កណ្តាល ៖ អធិការដ្ឋាននគរបាលស្រុកល្វាឯម បានឲ្យដឹងថា មានករណីឃាតកម្ម វេលាម៉ោង៤និង៣០នាទីថ្ងៃទី៥ ខែមេសា ឆ្នាំ២០១៨ នៅភូមិល្វាសកណ្តាល ឃុំល្វាស ស្រុកល្វាឯម កូនស្រីបង្កើត កាប់សម្លាប់ឪពុកបង្កើតដោយមូលេហេតុកូនស្រីជាឃាតករបាត់លុយ៣.០០០រៀល។
នគរបាលស្រុកល្វាឯម បានបញ្ជាក់ថា ជនរងគ្រោះឈ្មោះឯម រឿន ភេទប្រុស អាយុ៦៦ឆ្នាំ ត្រូវជាឪពុកបង្កើតជនសង្ស័យ ។ ជនសង្ស័យ ឈ្មោះឃុត ចាន់នី អាយុ៣១ឆ្នាំ ភេទស្រី ត្រូវជាកូនបង្កើតរបស់ជនរងគ្រោះ។ ដើមហេតុនៃការសម្រេចចិត្ត ទាញកាំបិតផ្គាក់មកកាប់សម្លាប់ឪពុកបង្កើតខ្លួនឯងនេះ ក៏ដោយសារក្រោយពីនាង មកពីលក់ឆៃថាវវិញ ពេលដល់ផ្ទះ ក៏រាប់លុយ ឃើញបាត់ ៣.០០០រៀល ដោយខ្លួនគិតសង្ស័យថា មានតែឪពុកទេ ជាអ្នកយកលុយនោះ។ ពេលឪពុកមកពីកន្លែងកាត់សក់វិញ នាងចាន់នី ក៏ស្ទុះទៅយកកាំបិតផ្គាក់ មកកាប់ឪពុកស្លាប់ភ្លាមនៅក្រោមផ្ទះតែម្តង។
ក្រោយពេលមន្ត្រីប៉ុស្តិ៍រដ្ឋបាលល្វាស ទទួលបានព័ត៌មាន ពីប្រជាពលរដ្ឋក្បែរខាង កម្លាំងនគរបាល ក៏ចុះដល់កន្លែងកើយហេតុ និងស្វែងរកចាប់បានជនសង្ស័យ រួចបញ្ជូនមកប៉ុស្តិ៍ ដើម្បីកសាងសំណុំរឿងតាមនីតិវិធីច្បាប់៕ ដោយ៖បញ្ញាស័ក្តិ
