ឧត្ដរមានជ័យ ៖ ឃាតករម្នាក់ដែលជាប្តីចុង កាប់សម្លាប់ប្រពន្ធនិងកូន២នាក់ប្តីដើម នៅខេត្តត្បូងឃ្មុំ ត្រូវបានសមត្ថកិច្ចស្រាវជ្រាវឃាត់ខ្លួននៅថ្ងៃទី៥ ខែមេសា ឆ្នាំ២០១៨ នៅចំណុចភូមិពោធិវង្ស សង្កាត់បន្សាយរក្ស ក្រុងសំរោង ខេត្តឧត្តរមានជ័យ នៅម៉ោង១៧:០៥នាទី ខណៈដែលជនល្មើសបម្រុងគេចខ្លួនឆ្លងដែលទៅប្រទេសថៃ។
អំពើឃាតកម្មដ៏សាហាវត្រូវបានកម្លាំងសមត្ថកិច្ចនគរបាលខេត្តត្បូងឃ្មុំ ដែលជាម្ចាស់ករណី សហការជាមួយនាយកដ្ឋាននគរបាលព្រហ្មទណ្ឌ ព្រមទាំងស្នងការដ្ឋាននគរបាលខេត្តឧត្តរមានជ័យ បានតាមប្រមាញ់ចាប់ខ្លួនឃាតករ កាប់សម្លាប់មួយគ្រួសារបានហើយ។
ក្រោយពេលចាប់ជននេះបាន សមត្ថកិច្ចបានរកឃើញខ្សែក និងម៉ូតូរបស់ជនរងគ្រោះ ជារបស់ប្រពន្ធ ហើយមានរយៈពេល៦ថ្ងៃ គិតចាប់ពីថ្ងៃសម្លាប់ប្រពន្ធ និងកូនមក។ ខណៈពេលនេះ ជនល្មើសបាននិងកំពុងនាំខ្លួនឃាតករមកកាន់ស្នងការដ្ឋាននគរបាលខេត្តត្បូងឃ្មុំហើយ។
ការចាប់ខ្លួនល្មើសឈ្មោះជ្រាំង ភូ ភេទប្រុស អាយុ៤៨ឆ្នាំ ដែលកើតនៅភូមិ អកមូល ឃុំម្រាម ស្រុករមាសហែក ខេត្តស្វាយរៀង និងមានទីលំនៅបច្ចុប្បន្នភូមិដូង ឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ មុខរបរផ្សព្វផ្សាយអំពីបង្គន់អនាម័យ យោងតាមដីកាបញ្ជាឲ្យចូលខ្លួនរបស់ តំណាងអយ្យការនៃអយ្យការអមសាលាដំបូងខេត្តត្បូងឃ្មុំ ប៉ុក តារា កាលពីថ្ងៃទី៥ខែមេសាឆ្នាំ២០១៨។ តំណាងអយ្យការ បានបង្គាប់ឲ្យជនល្មើសចូលបង្ហាញខ្លួន នៅអយ្យការអមសាលាដំបូងខេត្តត្បូងឃ្មុំ ឲ្យបានមុនថ្ងៃទី៤ខែឧសភាឆ្នាំ២០១៨ ដើម្បីសាកសួរលើករណីឃាតកម្មគិតទុកជាមុន នៅចំណុចភូមិដូង ឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ កាលពីថ្ងៃទី១ខែមេសាឆ្នាំ២០១៨។ តំណាងអយ្យការ ក៏បានបញ្ជាដល់កងកម្លាំងសាធារណៈ ត្រូវចាប់និងនាំយកជនល្មើសខាងលើ មកប្រគល់ជូនអយ្យការអមសាលាដំបូងខេត្តត្បូងឃ្មុំ ដើម្បីចាត់ការតាមនីតិវិធីបានមុនកាលបរិច្ឆេទកំណត់។
ស្នងការនគរបាលខេត្តត្បូងឃ្មុំ លោកឧត្តមសេនីយ៍ទោ បែន រ័ត្ន បានប្រាប់ថា ឃាតករដែលបានកាប់សម្លាប់ម្ដាយ និងកូនប្រុស២នាក់ យ៉ាងព្រៃផ្សៃបំផុតនៅលើផ្ទះ ក្នុងស្រុកត្បូងឃ្មុំ ខេត្តត្បូងឃ្មុំ ត្រូវកម្លាំងនគរបាលចាប់ខ្លួនបានហើយ។ ប្រតិបត្តិការយ៉ាងក្ដៅគគុកនេះ ត្រូវបានធ្វើឡើងដោយកម្លាំងនគរបាលខេត្តត្បូងឃ្មុំ សហការជាមួយកម្លាំងនគរបាលខេត្តឧត្ដរមានជ័យ និងកម្លាំងនគរបាលនាយកដ្ឋានព្រហ្មទណ្ឌ ក្រសួងមហាផ្ទៃ ក្រោមការបញ្ជាពីនាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ។
លោកឧត្តមសេនីយ៍ស្នងការបានបញ្ជាក់ថា ក្រោយរត់គេចខ្លួនបាន៦ថ្ងៃ នៅថ្ងៃនេះកម្លាំងសមត្ថកិច្ចសហការជាមួយនគរបាលខេត្តឧត្តរមានជ័យ និងនាយកដ្ឋានព្រហ្មទណ្ឌក្រសួងមហាផ្ទៃ តាមចាប់បានហើយ នៅក្រុងសំរោង ព្រមទាំងដកហូតម៉ូតូមួយគ្រឿង និងខ្សែករបស់ជនរងគ្រោះមកវិញផងដែរ។
សូមជម្រាបថា ហេតុការណ៍ឃាតកម្មដ៏សាហាវមួយ បានកើតឡើងនៅ ក្នុងស្រុកត្បូងឃ្មុំ ខេត្តត្បូងឃ្មុំ ដោយស្ត្រីជាម្តាយ រួមទាំងកូនប្រុសជំទង់២នាក់ ត្រូវបានឃាតករកាប់សម្លាប់យ៉ាងព្រៃផ្សៃបំផុតនៅលើផ្ទះ កាលពីយប់ថ្ងៃទី៣១ខែមីនា រំលងអធ្រាត្រឆ្លងចូលថ្ងៃទី១ខែមេសា ហើយរឿងបង្កឲ្យមានការភ្ញាក់ផ្អើលនៅម៉ោង១២ថ្ងៃត្រង់ ថ្ងៃទី១ ខែមេសា ឆ្នាំ២០១៨នេះ ដោយឈ្មោះ សេង នាង ភេទស្រី អាយុ៤៥ឆ្នាំ ជនជាតិខ្មែរ នៅភូមិរើល ឃុំដូនតី ស្រុកពញាក្រែក ត្រូវជាបងថ្លៃជនរងគ្រោះ បានយកផ្អកមកឲ្យជនរងគ្រោះ ឈ្មោះ ឃាន សុខលាន ភេទស្រីអាយុ៤៣ឆ្នាំ ជាតិខ្មែរ រស់នៅភូមិដូងឃុំថ្មពេជ្រ ស្រុកខេត្តត្បូងឃ្មុំ។ ខណៈពេលមកដល់ឃើញផ្ទះស្ងាត់ខុសពីធម្មតា មិនឃើញបើកទ្វារលក់ដូរ ដូចសព្វដង ហើយគាត់ដើរចូល ដល់ក្រោមផ្ទះឃើញមានស្នាមឈាមហូរ តាមសរសរផ្ទះ ហើយបានឡើងទៅលើផ្ទះ រុញទ្វារចូលទៅឃើញជនរងគ្រោះ ដេកស្លាប់ទាំងអស់មានម្ដាយ និងកូនប្រុស២នាក់ទៀត។
សមត្ថកិច្ចបានបញ្ជាក់ថា ជនរងគ្រោះទី១៖ ឈ្មោះ ឃាន សុខលាន ភេទស្រីអាយុ៤៣ឆ្នាំ ជាម្ដាយ ភូមិដូងឃុំ ថ្មពេជ្រ ស្រុកត្បូងឃ្មុំ ទី២៖ ឈ្មោះ ធឿន វណ្ណៈ ភេទប្រុស អាយុ១៧ឆ្នាំ ជាកូន និងទី៣៖ ឈ្មោះ ធឿន ធារី ភេទប្រុស អាយុ១១ឆ្នាំ ជាកូន ស្លាប់ដោយសារមានស្នាមកាំបិតកាប់ចំកញ្ចឹងកពីខាងក្រោយ៕ ដោយ ៖ បញ្ញាស័ក្តិ
