ភ្នំពេញ ៖ ក្រសួងការបរទេស និងកិច្ចសហប្រតិបត្តិការអន្ដរជាតិ នៅថ្ងៃទី៥ ខែមេសា ឆ្នាំ២០១៨នេះ បានចេញសេចក្ដីប្រកាសព័ត៌មាន ស្ដីពីលទ្ធផលជំនួបសម្ដែងការគួរសមរវាង លោកទេសរដ្ឋមន្ដ្រី ប្រាក់ សុខុន រដ្ឋមន្ដ្រីក្រសួងការបរទេស ជាមួយលោកស្រី Mounia Boucetta អនុរដ្ឋមន្ដ្រីការបរទេសម៉ារ៉ុក នៅថ្ងៃទី៤ ខែមេសា ឆ្នាំ២០១៨។
ក្នុងជំនួបនោះ លោកទេសរដ្ឋមន្ដ្រី ប្រាក់ សុខុន បានស្វាគមន៍លោកស្រីអនុរដ្ឋមន្ដ្រី និងមានជំនឿថា ជំនួបនេះជាឱកាសមួយក្នុងការពង្រឹងទំនាក់ទំនង និងលើកកម្ពស់ថែមទៀត កិច្ចសហប្រតិបត្តិការរវាងកម្ពុជា និងប្រទេសម៉ារ៉ុក ដែលជាសមាជិកមួយនៃក្រុមសម្ព័ន្ធអារ៉ាប់ ផងដែរ។
លោកស្រី Mounia Boucetta បានជម្រាបជូនលោកទេសរដ្ឋមន្ត្រីថា ម៉ារ៉ុកមានឆន្ទៈក្នុងការពង្រឹងទំនាក់ទំនងនិងសហប្រតិបត្តិការទ្វេភាគី ជាមួយកម្ពុជាលើវិស័យជាច្រើន ។ លោស្រីបានគាំទ្រចំពោះយន្តការនៃកិច្ចពិគ្រោះយោបល់នយោបាយរវាងប្រទេសទាំងពីរ ដើម្បីជំរុញទំនាក់ទំនងក៏ដូចជាកិច្ចសហប្រតិបត្តិការរវាងប្រទេសយើងទាំងពីរឲ្យមានភាពស៊ីជម្រៅបន្ថែមទៀត។ ម៉ារ៉ុកសុំអរគុណកម្ពុជា ចំពោះការគាំទ្របេក្ខភាពម៉ារ៉ុកនៅលើឆាកអន្តរជាតិ។ លោកស្រីក៏បានវាយតម្លៃខ្ពស់ក្នុងការធ្វើទំនាក់ទំនងកិច្ចសហ ប្រតិបត្តិការរវាងវិទ្យាស្ថានជាតិការទូតនិងទំនាក់ទំនងអន្តរជាតិនៃក្រសួងការបរទេសកម្ពុជា ជាមួយវិទ្យាស្ថានរបស់ប្រទេសម៉ារ៉ុក ដែលជាផ្នែកមួយដ៏សំខាន់ ក្នុងការពង្រឹងនិងបង្កើនកិច្ចប្រតិបត្តិការផ្នែកការទូត ជាមួយប្រទេសម៉ារ៉ុក ក៏ដូចជាប្រទេសផ្សេងៗទៀតនៅក្នុងតំបន់ និងពិភពលោក៕ ដោយ៖បញ្ញាស័ក្តិ
សូមអានខ្លឹមសារលម្អិត នៃសេចក្ដីប្រកាសព័ត៌មានរបស់ក្រសួងការបរទេស ដែលមាននៅខាងក្រោមនេះ៖
