងលើបានផ្តាំសួរសុខទុក្ខនិងជូនពរផងដែរ ទៅក្រុមគ្រួសារកងទ័ព កងនគរបាលដែលឈរជើង ក្នុងភូមិសាស្ត្រនិងឈរជើងនៅបណ្តោយព្រំដែនកម្ពុជា ថៃ ដោយសូមរពង្រឹងថែទាំសុខភាព ការចិញ្ចឹមសត្វឲ្យបានល្អបន្តទៀត។
សម្ព័ន្ធភាពបានផ្តល់អំណោយជាគ្រឿងឧបភោគ បរិភោគនិងសម្ភារ:ប្រើប្រាស់ ព្រមទាំងថវិកាដល់កងកម្លាំងទាំងឡាយទាំងជាលក្ខណ:អង្គភាព ទាំងលក្ខ:បុគ្គលផ្ទាល់ខ្លួន។
ចំណែកលោក សួន បវរ អភិបាលខេត្តបន្ទាយមានជ័យនិងប្រតិភូជាមន្ត្រី សប្បុរសជនស៊ីវិល បានចុះទៅសួរសុខទុក្ខកងទ័ពកងឯកភាពកងវរសេនាតូចលេខ១ តំបន់ប្រតិបត្តិការសឹករងខេត្តបន្ទាយមានជ័យឈរជើងនៅព្រំដែនជួរភ្នំដងរែក ។
រីឯអភិបាលរងដទៃទៀតបានដឹកនាំប្រតិភូទៅសួរសុខទុក្ខកងទ័ព កងនគរបាលនៅគោលដៅនៃស្រុក-ក្រុង នៅតាមព្រំដែនកម្ពុជា-ថៃ ដូចជាស្រុកម៉ាឡៃ ក្រុងប៉ោយប៉ែត ស្រុកអូរជ្រៅ៕ ដោយ ៖ បន្ទាយ